Ալեքսանդր Գրիգորյան․ Մեր թիմը լավ վիճակում է, պատրաստ ենք վաղվա խաղին

Չեմպիոնների լիգայի երկրորդ որակավորման փուլի «Ալաշկերտ»-«Շերիֆ» խաղից առաջ կայացավ մեր թիմի գլխավոր մարզիչ Ալեքսանդր Գրիգորյանի ասուլիսը։

-Ձեր թիմը բավականին էներգիա է ծախսել՝ լրրացուցիչ ժամանակ անցկացնելով նախորդ խաղին․ հիմա ֆիզիկական վիճակն ինչպե՞ս կգնահատեք։

-Ե՛վ ֆիզիկական, և՛ հոգեբանական լավ վիճակում է գտնվում թիմը։ Պատրաստ ենք վաղվա խաղին։

-Մրցակցի կազմում կա՞ն ֆուտբոլիստներ, որ անհարմարություն կստեղծեն վաղվա խաղում։

-Կարելի է նշել նրանց հարձակման գիծը։ Մասնավորապես ձախ և աջ եզրային ֆուտբոլիստներին։

-Նոր փուլից առաջ 3 նորեկ ունեք։ Կրյուչկովը Նոայում պաշտպանության հենասյունն էր, Ալաշկերտում նման խնդիր չկա, նա պահեստային խաղացո՞ղ է համարվելու։ Բայրամյանը հայտացուցակում չկա, կարծես։ Կրյուչկովն ու Պապիկյանը որքանո՞վ են պատրաստ խաղին։

-Նրանք լավ ձեռքբերումներ են, որ մեզ կօգնեն։

-Նախորդ խաղում Դավիդ Դավիդյանը շատ եր տարվում անհատական խաղով, դա Ձե՞ր առաջադրանքն էր։

-Այո՛, նման առաջադրանք կար։ Կարծում եմ՝ նա չի չափազանցրել։ Պիտի իր վրա վերցներ խաղը։ Դա իր ուժեղ կողմերից է, որովհետև արագությամբ է օժտված։ Առաջին կեսում այնքան էլ լավ չէր ստացվում թե՛ իր, թե՛ Կոելյոյի մոտ, բայց երկրորդ կեսում մասնակիորեն շտկվեց։

-Ալաշկերտն արդեն մեծ կազմ ունի․ կարելի՞ է ասել, որ հաշվի եք առել մրցաշարերից մեկի խմբային փուլին մասնակցելու հարցն ու պատրաստվում եք ըստ արժանվույն ներկայանալուն։

-Իհարկե, որովհետև պիտի առաջնությանը մասնակցենք, ռոտացիա պիտի անենք։ Մեզ գրեթե հավասարազոր խաղացողներ են պետք։ Հիմա մեր առաջնության բոլոր թիմերն ուժեղացրել են կազմը։ Առհասարակ Հայաստանի առաջնությունն ուժեղացել է։ Կարծում եմ՝ օպտիմալ կազմ ենք հավաքագրել։

-Կողմնորոշվե՞լ եք վաղվա մեկնարկային կազմում, հատկապես՝ դարպասապահի։

-Այո, իհարկե։