Նախորդ անգամ մեր նոր՝ «Ֆուտբոլը՝ թվերով» շարքում, մենք Ձեզ ներկայացրեցինք թոփ-5 լիգաների ամենաարդյունավետ թիմերին։ Այս անգամ մեր դիտակետում կլինեն եվրոպական լավագույն առաջնությունների լավագույն ֆուտբոլիստները՝ գոլային փոխանցումների քանակով։
Հակիմ Զիեշ
«Այաքս»
12 գոլային փոխանցում
«Չելսիի» ապագա ֆուտբոլիստը շարունակում է հիանալի մրցաշրջան անցկացնել Էրեդիվիզիում։ Հուսանք՝ նույն արդյունավետությամբ նա կշարունակի իր կարիերան նաև Լոնդոնում։
Լեոնել Մեսսի
«Բարսելոնա»
12 գոլային փոխանցում
Մեսսին շարունակում է մնալ Լա լիգայի ամենաարդյունավետ ֆուտբոլիստը։ Եվ դա չի վերաբերվում միայն խփած գնդակներին․ նա չի մոռանում գոլային հնարավորություններ ստեղծել նաև իր թիմակիցների համար։
Լուիս Ալբերտո
«Լացիո»
12 գոլային փոխանցում
«Արծիվների» այս մրցաշրջանի առաջատարներից մեկը լավագույնն է Ա Սերիայում՝ գոլային փոխանցումների քանակով։
Տրենտ Ալեքսանդր-Առնոլդ
«Լիվերպուլ»
12 գոլային փոխանցում
«Լիվերպուլի» աջ պաշտպանը արդեն երկրորդ մրցաշրջանն է, ինչ անցկացնում է բավականին տպավորիչ վիճակագրությամբ։ Նկատենք, որ նա միակ պաշտպանն է մեր թոփում։ Տրենտը արդարացիորեն համարվում է իր դիրքում աշխարհում լավագույններից մեկը, և, թերևս, ամենաարդյունավետը՝ հակառակորդների դարպասապահներին տխրեցնելու գործում։
Քրիսթոֆեր Նկունկու
«ՌԲ Լայպցիգ»
12 գոլային փոխանցում
Ֆրանսիացի կիսապաշտպանը, ՊՍԺ-ում լինելով մեր այսօրվա հերոսներից մեկի ստվերում (ում կանրադառնանք ավելի ուշ), որոշեց փոխել ակումբային գրանցումը, և ներկա դրությամբ, կարելի է ասել՝ չսխալվեց։ Այժմ նա իր թիմում խաղում է գլխավոր դիսպետչերի դերում։
Ռուդ Վորմեր
«Բրյուգե»
14 գոլային փոխանցում
Այս ֆուտբոլիստը իր մեծ ներդրումն ունի իր թիմի հաջողություններում․ բելգիական թիմը վերջին տարիներին ստանձնել է ներքին առաջնության դոմինանտի դերը։
Դուշան Տադիչ
«Այաքս»
14 գոլային փոխանցում
Հատկանշական է, որ «Այաքսը» միակ ակումբն է, որը երկու ներկայացուցիչ ունի մեր ցուցակում։ Տադիչը և արդեն վերը նշված Զիեշը կազմակերպում են իրենց թիմի խփած գնդակների մոտ 1/3-ը։
Անխել Դի Մարիա
ՊՍԺ
14 գոլային փոխանցում
Ահա և այն ֆուտբոլիստը, ում ստվերում է գտնվում Նկունկուն։ Փարիզյան ակումբի առաջատարներից մեկը լավագույնն է գոլային փոխանցումների քանակով Լիգա 1-ում և լավագույններից մեկը՝ Եվրոպայում։
Ջեյդոն Սանչո
Դորտմունդի «Բորուսիա»
15 գոլային փոխանցում
Իսկ ահա Սանչոն ոչ միայն գնդակներ է բաժանում խաղընկերներին, այլ նաև շատ հաճախ ինքն է նախընտրում «կլորին» ուղարկել մրցակցի դարպասը․ 14 խփած գնդակներն արդեն խոսում են Սանչոյի բավականին տպավորիչ վիճակագրության մասին։
Կևին Դե Բրույնե
«Մանչեսթեր Սիթի»
16 գոլային փոխանցում
Նախանցած մրցաշրջանում բելգիացին արդեն դարձել էր ԱՊԼ-ի ամենաարդյունավետ ֆուտբոլիստը մեր այսօրվա կատեգորիայում։ Այն ժամանակ նա դարձել էր 16 գոլային փոխանցման հեղինակ։
Նույն թվերն այս մրցաշրջանում են, սակայն առաջնությունը դեռ չի վերջացել, և շուտով, երբ հայտնի պատճառներով դադարեցված առաջնությունը կրկին կվերսկսվի, Դե Բրույնեն կարող է թարմացնել իր իսկ ցուցանիշը․․․
Թոմաս Մյուլեր
«Բավարիա»
16 գոլային փոխանցում
Թոմաս Մյուլեր․ այս մրցաշրջանում գերմանացին պարզապես փայլում է։ Նա ապացուցում է, որ դեռևս հանդիսանում է Բունդեսլիգայի գրանդի առաջատարներից մեկը և դեռ կարող է շատ կարևոր դեր խաղալ թիմի առաջիկա հաջողություններում։
Վար Բաբայան
Շարքի նախորդ մասերը
Թոփ-5 լիգաների ամենաարդյունավետ թիմերը
