Այսօր հայտնի դարձավ, որ Հայաստանի ազգային հավաքականի նախկին ֆուտբոլիստ Լևոն Պաչաջյանը, որը ներկայումս հանդես է գալիս շվեդական «Լինչոպինգում», նշանակվել է Եվրոպայում ՀՖՖ դեսպան։
Ինչպես եղավ առաջարկը, ինչ գործառույթներ է իրականացնելու նախկին ֆուտբոլիստն ու ինչ սպասելիքներ ունի հավաքականի առաջիկա խաղերից, ArmSport-ը հարցրել է Լևոն Պաչաջյանին։
-Անսպասելի՞ էր այս առաջարկը։
-Անկեղծ լինեմ, անսպասելի չէր, որովհետև մի քանի անգամ այս հարցի շուրջ խոսել եմ ֆեդերացիայի հետ և սպասում էին իմ որոշմանը։ Վերջին մի քանի օրվա ընթացքում եկա այն եզրակացությանը, որ կարող եմ ստանձնել այդ աշխատանքը։
-Ի՞նչն էր մտածելու տեղիք տվել, երբ միանգամից չընդունեցիք ՀՖՖ-ի առաջարկը։
-Ավելի շատ անձնական հարցեր կային, որ պետք է ճշտվեին այս ընթացքում։ Այդ աշխատանքը արտասահմանի հետ է կապված, մտածում էի, որ ամեն ինչ պիտի հարմարեցնեմ, պիտի խոսեի նաև ընտանիքիս հետ։ Այս ամենը համադրելով հասկացա, որ կարող եմ ստանձնել այդ աշխատանքը։
-Ի՞նչ գործառույթներ եք ունենալու։
-Գործառույթները հիմնականում կապված են լինելու Եվրոպայում նոր անուններ գտնելու, նրանց հավաքականներին ներկայացնելու, մեր սփյուռքի հետ աշխատելու հետ։ Պետք է կազմակերպչական խնդիրներ լուծել այնտեղ, որտեղ հայկական արմատներով ֆուտբոլիստներ կգտնվեն։ Այս ամենը պետք է համակարգել և օգնել ֆեդերացիային, որ հավաքականները եվրոպական համայնքից նոր անուններով համալրվեն։
-Կհամատեղե՞ք Ձեր՝ ֆուտբոլիստի կարիերայի հետ։
-Այո, իհարկե։ Խնդիրներից մեկն էլ հենց այս համատեղման հետ էր կապված ու խորհրդակցությունների ընթացքում եկանք այն համոզման, որ պետք է համատեղեմ այնպես, որ մեկը մյուսին չխանգարի։ Որքան շարունակեմ խաղալս, այդքան ժամանակ պիտի համատեղեմ, չնայած, բոլորս էլ հասկանում ենք, որ ինձ խաղալու երկար ժամանակ չի մնացել։ Կարիերայիս ավարտից հետո է՛լ ավելի ծավալուն եմ պատրաստվում աշխատել հայկական ֆուտբոլի համար։
-Արդեն հրապարակվել է ազգային հավաքականի ընդլայնված ցուցակը առաջիկա խաղերի համար։ Հիմա ինչպիս՞ն է մեր հավաքականի կազմը՝ ըստ Ձեզ։
-Օպտիմալ, մրցունակ կազմ է։ Իհարկե, մեծ կորուստ ունենք՝ ի դեմս Մխիթարյանի։ Ավագի չլինելը շատ մեծ կորուստ է, բայց, կարծում եմ՝ այն դրական արդյունքը, որ հավաքականը գրանցեց նախորդ տարի, ցույց է տալիս մեր թիմի մրցունակ լինելը։ Ունենք կուռ կոլեկտիվ ու ամեն խաղում պայքարելու ենք հաջողության, հաղթանակի համար։ Մարզիչն էլ արդեն բավական ժամանակ է աշխատում է, արդեն շատ լավ պատկերացնում է հավաքականի խաղացողների հնարավորությունները, ու ուրախալի է, որ շատ երիտասարդ ֆուտբոլիստներ են ներգրավվել, նույնիսկ 17 տարեկան ֆուտբոլիստ ունենք։ Ֆուտբոլիստների համար հիանալի հնարավորություն է այս ժամանակահատվածում ֆուտբոլային աշխարհին իրենց մասին տեղյակ պահելու համար։ Պետք է առաջ նայել։ Շատ պատասխանատու խաղեր են։ Հուսով եմ՝ լավ կմեկնարկեն։
-Առաջիկայում նաև ընկերական խաղ ունենք Շվեդիայի ընտրանու դեմ։ Այս խաղը որքանո՞վ օգտակար կլինի հավաքականի համար։
-Շատ դրական եմ գնահատում այս խաղի կազմակերպումը, որովհետև Շվեդիայի հավաքականը շատ պինդ ընկույզ է, ու եվրոպական ցանկացած հավաքականի համար դժվար է Շվեդիայի հետ խաղալը։ Հաշվի առնելով այն հանգամանքը, որ Զլատանը վերադարձել է, դա նույնպես մեծ մրցակցություն է ստեղծում երկու հավաքականների միջև։ Եթե չեմ սխալվում, պատմության ընթացքում առաջին անգամ ենք հանդիպում շվեդների հետ։ Կարծում եմ՝ շատ դիտարժան խաղ է սպասվում։ Անհամբեր սպասում եմ այդ խաղին, որը, իմ կարծիքով, կկայանա Ստոկհոլմում։
-Հայաստանի առաջնությունում ծավալվող իրադարձություններին, կարծում եմ, ևս հետևում եք։ Եվս մեկ թիմ դուրս եկավ առաջնությունից։ Այս իրավիճակն ի՞նչ ազդեցություն կունենա հայկական ֆուտբոլի և կոնկրետ ազգային հավաքականի առաջիկա խաղերի վրա։
-Ցավալի է նման իրավիճակ տեսնել առաջնության հետ կապված։ Նախորդ ակումբը, որ դուրս եկավ առաջնությունից Կապանի թիմն էր, որը, իմ կարծիքով, զուտ ֆինանսական խնդիրների պատճառով էր։ Այդպիսին էր տպավորությունը։ Իսկ «Լոռիի» պարագայում ՀՖՖ-ի կայացրած որոշումների հետ էր կապված։ Մանրամասներին այդքան էլ ծանոթ չեմ, չեմ ուզում ինչ-որ մեկի կողմը բռնել, բայց ցավալին այն է, որ նման դեպքեր են գրանցվում։ Պիտի ամեն ինչ անել՝ «Լոռիի» ղեկավարությանը համոզել, որ թիմը դուրս չգա, որովհետև այդ ամբողջ մարզը ֆուտբոլային առումով կախված է այդ մի ֆուտբոլային ակումբից։ Պետք է այնպես անել, որ ֆուտբոլն այնտեղ զարգանա։ Հուսով եմ՝ ինչ-որ կերպ խնդիրը կհարթվի։
Մի կողմից լավ է, մյուսից՝ վատ։ Հիմա ասեմ ինչ նկատի ունեմ։ Հայաստանի առաջնությունում լեգիոներների քանակն այնքան է շատացել, որ հավաքականի խաղերի վրա ազդեցություն չի ունենում այս կամ այն թիմի լինել-չլինելը, որովհետև ինչպես տեսնում եք՝ հայ ֆուտբոլիստներ քիչ են հանդես գալիս մեր ներքին առաջնությունում։ Ցավով եմ դա ասում։
Բայց մյուս կողմից էլ վատ է, որ ակումբ է լքում առաջնությունը, ինչից տուժում է մի մեծ կոլեկտիվ և, ընդհանրապես, ամբողջ ֆուտբոլը։ Պետք է աշխատել ապագայում զերծ մնալ նման պրակտիկայից։
Ստելլա Բաբլոյան