«Բավարիայի» հարձակվող Ռոբերտ Լեւանդովսկին հեթ-տրիկի հեղինակ դարձավ Մյունխենգլադբախի «Բորուսիայի» դեմ խաղում: Դա ֆուտբոլիստին թույլ տվեց ամրապնդել իր առաջատար դիրքերը «Ոսկե խաղակոշիկի» դասակարգման աղյուսակում:
«Ոսկե խաղակոշիկը» մրցանակ է, որը յուրաքանչյուր մրցաշրջանի ավարտին տրվում է Եվրոպայի առաջնությունների բարձրագույն խմբերի լավագույն ռմբարկուին:
«Ոսկե խաղակոշիկի» ներկայիս դափնեկիրը «Լացիոյի» հարձակվող Չիրո Իմոբիլեն է, ով Ա Սերիայի 2019/20 մրցաշրջանի խաղերում դարձել էր 36 գոլի հեղինակ: Բայց ընթացիկ մրցաշրջանում մրցանակի բացահայտ ֆավորիտը «Բավարիայի» հարձակվող Ռոբերտ Լևանդովսկին է։
1. Ռոբերտ Լևանդովսկի («Բավարիա», Գերմանիա) – 39 գոլ, 78 միավոր (գործակիցը՝ 2)
2․ Լիոնել Մեսսի («Բարսելոնա», Իսպանիա) – 28 գոլ, 56 միավոր (գործակիցը՝ 2)
3 Կրիշտիանու Ռոնալդու («Յուվենտուս», Իտալիա) – 27 գոլ, 54 միավոր (գործակիցը՝ 2)
4-6 Էրլինգ Հոլանդ (Դորտմունդի «Բորուսիա», Գերմանիա) – 25 գոլ, 50 միավոր (գործակիցը՝ 2)
4-6 Անդրե Սիլվա (Այնտրախտ Ֆրանկֆուրտ, Գերմանիա) – 25 գոլ, 50 միավոր (գործակիցը՝ 2)
4-6. Կիլիան Մբապե (ՊՍԺ, Ֆրանսիա) – 25 գոլ, 50 միավոր (գործակիցը՝ 2)
7․ Փոլ Օնուաչու («Գենկ», Բելգիա) – 29 գոլ, 43,5 միավոր (գործակիցը ՝ 1,5):
Ի դեպ, Օնուաչուին վերջերս անդրադարձել էինք «Աֆրիկացի հսկան՝ «Ոսկե խաղակոշիկի» հավակնորդ» նյութում։ Նյութին կարող եք ծանոթանալ այստեղ։
Յուրաքանչյուր լիգա ունի իր գործակիցը. կախված առաջնության կարգավիճակից ՝ խփած գոլը բազմապատկվում է 2-ով (Իտալիա, Անգլիա, Իսպանիա, Գերմանիա և Ֆրանսիա) կամ 1.5-ով (առաջնություն վարկանիշի 6-ից 21 դիրքեր): Մնացած առաջնությունների ռմբարկուներին, այդ թվում նաև Հայաստանի առաջնության, տրվում է միայն մեկ միավոր յուրաքանչյուր գոլի դիմաց։