Օրեր առաջ ՀՖՖ-ն տեղեկացրեց ՀՖՖ 6 անդամների՝ Դիլիջան ՖԱ ՓԲԸ-ի, Էրեբունի-Դիլիջան ՄԱ ՀԿ-ի, Էրեբունի ՍԱ ՀԿ-ի, Սևան ՖԱ ՍՊԸ ակումբների, հայկական ֆուտբոլի վետերանների և պատանի ֆուտբոլիստների համերաշխություն ՀԿ-ի, Դովեղ ՖԱ ՀԿ-ի ՀՖՖ անդամության կասեցման մասին։
ՀՖՖ-ն որպես Դիլիջան ՖԱ ՓԲԸ-ի անդամության կասեցման հիմք ներկայացրել է՝ մեջբերում եմ․ «Դիլիջան ՖԱ ՓԲԸ-ի՝ ՀՖՖ-ի անդամության կասեցման հիմքերից մեկը 2020 թվականի դեկտեմբերի 30-ին ՀՖՖ 9 անդամների դիմումն է, որով օրակարգային հարց է առաջարկվել, ի թիվս ՀՖՖ այլ անդամների, կասեցնել Դիլիջան ֆուտբոլային ակումբ ՓԲԸ անդամությունը ՀՖՖ-ին։ Տվյալ դիմում-պահանջը ստորագրել է նաև Դիլիջան ֆուտբոլային ակումբ ՓԲԸ-ն, դրանով հաստատելով իր ցանկությունը և տալով համաձայնություն ՀՖՖ-ին իր անդամությունը կասեցնելու հարցի վերաբերյալ: Ուստի, կարելի է եզրակացնել, որ ԴՖԱ ՓԲԸ հրաժարվում է ՀՖՖ իր անդամությունից՝ ցանկություն չունենալով այլևս անդամակցել ՀՖՖ-ին: Համաձայն ՀՖՖ Կանոնադրության 19-րդ հոդվածի 1-ին կետի՝ ԴՖԱ ՓԲԸ այդ ցանկությունն ինքնաբերաբար ուժի մեջ կմտնի 2020-2021 ֆուտբոլային մրցաշրջանի ավարտից անմիջապես հետո, իսկ մինչ այդ, հիմք է ծառայում նաև Կանոնադրության 16-րդ հոդվածի 1-ին կետի “Դ”, և “Ը” ենթակետերի խախտումը, նույն հոդվածի 3-րդ կետը, ինչպես նաև Կանոնադրության 17-րդ հոդվածի 1-ին կետը»:
ArmSport-ի հետ զրույցում «Դիլիջան» ակումբի տնօրեն Արտակ Մելիքյանը, որն ավելի վաղ ցմահ զրկվել էր ֆուտբոլային գործունեությունից՝ ի պատասխան ՀՖՖ այս պարզաբանման ասում է․ «Այդպիսի բան չկա։ Մենք ասել ենք, որ պատրաստ ենք քննությանը մասնակցել։ «Դիլիջանը» նամակ է ուղարկել ֆեդերացիային՝ նշելով, որ օբյեկտիվություն լինի։ Մենք արդարություն ու օբյեկտիվություն ենք ուզում։
Ոչ ոք չի խոսում «Վեստ Արմենիա» ու «Անի» ֆուտբոլային ակումբների մասին, որովհետև այնտեղ նրանց մարդիկ են։ Նրանք այդ ակումբներից շահ ունեն ու դրանք ատամներով պահում են, իսկ այդ ակումբներում ավելի ահավոր բաներ են կատարվում։ Բայց նրանք զրկել են այնպիսի ակումբների, որոնք չեն մասնակցել այդ առուծախին։ Նույնիսկ ֆուտբոլային խաղեր չեն դիտել։ Հավաստիացնում եմ, որ կա մարդ, որը վերջին անգամ եղել է «Արարատ-73»-ի խաղին, բայց իրեն ցմահ զրկել են։ Ես չեմ ասում՝ մյուս ակումբներին` «Լոկոմոտիվին», «Արագածին», «Տորպեդոյին», «Մասիսին», «Երևանին» ինչու՞ են զրկել, ես ասում եմ՝ այս երկու ակումբին ինչու՞ չեն զրկել»։
Անդրադառնալով արտահերթ ժողով անցկացնելու հարցին՝ Մելիքյանն ասում է, որ ֆուտբոլային հանրությունն ուզում է ժողով անել ու ասել, որ այդ ակումբներին զրկեն, քանի որ նրանք շատ բաներ են արել։ Ըստ Մելիքյանի՝ ֆեդերացիան այդ ժողովի անցկացումն ապօրինություն է որակել, քանի որ իրեն «ձեռք չի տալիս», որ այդ ակումբների հարցը քննարկվի։
«Պետք է պարզվի, թե ինչու է Արմեն Մելիքբեկյանն ամեն ինչ անում, որ «Վեստ Արմենիա» ու «Անի» ակումբների մասին չխոսվի։ Եթե նա պահում է այնպիսի ակումբների, որոնք մեղադրվում են պայմանավորված խաղերի մեջ, նշանակում է՝ մասնակից է դառնում նրանց ու շահագրգիռ կողմ է»,- ասում է ԴՖԱ-ի տնօրենը։
ՀՖՖ-ն իր հերթին ավելի վաղ էր անդրադարձել այս հարցին՝ պարզաբանելով, թե ապօրինությունն ինչումն է։
«Դիմումի մեջ, որպես արտահերթ ժողովի անցկացման ժամկետ, ներկայացված է հունվարի 20-ը, որը ողջամիտ ժամկետ չէ, քանի որ, ըստ ՀՖՖ կանոնադրության, ՀՖՖ անդամների 1/3-ի նախաձեռնությամբ արտահերթ ժողովի դիմում ներկայացնելու պարագայում Գործադիր կոմիտեն պետք է կազմակերպի ժողովը երկամսյա ժամանակահատվածում։
ՀՖՖ 9 անդամները, չսպասելով Գործադիր կոմիտեի՝ հունվարի 25-ին նախատեսված նիստին և կայացվելիք հնարավոր որոշմանը՝ հունվարի 21-ին որոշում են կայացրել իրենց նախաձեռնությամբ փետրվարի 1-ին հրավիրել Արտահերթ ժողով և այդ կապակցությամբ համապատասխան ծանուցումներ են ուղարկել ՀՖՖ անդամներին։
Հաշվի առնելով այն հանգամանքը, որ վերոնշյալ 9 անդամները չեն սպասել գործադիր կոմիտեի որոշմանը՝ դրանով իսկ խախտելով ՀՖՖ կանոնադրությամբ սահմանված ընթացակարգը, իրենց կողմից նախաձեռնված արտահերթ ժողովը կրում է ապօրինի բնույթ և դրանում ընդունված որևէ որոշում չի կարող ունենալ իրավական ուժ: Այդ իսկ պատճառով ՀՖՖ գործադիր կոմիտեն որոշեց մերժել 9 անդամների դիմում-պահանջը»,- ասված է ՀՖՖ հաղորդագրության մեջ։
Մելիքյանը, սակայն, հավաստիացնում է, որ ժողովը տեղի է ունենալու անկախ նրանից, թե ինչ է որոշել Գործկոմը․ «Ժողովն է որոշում, թե որ անդամին զրկել, որին կասեցնել։ Սա շատ կարևոր է»։
Ի դեպ, Մելիքյանի խոսքով, նախորդ տարվա դեկտեմբերի 21-ին ՀՖՖ-ն իր հետ Մարզադաշտի տարածքում ֆուտբոլային խաղերի կազմակերպման և անցկացման թույլտվության պայմանագիրը լուծելու վերաբերյալ համաձայնագիր էր ստորագրել՝ վավեր համարելով իր ստորագրությունը, իսկ դրանից էլ առաջ՝ դեկտեմբերի 8-ին, նամակ էր ուղարկել՝ պահանջելով, որ ՀՖՖ հերթական ժողովին մասնակցող պատվիրակին պիտի լիազորի ակումբի գործադիր մարմնի պաշտոնը զբաղեցնող Արտակ Մելիքյանը։
Ավելի ուշ, սակայն, դեկտեմբերի 28-ին, Մելիքյանի խոսքով, նոր նամակ է ստացվել ՀՖՖ-ից, որտեղ նշվում է, որ Մելիքյանը չի կարող լիազորել պատվիրակի, քանի որ ցմահ որակազրկված է ֆուտբոլային գործունեությունից։
Իսկ ՀՖՖ գործադիր կոմիտեի նիստից հետո ՀՖՖ գլխավոր քարտուղար Արթուր Ազարյանը ՀՖՖ պաշտոնական կայքի հետ զրույցում պարզաբանել էր ԴՖԱ ՓԲԸ ՀՖՖ անդամությունից կասեցման հարցը՝ ասելով․
«Անցած տարվա դեկտեմբերին տեղի ունեցած ՀՖՖ հերթական ժողովից 1-2 օր առաջ Դիլիջան ՖԱ ՓԲԸ-ն փորձել էր փոխել իր պատվիրակին՝ ներկայացնելով այդ ակումբի հետ աշխատանքային կամ որևէ այլ բնույթի կապ չունեցող անձի, ով ներգրավվել էր որպես ՀՀ տարածքում գործող իրավաբանական ընկերության ներկայացուցիչ կամ անհատ իրավաբան:
Ընդ որում, նախապես ներկայացված պատվիրակին ակումբի կողմից լիազորել էր ակումբի տնօրենը, ով նման գործառույթ իրականացնելու իրավասություն չուներ, քանի որ դեռևս 2020 թ. հուլիսին ցմահ որակազրկվել էր Հայաստանի ֆուտբոլի ֆեդերացիայի կողմից՝ պայմանավորված խաղերում ներգրավված լինելու հիմքով: Հետաքրքրական է նաև այն հանգամանքը, որ որպես նոր պատվիրակ ներկայացվող անձը 2019 թ. դեկտեմբերին կայացած ՀՖՖ արտահերթ ժողովին հանդես էր եկել որպես ՀՖՖ մեկ այլ անդամի՝ Վանաձորի ֆուտբոլի ակադեմիա ՀԿ պատվիրակ: Նման իրավիճակն առաջացնում է լուրջ և հիմնավոր կասկածներ առ այն, որ Դիլիջան ՖԱ ՓԲԸ կոպտորեն խախտում է ՀՖՖ կանոնադրության կետերից մեկը՝ չկարողանալով ապահովել իր գործունեության անկախությունը և թույլ տալով երրորդ անձանց միջամտություն»։
Հիշեցնենք, որ ՀՖՖ 9 անդամների նախաձեռնությամբ հրավիրված Արտահերթ ժողովը նախատեսվում է անցկացնել փետրվարի 1-ին։
Նամակագրության լուսանկարները՝ Արտակ Մելիքյանի
Ստելլա Բաբլոյան
