«Արարատ-Արմենիայի» գլխավոր մարզիչ Վարդան Մինասյանն իր թիմի հետ առաջին անգամ Հայաստանի Սուպերգավաթակիր դառնալուց հետո ասում է՝ հաճելի է տիտղոս նվաճելը, բայց ընդգծում՝ թիմում դեռ հոգեբանական խնդիրներ կան Եվրոպա լիգայից դուրս մնալուց հետո․
«Հաճելի է տիտղոս նվաճելը․ այնպես չէ, որ սա մեզ համար ինքնանպատակ էր, բայց շնորհավորում եմ մեր թիմին։
Ես մեկ անգամ արդեն ասել եմ, որ հույս ունեմ՝ մենք հոգեբանորեն դուրս ենք եկել Եվրոպա լիգայում կրած պարտությունից, բայց դեռ տեսնում եմ, որ դրվագներով դեռ իներտ ենք։ «Դյուդելանժի» հետ անցկացրած պատասխան խաղը թիմի վրա մեծ ազդեցություն է թողել։ Իրոք դժվար է, երբ դու շատ մոտ ես լինում ու պայքարից դուրս ես մնում 11-մետրանոցներով։ Ես, իհարկե թիմի տղաներին հասկանում եմ, բայց որքան՝ արագ մոռանանք, այնքան՝ ավելի լավ մեզ համար։
Իսկ այսօրվա խաղում դրվագներով էր ստացվում այն, ինչ մենք ցանկանում էինք»,- խոստովանում է Վարդան Մինասյանը։
Հայաստանի Սուպերագավաթի համար խաղի մեկնարկային կազմում Մինասյանը 8 փոփոխություն էր կատարել, չնայած բազմիցս նշում է՝ իր համար չկան մեկնարկային ու պահեստային խաղացողներ։ Մարզիչը լրագրողների հետ հանդիպման ժամանակ ասել է՝ կոնկրետ որ դիրքերից է համեմատաբար գոհ և դժգոհ մնացել․
«Խաղաժամանակ տվեցի այն խաղացողներին, որոնք անհամեմատ ավելի քիչ էին խաղացել մինչ այս։ Երբեք չեմ մտածել, որ սա իմ առաջին կազմն է, սա՝ երկրորդ։ Ճիշտ է, երիտասարդ խաղացողներ կան, ովքեր դեռ պետք է կայանան ու ստաբիլության խնդիր ունեն, բայց երևի՝ 18-20 ֆուտբոլիստ կա, ովքեր կապ չունի, թե երբ կխաղան։ Բայց վտանգն այն է, որ 3-4 խաղի չմասնակցելու դեպքում՝ ընկնում են խաղային ռիթմից։ Բայց ես բոլորին էլ շանս տալու եմ՝ կախված մրցակցից, գրաֆիկից։ Հնարավորինս պետք է փոփոխություններ անեմ»։
«Արարատ-Արմենիայի» կազմում այսօր իր նորամուտն է նշել կիսապաշտպան Հովհաննես Հարությունյանը, որն իր նոր թիմի կազմում դարձել է գոլային փոխանցման հեղինակ և նվաճել առաջին տիտղոսը․
«Հարությունյանը որակապես շատ բարձր ֆուտբոլիստ է, պրոֆեսիոնալ ֆուտբոլիստի համար ամենակարևորն իր ուղեղն է։ Դրանից է կախված, թե որքան հեռու կգնա, միայն որակները բավական չեն։ Այսօր երևաց, որ Հովհաննեսը վաղուց չէր խաղացել,չնայած գոլային փոխանցում կատարեց։ Վաղըն Առաջին խմբի հանդիպում ունենք, նա մասնակցելու է մեր երկրորդ թիմի խաղին։ Քիչ-քիչ կխաղա նաև հիմնական թիմում»,- եզրափակել է իր խոսքը Վարդան Մինասյանը։
