Հոկտեմբերի 8-ին տեղեկություն տարածվեց, որ քրեական գործ է հարուցվել ՀՀ Քր-օր-ի 201 հոդվածի 2-րդ մասի (արհեստավարժ մարզամրցումների և հանդիսադիր առևտրային մրցույթների մասնակիցներին ու կազմակերպիչներին կաշառելը) և 214 հոդվածի 1-ին մասի (առևտրային կամ այլ կազմակերպությունների ծառայողների կողմից լիազորությունները չարաշահելը) հատկանիշներով:
Նշված էր, որ Ոստիկանությունում օպերատիվ տվյալներ են ստացվել, համաձայն որոնց «Մասիս» ֆուտբոլային ակումբի մարզիկները և մարզամրցումների մասնակիցը նախնական համաձայնությամբ կանխորոշել են խաղի ելքը՝ ձեռնտու հաշվով, ինչի համար կատարվել են խաղադրույքներ, որի արդյունքում «Վիվառո Բեթինգ» բուքմեյքերական ընկերությանը պատճառվել է մոտ 1,5 մլն դրամի վնաս: Փաստի առթիվ նախաքննություն է կատարվում:
ArmSport-ը գնացել է կատարվածի հետքերով և փորձել պարզել, թե ինչի մասին է ամենը:
«Մասիս» ակումբի գործադիր տնօրեն Արտակ Մելիքյանը, որ հոկտեմբերի 1-ից է ստանձնել պաշտոնը, մեզ հետ զրույցում նշում է, որ առայժմ չի կարող կատարվածի մասին մանրամասն տեղեկություններ տրամադրել։ Միևնույն ժամանակ Մելիքյանը հավաստում է, որ Ոստիկանությունից և որևէ այլ մարմնից իրենց հետ կապ չեն հաստատել, ակումբի որևէ աշխատակից չի կանչվել, ոչ էլ ծանուցում է ստացել:
«Գաղափար չունենք՝ կա՞ քրեական գործ, թե՞ ոչ: Մենք մամուլից ենք իմացել այդ մասին: Ակումբը շահագրգռված է, որպեսզի ամեն ինչ բացահայտվի, եթե կարիքը լինի՝ կաջակցենք: Եթե քրեական գործ կա, ոստիկանությունը պետք է մեզ հետ կապ հաստատի, մենք զանգե՞նք…», -նոր հարցականներ է ավելացնում այս պատմությանը ակումբի տնօրենը։
Արտակ Մելիքյանից տեղեկանում ենք, որ ակումբում ժողով է եղել և բոլորին ասվել է, որ պետք է աջակցեն քննությանը՝ հասկանալու, թե ինչի մասին է խոսքը:
«Բոլորն էլ վարկածներ ունեն, բայց քրեական գործ է… մտածում ենք, որ այդպիսի բան չի էլ կարող լինել: Եթե լիներ, մենք կիմանայինք: Ոստիկանությունը դեռևս որևէ հայտարարություն չի տարածել: Ստացվում է, որ ամսի 17-ին գործ է հարուցվել, և մինչև այժմ ոչ մի տեղեկություն չկա»,- մեզ հետ զրույցում փաստում է տնօրեն Մելիքյանը։
Ինչ վերաբերում է քրեական գործին, վերջինիս «գոյությունն» առհասարակ տարօրինակ հարցականի տակ է հայտնվել։ Սկզբնաղբյուրում (Shamshyan.com) նշված էր, որ գործը հարուցվել է ոստիկանության Շենգավիթի հետաքննչական բաժանմունքում, դրան հաջորդեց տեղեկություն, որ գործը Կոտայքի մարզի հետաքննչական վարչությունում է: ArmSport-ի հարցմանն ի պատասխան Կոտայքի մարզի հետաքննչական վարչությունից հայտնեցին, որ չեն կարող ասել՝ իրենց մոտ այդպիսի գործ կա, թե ոչ: Որևէ մեկնաբանություն հրաժարվեց տալ նաև Ֆուտբոլի ֆեդերացիան՝ փաստարկելով, որ իրավասու չեն։ Այս պարագայում հրապարակված տեղեկատվության ձևակերպումը դառնում է անհասկանալի.
««Մասիս» ֆուտբոլային ակումբի մարզիկները և մարզամրցումների մասնակիցը նախնական համաձայնությամբ կանխորոշել են խաղի ելքը՝ ձեռնտու հաշվով, ինչի համար կատարվել են խաղադրույքներ, որի արդյունքում «Վիվառո Բեթինգ» բուքմեյքերական ընկերությանը պատճառվել է մոտ 1,5 մլն դրամի վնաս»:
Ուշագրավ է նաև այն, որ «Մասիս» ակումբի տնօրեն Արտակ Մելիքյանը մեզ հետ զրույցում փաստում է, որ «Տորպեդո»-«Մասիս» հանդիպումից հետո գլխավոր մարզիչ Սամվել Սարգսյանը, իր խոսքերով՝ առողջական խնդիրների պատճառով այլևս չի մասնակցում թիմի մարզումներին։
«Պայմանագիրը խզված չէ։ Իր սիրտը ստենտավորած է, չգիտեմ ակումբի ղեկավարները կորոշեն։ Իրեն ակումբից չեն հեռացրել, ոչ էլ ինքն է դուրս եկել»- պատմում է Մելիքյանը։
Արդյոք գլխավոր մարզիչ Սամվել Սարգսյանը առողջական խնդիրների պատճառո՞վ է դադարեցրել իր մասնակցությունը թիմի մարզումներին, թե՞ թիմում ոչ սպորտային զարգացումներն են հակասել իր սկզբունքներին։
ArmSport-ի աղբյուրների տեղեկությունների համաձայն՝ հանդիպումը, որի վրա կատարվել է խաղադրույք, սեպտեմբերի 6-ին կայացած Հայաստանի Գավաթի խաղարկության նախնական փուլի «Տորպեդո»-«Մասիս» մրցավեճն է: Հանդիպումն ավարտվել է «Տորպեդոյի» հաղթանակով՝ 3-0: Հաշիվը բացվել է 41-րդ րոպեին, 87-ին ինքնագոլ է գրանցվել, իսկ 3-րդ գոլը խփվել է ավելացված 4-րդ րոպեին։ Ինչպես հայտնի է, Հայաստանում Առաջին խմբի և Գավաթի խաղարկության հանդիպումների համար գործակիցներ սահմանում է միայն «Վիվառո Բեթինգ» բուքմեյքերական ընկերությունը:
Մեր ունեցած մյուս տեղեկության համաձայն՝ «Մասիսի» ֆուտբոլիստներից մեկն է կատարել խաղադրույք: Ըստ աղբյուրի, նախ այդ մասին իմացել են ակումբի աշխատակիցները, որոնք տեղեկությունը փոխանցել են ՀՖՖ: Ներքին քննարկումներից հետո որոշում է կայացվել հեռացնել ֆուտբոլիստին ակումբից: Այս մասին դեռևս ոչ մի պաշտոնական տեղեկություն չկա:
«Մասիս» ֆուտբոլային ակումբը սոցիալական կայքերում էջեր չունի: Մի փոքր ուշադրություն դարձնելով, նկատում ենք, որ Սամվել Սարգսյանը միակը չէ, որ բացակայում է թիմում։ Հայտացուցակներն ուշադիր ուսումնասիրելով նկատում ենք, որ վերոնշյալ հանդիպումից («Տորպեդո»-«Մասիս») հետո մյուս խաղերին չի մասնակցել և չկա ոչ մի հայտացուցակում 75 համարով հանդես եկող Ալեքսեյ Կուչինը:
Արդյոք, նա՞ է այդ ֆուտբոլիստը և խաղադրույքների այս պատմությունը նրա՞ շուրջ է զարգանում։ Ի դեպ, Կուչինը չի մասնակցել «Տորպեդոյի» հետ խաղին՝ մնալով պահեստայինների նստարանին: Կուչինի մասին տեղեկություններ գրեթե չկան. նա Ռուսաստանից է, 22 տարեկան:
Ֆուտբոլիստների և ֆուտբոլային ակումբների միջև կնքված պայմանագրի 2.1.13 կետը պահանջում է. մեջբերում.
«Չկատարել խաղադրույքներ և չմասնակցել որևէ շահումով խաղի, որում հաղթանակը կախված է ֆուտբոլին առնչվող իրադարձության վրա հասնելով»:
ՀՖՖ-ում գրանցված բոլոր ֆուտբոլիստների պայմանագիրն այդ կետը ներառում է: Ինչպես արդեն նշեցինք «Մասիս» ֆուտբոլային ակումբն իրավապահներից ծանուցում չի ստացել, սակայն տնօրեն Մելիքյանը հաստատում է, որ իրենց ակումբը պատրաստակամ է խնդրի բազմակողմանի լուսաբանմանը և նմանօրինակ դեպքերի կանխմանը։
«Եթե պարզվի ամեն ինչ, վճիռ կայացվի, մենք տվյալ ֆուտբոլիստի հետ կխզենք պայմանագիրը, այնուհետև ոստիկանությունը թող պարզի՝ ինչ հանցանք է կատարել ֆուտբոլիստը: Եթե պարզվի, որ մեր ֆուտբոլիստը գնացել է օրինակ՝ «Վիվառո» և խաղադրույք է կատարել, նա թիմից կհեռացվի: Ով հանցանք է գործել, էական չէ՝ ֆուտբոլիստ, թե ակումբի ղեկավար՝ պետք է պատասխան տա: Սպասելու ենք մեզ հետ կապ հաստատեն, հասկանանք ինչով կարող ենք համագործակցել Ոստիկանության հետ: Երբ կլինի որևիցե հայտարարություն, որոշում, մենք նույնպես հայտարարությամբ հանդես կգանք: Մենք դատապարտում ենք պայմանավորած խաղերի առկայությունը:
Առաջին խմբի հետ կապված խոսակցություններ կան,պետք է վերջ տալ այդ ամենին: Պայմանագրերում կետ կա, եթե որևէ աշխատակից խաղադրույք կկատարի, նա կհեռացվի ակումբից: Ես չեմ կարող ոչինչ բացառել, ոչ ոք չի կարող բացառել: Չեմ կարող ասել՝ մեր ակումբում մեղավոր կա՞, թե՞ ոչ. դա թող պարզի քննությունը: Հայկական ֆուտբոլում խոսակցությունները շատ են, առաջին տուրից սկսած խոսակցություններ են…»,- եզրափակում է մեզ հետ զրույցը Արտակ Մելիքյանը:
«Մասիս» ֆուտբոլային ակումբը Առաջին խմբի առաջնությունում 9 հանդիպումներից հետո 4 միավորով 15-րդ հորիզոնականում է, վերջին 3 հանդիպումներից երկուսում պարտվել է միևնույն 2:7 հաշվով, իսկ 10-րդ տուրում՝ 3:7:
Ակումբի ղեկավար կազմի անդամների մասին տեղեկությունները ևս քիչ են: Մելիքյանից տեղեկանում ենք, որ բաժնետերերը երկուսն են՝ Հայաստանի և արտասահմանի մեկական քաղաքացի:
«Նրանք հայկական ֆուտբոլի հետ կապված մարդիկ չեն: Կա համասեփականատեր, որը Մասիսի բնակիչ է, կա դրսից մարդ, որը ֆինանսավորում է»,- հայտնում է ակումբի տնօրենը:
Առաջին խմբի ակումբների շուրջ խոսակցություններն իսկապես շատ են, տեղեկություններն էլ՝ հակասական։ Հարուցվա՞ծ է քրեական գործ, թե՞ ոչ՝ պաշտոնապես չի հաստատվում։ Փաստ է սակայն, որ ֆուտբոլում հավանական բացասական երևույթները արդեն հայտնվել են իրավապահների ուշադրության կենտրոնում, ինչը հույս է տալիս, որ հետագա հնարավոր բացասական զարգացումները կանխելու շանսեր կան։
Արման Առաքելյան
