Կուղևորվե՞ն Բարսան և «միսթր Եվրոպա Լիգան» ԵԼ, թե՞․․․ ՉԼ անոնս

Նոյեմբերի 7-ին և 8-ին կկայանան Չեմպիոնների Լիգայի 2021/22 մրցաշրջանի խմբային փուլի վերջին հանդիպումները։ Մի շարք խմբերում արդեն հայտնի են փլեյ-օֆֆի մասնակիցները և նույնիսկ թիմերի վերջնական դիրքերը, իսկ մի քանի խմբերում էլ շարունակվում են պահպանվել որոշակի ինտրիգներ․․․ այն էլ ինչպիսի՜ ինտրիգներ․․․

Այս խմբում պարզ են միայն փլեյ-օֆֆի մասնակիցները։ Իսկ ահա Եվրոպա Լիգայի ուղեգրի ճակատագիրը կվիճարկեն «Բրյուգեն» և «ՌԲ Լայպցիգը»։ Նրանց մրցակիցները այս տուրում ոչ մի խնդիր չունեն լուծելու, այնպես որ, հավանական է, որ թե ՊՍԺ-ն, թե «Մանչեսթեր Սիթին» այդքան էլ մարտական տրամադրված չեն լինի առաջիկա դուելներին։ Այնպես որ, բելգիական և գերմանական կոլեկտիվների շանսերը կարելի է համարել հավասար։ Եվ դա արդեն իսկ ինտրիգային է դարձնում այս խմբի ավարտական ակորդը։

⚽ 21։45․ ՊՍԺ-«Բրյուգե» (նոյեմբերի 7)
⚽ 21։45․ «Լայպցիգ»-«Մանչեսթեր Սիթի» (նոյեմբերի 7)

Իսկ B խմբում իսկական «դրամա» է սպասվում։ Կլոպի թիմը 5 տուրերից հետո ունի նույնքան հաղթանակ (նման ցուցանիշ ունեն նաև «Բավարիան» և «Այաքսը»), վաղուց ապահովել է առաջին հորիզոնականը խմբում, իսկ այս կվարտետի մյուս ներկայացուցիչները գրեթե հավասար պայմաններում են։ «Պորտուն» և «Աթլետիկոն» կհանդիպեն միմյանց, իսկ Զլատանի «ավազակախմբին» կդիմակայի «Լիվերպուլը»։ Եթե միլանցիները հաղթեն, իսկ զուգահեռ խաղում հաղթի իսպանական ակումբը (կամ եթե գրանցվի ոչ-ոքի), ապա Պիոլիի թիմին կտեսնենք փլեյ-օֆֆում, իսկ եթե «Պորտուն» հաղթի, ապա զուգահեռ խաղում ցանկացած ելքի դեպքում էլ, պայքարը կշարունակեն «վիշապները»։ Իսկ եթե․․․ լավ, եկեք այլևս չշարունակենք Վանգայի գործառույթները կատարել, պարզապես երեկոյան հետևենք B խմբի զարգացումներին։

⚽ 00։00․ «Միլան»-«Լիվերպուլ» (նոյեմբերի 7)
⚽ 00։00․ «Պորտու»-«Աթլետիկո» (նոյեմբերի 7)

Հերթը հասավ այն խմբերից առաջինին, որում ամեն ինչ արդեն պարզ է, ոչ մի ինտրիգ չկա․․․ դե, գրեթե չկա․․․ Հետաքրքիր է, որ C խմբից ՉԼ փլեյ-օֆֆ են դուրս եկել երկու ոչ թոփ լիգաների ներկայացուցիչներ՝ նիդեռլանդական «Այաքսն» ու պորտուգալական «Սպորտինգը»։ Իսկ ինտրիգների պահով․․․ հետաքրքիր է՝ կկարողանա՞ ամստերդամցիների հարձակվող Ալլերը բարելավել իր արդյունավետության ռեկորդը, իսկ Հոլանդն էլ հերթական անգամ զարմացնել մեզ որևէ նոր ռեկորդով։ Ու վերջ, այդքանը․․․ Իսկ հետաքրքիր փաստերից՝ «Բեշիքթաշը» միակ ակումբն է, որը ոչ մի միավոր չի վաստակել խմբային փուլում։

⚽ 00։00․ «Բորուսիա»-«Բեշիքթաշ» (նոյեմբերի 7)
⚽ 00։00․ «Այաքս»-«Սպորտինգ» (նոյեմբերի 7)

Մյուս խումբը, որում ևս ամեն ինչ պարզ է․ «Ռեալը» և «Ինտերը» փլեյ-օֆֆում են, «Շերիֆը»՝ ԵԼ-ում, «Շախտյորը»․․․ հա, Ուկրաինայի առաջնությունում։ Բայց այս խմբում մի ինտրիգ դեռ պահպանվում է․ ո՞վ դուրս կգա խմբից առաջին հորիզոնականով։ Եվ բոնուս․ «Ռեալը» և «Ինտերը» հենց միմյանց դեմ խաղում էլ կվիճարկեն առաջին տեղը։ Իսկ «Շերիֆի» համար ուկրաինական թիմի դեմ խաղը կարևոր կլինի այնքանով, որ սա վերջին հանդիպումն է ՉԼ-ում այս մրցաշրջանում։ Ո՞վ գիտի, թե երբ կկարողանա այս համեստ ակումբը ևս մեկ անգամ հասնել այսքան հեռուն։

⚽ 00։00․ «Ռեալ»-«Ինտեր» (նոյեմբերի 7)
⚽ 00։00․ «Շախտյոր»-«Շերիֆ» (նոյեմբերի 7)

Եվ հասանք մեր` «ՉԼ անոնսը՝ ArmSport-ի հետ» սերիալի ամենաինտրիգային սերիաներից մեկին․ կտեսնե՞նք կատալոնական գրանդին Եվրոպա լիգայում, թե․․․ «Թե»-ն իրագործելու համար Չավիի թիմին պետք է հաղթանակ (ցանկալի է), քանի որ ՉԼ-ի փլեյ-օֆֆի համար պայքարող մյուս թիմը՝ «Բենֆիկան», ևս չի պատրաստվում բաղձալի ուղեգիրը ձեռքից բաց թողնել «Դինամոյի» հետ խաղում։ Գերմանական ակումբը վերջին տարիներին դարձել է «Բարսելոնայի» համար ամենաանհարմար մրցակիցներից մեկը, միգուցե Չավիին կհաջողվի՞ այս անգամ չեղարկել «Բավարիա» կոչվող «թուղթ ու գիրը»։

⚽ 00։00․ «Բավարիա»-«Բարսելոնա» (նոյեմբերի 8)
⚽ 00։00․ «Բենֆիկա»-«Դինամո Կ․» (նոյեմբերի 8)

F խումբը ևս կարելի է դասել ամենահետաքրքիր իրադարձություններով լի խմբերի շարքին։ ՄՅՈՒ-ն ապահովել է տեղը փլեյ-օֆֆում, իսկ ահա մյուս ուղեգրի ու նաև ԵԼ-ի «ուղևորի» հարցը դեռ բաց է։ Հատկապես հետաքրքիր է իտալո-իսպանական դիմակայությունը «Ատալանտայի» և «Վիլյառեալի» միջև։ Ու չմոռանանք, որ իսպանական ակումբի մարզիչը «միսթր Եվրոպա Լիգան» է (Ունաի Էմերի)․․ չէ՜-չէ՜, ոչինչ չեմ ակնարկում, պարզապես որպես փաստ հիշեցնում եմ․․․

⚽ 00։00․ ՄՅՈՒ-«Յանգ Բոյս» (նոյեմբերի 8)
⚽ 00։00․ «Ատալանտա»-«Վիլյառեալ» (նոյեմբերի 8)

Իսկ G խումբը մրցաշարային տեսանկյունից ամենաթեժն է․ բոլոր 4 թիմերը պահպանում են հնարավորություն խմբից դուրս գալու համար։ Հետաքրքիր է ստացվում․ «ՌԲ Լայպցիգը» կարող է ընդհանրապես չմասնակցել եվրագավաթների գարնանային հատվածին, իսկ «Ռեդ Բուլլ» հոլդինգի երկորդ թիմը՝ «Զալցբուրգը», մոտ է ՉԼ-ի փլեյ-օֆֆին։

⚽ 00։00․ «Զալցբուրգ»-«Սևիլյա» (նոյեմբերի 8)
⚽ 00։00․ «Վոլֆսբուրգ»-«Լիլ» (նոյեմբերի 8)

Եվ վերջին՝ H խումբը, որտեղ, անկախ այս տուրում գրանցված արդյունքներից, ևս ամեն ինչ պարզ է։ Ինչպես D խմբում, այստեղ բաց է մնում միայն առաջին տեղով դուրս գալու հարցը։ «Յուվենտուսը», ամենայն հավականությամբ, երեք միավոր կվաստակի «Մալմոյի» հետ խաղում, իսկ ահա «Զենիթը» ի զորու է գլխացավանք առաջացնել «Չելսիի» ֆուտբոլիստների մոտ։ Համենայն դեպս, այսօր և վաղը մեզ սպասվում են շատ հետաքրքիր դիմակայություններ, և անկախ թիմային նախապատվություններից, ցանկանում ենք մեկ բան՝ թող հաղթեն և պայքարը շարունակեն արժանիները․․․

⚽ 21։45․ «Յուվենտուս»-«Մալմո» (նոյեմբերի 8)
⚽ 21։45․ «Զենիթ»-«Չելսի» (նոյեմբերի 8)

Վերջին տուրից առաջ ռմբարկուների լավագույն եռյակը մնացել է անփոփոխ, ավելացել է միայն այդ խաղացողների գոլերի քանակը։ Ալերը, Լևանդովսկին և Նկունկուն այս տուրում ևս լավ հնարավորություն ունեն բարելավելու իրենց ցուցանիշները։ Առաջին երկուսը կշարունակեն իրենց մրցավազքը նաև գարնանը, իսկ ահա Նկունկուի թիմը չի շարունակի իր ելույթները ՉԼ-ում։ Բայց դա չի նշանակում, որ երիտասարդ ֆրանսիացուն չենք տեսնի ամենահեղինակավոր ակումբային մրցաշարի փլեյ-օֆֆում․․․ միգուցե ձմռանը նա փոխի՞ ակումբային գրանցումը․․․ այսպիսի հիանալի անհատական արդյունքները չեն կարող աննկատ մնալ գրանդ ակումբների կողմից։

Վար Բաբայան