Ի տարբերություն վերջերս վաղաժամ ավարտված Ֆրանսիայի առաջնության, որին անդրադարձել էինք մեր շարքի նախորդ մասում, Գերմանիայում առաջիկա հանգստյան օրերին կմեկնարկի Բունդեսլիգայի մրցաշրջանը։
ArmSport-ը առաջարկում է ծանոթանալ Բունդեսլիգայում տիրող ներկայիս մրցաշարային իրավիճակին և փորձել հասկանալ, ինչպես կարող են դասավորվել հետագա իրադարձոթյունները։
⚽ Պայքար չեմպիոնության և Չեմպիոնների Լիգայի ուղեգրի համար
Դատելով մրցաշարային աղյուսակում տիրող իրավիճակից` կարելի է արդեն առանձնացնել այն թիմերին, որոնք կպայքարեն Չեմպիոնների լիգայի ուղեգրի համար․ դրանք 1-5 տեղերում տեղակայված թիմերն են։ Թիմերի միջև միավորների տարբերությունը չնչին է և լավագույն քառյակից դուրս կարող է մնալ նրանցից յուրաքանչյուրը։ Համենայն դեպս, այդ 5 թիմերից նվազագույնս մեկը, վստահորեն կարելի է ասել, որ արդեն իսկ ապահովել է իր մասնակցությունը Եվրոպա լիգայում (5-րդ և 6-րդ տեղեր), սակայն դրա մասին մի փոքր ուշ։
Ինչ վերաբերվում է չեմպիոնությանը․ իմ կանխատեսմամբ՝ արծաթե սկուտեղի համար կպայքարեն «Բավարիան», Դորտմունդի «Բորուսիան» և «ՌԲ Լայպցիգը»։ Իհարկե, Մյունխենգլադբախի «Բորուսիային» և «Բայերին» ևս պետք չէ անտեսել, բայց կարծում ենք, որ այդ երկու ակումբները միմյանց միջև կփորձենք վիճարկել ՉԼ-ի չորրորդ ուղեգիրը։ Բնականաբար, նրանցից անհաջողակը կուղևորվի Եվրոպա լիգա, իսկ ահա նշանակությամբ երկրորդ եվրագավաթային մրցաշարի մյուս ուղեգրի համար բավականին համառ ու հետաքրքիր պայքար է սպասվում։
«Շալկեն», «Վոլֆսբուրգը», «Ֆրայբուրգը» և Սարգիս Ադամյանի «Հոֆենհայմը» համառ պայքար կմղեն այդ բաղձալի երկրորդ ուղեգրի համար։ Չնայած, տեսականորեն, 10-15-րդ տեղերը զբաղեցնող ցանկացած թիմ կարող է անակնկալ մատուցել, սակայն, իրադարձությունների նման զարգացումը քիչ հավանական է։ Չնայած, մյուս կողմից էլ, «Այնտրախտից» և «Հերտայից» ամեն ինչ սպասելի է (ինչպես դրական առաջընթաց, այնպես էլ՝ հակառակը)։
⚽ Ի՞նչ է կատարվում «նկուղում»
Իսկ ահա մրցաշարային աղյուսակի «նկուղում» գտնվող թիմերին բավականին թեժ 9 հանդիպումներ են սպասվում։ Հիշեցնենք, որ առաջնության ավարտին մրցաշարային աղյուսակի վերջին երկու տեղերը զբաղեցրած թիմերը ուղիղ կուղևորվեն 2-րդ Բունդեսլիգա, իսկ 16-րդ տեղը զբաղեցրած թիմը շանս կստանա մնալ գերմանական ֆուտբոլային էլիտայում՝ ուժերը չափելով 2-րդ Բունդեսլիգայի երրորդ թիմի հետ։ Այս պահի դրությամբ, «Պադերբորնը» երևի թե գլխավոր անհաջողակն է թվում, իսկ ահա «Վերդերը», որին որոշակիորեն անսպասելի էր տեսնել մրցաշարային աղյուսակի այդ հատվածում, ամենայն հավանականությամբ կփորձի տեղերով փոխվել «Ֆորտունայի» հետ։ Հենց այս երեք ակումբներին էլ գլխավոր հավակնորդներն են՝ առաջնությունը լքելու։ Սակայն իրենց տեղը Բունդեսլիգայում տեսականորեն չեն ապահովել նույնիսկ 10-15-րդ տեղերը զբաղեցնող թիմերը, բայց դրա հավանականությունը քիչ է, որ նրանցից որևէ մեկը կնահանջի 17-րդ կամ 18-րդ հորիզոնական։ Սակայն, ֆուտբոլը անկախատեսելի խաղ է, իսկ մենք խոսում ենք հավանական սցենարների մասին միայն․․․
ArmSport-ի հերթական սկետչը նվիրված է Բունդեսլիգայի վերադարձին․
⚽ Լավագույնները
Բունդեսլիգայի լավագույն ռմբարկուների մրցավազքում առաջատարը․․․ իհարկե, Ռոբերտ Լևանդովսկին է, ով խփած 25 գնդակներով լավագույններից է թոփ-5 լիգաներում՝ զիջելով միայն Ա Սերիայի գլխավոր ռմբարկու Չիրո Իմոբիլեին, ով իր ակտիվում ունի 2 գոլ ավելի։ Ռոբերտին հետապնդում է Տիմո Վերները՝ 21 խփած գնդակներով։ Դե ինչ, հետաքրքիր մրցակցություն է սպասվում նաև ռմբարկուների մրցավազքում։ Եվ նաև չմոռանանք Էրլինգ Հոլանդին, ով պարազպես ֆենոմենալ արդյունավետությամբ է նշել իր նորամուտը Բունդեսլիգայում և ներկայումս իր հաշվին ունի 9 գնդակ․ սպասում ենք նրան ռմբարկուների ցուցակի թոփ 5-ում։
Բավականին լավ մրցաշրջան է անցկացնում Թոմաս Մյուլերը՝ ով իր հաշվին ունի 16 գոլային փոխանցում, իսկ դա․․․ լավագույն արդյունքն է թոփ լիգաներում։ Նա ապացուցում է, որ դեռևս հանդիսանում է Բունդեսլիգայի գրանդի առաջատարներից մեկը և դեռ կարող է շատ կարևոր դեր խաղալ թիմի առաջիկա հաջողություններում։
Չմոռանանք նաև Ջեյդոն Սանչոյին, ով ոչ միայն գնդակներ է բաժանում խաղընկերներին (15 գոլային փոխանցում, զիջում է միայն Մյուլերին), այլ նաև շատ հաճախ ինքն է նախընտրում «կլորին» ուղարկել մրցակցի դարպասը․ 14 խփած գնդակներն արդեն խոսում են Սանչոյի բավականին տպավորիչ վիճակագրության մասին։
Բունդեսլիգայի առաջիկա տուրի ժամանակացույցին կարող եք ծանոթանալ այստեղ։
Վար Բաբայան
Շարքի նախորդ մասերը
Ֆուտբոլիստների «արտահանումը» Բրազիլիայից մինչև Հայաստան
Աշխարհի ամենաթանկարժեք 10 դարպասապահները
Թոփ-5 լիգաների ամենաարդյունավետ ֆուտբոլիստների եռյակները
Թոփ լիգաների ամենահուսալի պաշտպանություն ունեցող 10 թիմերը
Գոլային փոխանցումների քանակով լավագույն ֆուտբոլիստները թոփ առաջնություններում
Թոփ-5 լիգաների ամենաարդյունավետ թիմերը
19-ամյա նորվեգացին նվաճում է Եվրոպան
Ձմեռային տրանսֆերային պատուհանի ամփոփումը՝ թվերով