«Ֆուտբոլը՝ թվերով» շարքում այս անգամ ArmSport-ը ձեր ուշադրությանն է ներկայացնում աշխարհի ամենաթանկարժեք դարպասապահների լավագույն տասնյակը։
Ֆուտբոլիստների տրանսֆերային արժեքները հիմնված են հեղինակավոր Transfermarkt կայքի տվյալների վրա։
9-10․ Վոյցեխ Շչեսնի
🇵🇱 Լեհաստան
«Յուվենտուս»
32 մլն եվրո
Երբ լեհ դարպասպահը տեղափոխվեց թուրինյան ակումբ, շատերը վերապահումով էին մոտենում այդ տրանսֆերին։ Սակայն ժամանակի ընթաքում նա ապացուցեց բոլորին, որ բարձրակարգ դարպասապահ է և արժանի է լինել իտալական գրանդի N1-ը։
9-10․ Կեպա
🇪🇸 Իսպանիա
«Չելսի»
32 մլն եվրո
Ինչ վերաբերվում է բասկ դարպասապահին, ապա լոնդոնյան ակումբում նրա ապագան մշուշոտ է՝ չնայած որ բարձրակարգ մասնագետ է իր գործում։ Դա առաջին հերթին կապված է ոչ ֆուտբոլային գործոններով․ անընդհատ տարաձայնություններ մարզիչների հետ, ոչ բավարար վարք և այլն։ Պատահական չէ, որ նրան որպես փոխարինող դիտարկում են մեր մյուս հերոսին։
8. Անդրե Օնանա
🇨🇲 Կամերուն
«Այաքս»
36 մլն եվրո
Այո՛, հենց կամերունացի դարպասապահին է «Չելսին» դիտարկում որպես Կեպային փոխարինող։ Սակայն «արիստոկրատները» այդ հարցում լուրջ մրցակից ունեն՝ ի դեմս «Բարսելոնայի»։ Ժամանակն է արդեն, որ Անդրեն իր ուժերը փորձի որևէ թոփ լիգայում․․․
7. Դավիդ դե Խեա
🇪🇸 Իսպանիա
«Մանչեսթեր Յունայթեդ»
40 մլն եվրո
Ժամանակին իսպանացին համարվում էր ուժեղագույն դարպասապահներից մեկն աշխարհում։ Այժմ էլ նա մնում է որպես այդպիսին, սակայն, եկեք խոստովանենք՝ Դավիդը մի փոքր զիջել է իր դիրքերն այդ առումով։ Միգուցե «Ռեալ Մադրիդ» չստացված տրանսֆե՞րն է իր հետքը թողել այդ ամենում, միգուցե՝ ՄՅՈւ-ի անհաջող մրցաշրջաննե՞րը վերջին տարիներին։
6. Տիբո Կուրտուա
🇧🇪 Բելգիա
«Ռեալ Մադրիդ»
48 մլն եվրո
Իսկ եթե առաջընթաց է գրանցել, ապա դա Բելգիայի հավաքականի դարպասի պաշտպանն է։ Մադրիդյան ակումբին չհաջողվեց ձեռք բերել մեր նախորդ հերոսին, փոխարենը հնարավորություն ստացավ Կուրտուան։ Ճիշտ է, երբեմն բելգիացու խաղը չես անվանի աստղային, սակայն նա մնում է ամենաբարձրակարգ դարպասապահներից մեկը թոփ լիգաներում։
5. Ջանլուիջի Դոնարումա
🇮🇹 Իտալիա
«Միլան»
49,5 մլն եվրո
Ներկա դրությամբ նրա տրանսֆերային բարձր արժեքն առաջին հերթին պայմանավորված է նրա տարիքով։ Բայց ամենևին չենք ցանկանում նվազեցնել նաև նրա խաղային հատկանիշները։ Ջանին դեռ երիտասարդ է, իսկ դարպասապահները, ի տարբերություն մյուս խաղային օղակների ներկայացուցիչների, մի փոքր ավելի ուշ տարիքում են հասնում իրենց խաղային պիկին։ Սպասենք, իտալացու մոտ դեռ ամեն ինչ առջևում է։
4. Էդերսոն
🇧🇷 Բրազիլիա
«Մանչեսթեր Սիթի»
56 մլն եվրո
Էդերսոնը շատ վառ սկսեց իրեն դրսևորել Եվրոպայում հենց մեկնարկային մրցաշրջանից, և զարմանալի չէ, որ մեր թոփում իր տեղը պետք է գտներ մոլորակի ամենաթանկարժեք կազմ ունեցող ակումբի հիմնական դարպասապահը։
2-3․ Մարկ-Անդրե տեր Շտեգեն
🇩🇪 Գերմանիա
«Բարսելոնա»
72 մլն եվրո
Կատալոնական ակումբի երկրպագուների մեծամասնությունը, ինչպես նաև ակումբի ղեկավարությունը, շատ են ցանկանում, որ գերմանացի դարպասպահը շարունակի իր ելույթներն իրենց սիրելի թիմում։ Սակայն տեր Շտեգենը կարծես թե այլ կարծիք ունի և դեռևս չի շտապում երկարաձգել պայմանագիրը կատալոնացիների հետ։ Սպասենք մինչև մրցաշրջանի ավարտ։ Համենայն դեպս, ցանկացած թիմի համար դժվար կլինի բաժանվել նման բարձրակարգ դարպասպահից։ Չնայած, ստիպած եմ կրկնվել, բայց «Բարսելոնան» վերջերս սկսել է ակտիվորեն հետաքրքվել նաև մեր վերը նշված հերոսներից մեկով՝ Անդրե Օնանայով։
2-3. Ալիսոն
🇧🇷 Բրազիլիա
«Լիվերպուլ»
72 մլն եվրո
Հատկանշական է, որ մեր ցուցակում ընդգրկված են Իսպանիայի և Բրազիլիայի երկուական ներկայացուցիչներ։ Եվ լավագույն քառյակում միանգամից երկու բրազիլացիներ են։ Վաղուց Բրազիլիայի հավաքականում միաժամանակ նման բարձրակարգ դարպասապահների դուետ չէինք տեսել․․․
1. Յան Օբլակ
🇸🇮 Սլովենիա
«Աթլետիկո Մադրիդ»
80 մլն եվրո
Իսկ ահա Օբլակը, իր ազգանվանը համապատասխան, գտնվում է մեր թոփի ամենավերին հորիզոնականում։ Բոլորս էլ ունենք մեր սուբյեկտիվ կարծիքը ամենաուժեղ կամ ամենաթանկարժեք դարպասապահների հարցում, սակայն, ամենևին չլինելով մադրիդյան ակումբի երկրպագու, ես ևս կարծում եմ, որ սլովենացին, հաշվի առնելով վերջին մրցաշրջաններում ցուցադրած կայուն ելույթները, ներկա դրությամբ արժանիորեն է համարվում ամենաթանկարժեքն իր գործընկերների շրջանում։ Իսկ Դուք ի՞նչ եք կարծում․․․
Վար Բաբայան
Շարքի նախորդ մասերը
Թոփ-5 լիգաների ամենաարդյունավետ ֆուտբոլիստների եռյակները
Թոփ լիգաների ամենահուսալի պաշտպանություն ունեցող 10 թիմերը
Գոլային փոխանցումների քանակով լավագույն ֆուտբոլիստները թոփ առաջնություններում
Թոփ-5 լիգաների ամենաարդյունավետ թիմերը
