Եթե ինչ-որ մեկը տարեսկզբին ասեր, որ սեպտեմբերի վերջին թենիսի աշխարհը պատրաստվելու է Ռոլան Գարոսին, անպայման կհետևեր պատասխան, որ նա ինչ-որ բան շփոթում է։ Բայց սա 2020 թվականն է, ու այստեղ ամեն ինչ հնարավոր է։ Մայիսի վերջին ու հունիսի սկզբին նախատեսված Grand Slam-ը դեռևս մարտին տեղափոխվեց աշուն այն հույսով, որ համավարակը նահանջած կլինի։
Եվրոպայում պանդեմիայի երկրորդ ալիքն է սկսվել, սակայն մարդիկ սկսել են սովորել ապրել վիրուսի հետ։ Այո՛, միայն դրա շնորհիվ հնարավոր եղավ Միացյալ Նահանգներում անցկացնել US Open-ը, իսկ հիմա Փարիզում՝ Ռոլան Գարոսը։ Սա ամենատհաճ պայմաններով մրցաշարն է լինելու թենիսիստների համար, ինչպես Միացյալ Նահանգներում, բայց ունենք այն, ինչ ունենք։
Նոր պայմաններ ու քիչ թվով հանդիսականներ
Եթե նկատեցիք, վերնագրում օգտագործել ենք «ուրիշ Ռոլան Գարոս» եզրույթը։ Եվ իսկապես դա այդպես է։ Սա բոլորովին այլ Ռոլան Գարոս է։ Բացատրեմ, թե ինչու։ Հակահամաճարակային իրավիճակի բարդություններից զատ, կան բազմաթիվ երևույթներ, որոնք տարբեր են Փարիզում` համեմատած մարտին։ Սիրո մայրաքաղաքում հիմա անհամեմատ ավելի ցուրտ է, քան մայիսին կամ էլ հունիսին։ Սրա շնորհիվ գնդակը շատ ավելի դանդաղ է ընթանում ու ավելի ծանր է։ Այս մասին խոսեց մրցաշարի 12-ակի չեմպիոն Ռաֆայել Նադալը․
«Գնդակը շատ ծանր է ու չափազանց դանդաղ է ընթանում։ Բարդ պայմաններ են, բայց ես եկել եմ այստեղ պայքարելու համար»։
Արագ գնդակով խաղալ սիրող Ռաֆային, իհարկե, դժվար է լինելու։ Նա նմանատիպ խնդիրների առերեսվեց նաև նախորդ շաբաթ ու Հռոմի Մասթերսում պարտվեց Դիեգո Շվարցմանին։
Հանդիսականների մասով կա հակասական զգացողություն։ Առաջին հայացքից թենիսային լրահոսին քիչ հետևողները կուրախանան՝ կարդալով երկրպագուների ներկայության մասին։ Սակայն պետք է արձանագրել, որ սկզբում Ֆրանսիայի թենիսի ֆեդերացիան ցանկանում էր յուրաքանչյուր խաղային օր 10 հազար երկրպագուի ներկայություն «Ֆիլիպե Շետրիեում», «Սյուզան Լենգլենում» և մյուս կորտերում։ Վարակի նոր աճի պայմաններում այս թիվը նվազեց՝ հասնելով 5000-ի։ Հիմա կա նոր որոշում․ 1000 երկրպագու «Ֆիլիպե Շատրիեում»։ Մյուս կորտերի մասով ամեն ինչ մշուշոտ է։ Սակայն հավանաբար կլինեն սակավ թվով երկրպագուներ նաև մյուս կորտերում։
Գլխավոր կորտը վերջապես տանիք ունի
Ռոլան Գարոսի կենտրոնական կորտը մինչև այս տարվա մրցաշարը տանիք չուներ։ Թենիսում սա առանձնակի նշանակություն ունի, քանի որ խաղերը չեն կարող շարունակվել անձրևի ժամանակ։ Այս տարի այդ խնդիրը վերջապես լուծվել է։ «Ֆիլիպե Շետրիեի» անվան կորտն արդեն տանիք ունի։
Սա նշանակում է, որ անձրևային աշնան ընթացքում շատ հաճախ գլխավոր խաղերը կարող են անցնել փակ տանիքի պայմաններում։ Սա հավելյալ մարտահրավեր է լինելու թենիսիստների համար։
Խոսենք բուն մրցաշարի մասին։ Թենիսիստներին կարելի է բաժանել երկու մասի․
- նրանք, ովքեր խաղացել են US Open-ում ու հիմա էլ եկել են Փարիզ,
- նրանք, ովքեր չեն խաղացել US Open-ում ու միանգամից պատրաստվել են Ռոլան Գարոսին։
Միացյալ Նահանգների բաց առաջնությունում հաջողություն գրանցած խաղացողների մեծ մասն այստեղ է։ Տղամարդկանց մենախաղի չեմպիոն Դոմինիկ Տիմը գրունտի վրա առաջին խաղն անցկացնելու է հենց Ռոլան Գարոսում։ Նա իսկապես ժամանակ չուներ Հռոմում կամ էլ Համբուրգում խաղալու համար։
Նույնը կարելի է ասել Սաշա Զվերևի մասին։ Եթե համեմատենք կանանց մենախաղի եզրափակիչի հետ, ապա այստեղ փոքր-ինչ այլ իրավիճակ է։ Վիկա Ազարենկան խաղաց Հռոմում ու խաղալու է Փարիզում։ Մինչդեռ Նաոմի Օսական հրաժարվեց փոխել մակերևույթն ու չի մասնակցի Ռոլան Գարոսին։
Իսկապես հարդից 2-3 շաբաթվա ընթացքում գրունտին տեղափոխվելը չափազանց բարդ գործընթաց է, որից օրինակ խուսափեց Նադալը՝ հրաժարվելով US Open-ից։ Ունենք Ջոկովիչի օրինակը, որը սահուն անցավ կորտերի փոփոխության միջով ու հաղթեց Հռոմում։ Սակայն չմոռանանք, որ Նոլեն US Open-ում պայքարից դուրս մնաց բավականին շուտ ու ավելի շատ ժամանակ ունեցավ նախապատրաստման համար, քան Տիմն ու Զվերևը։
Վիճակահանության մասին խոսելով՝ չենք կարող չառանձնացնել տղամարդկանց մենախաղի առաջին շրջանի երկու ֆանտաստիկ զույգեր։ US Open 2020-ի չեմպիոն Դոմինիկ Տիմը մրցելու է US Open 2014-ի չեմպիոն Մարին Չիլիչի հետ, իսկ մյուս զույգում Մեծ սաղավարտի միանգամից 6 տիտղոս է․ Ստեն Վավրիկան ընդդեմ Էնդի Մարեյի։ Պոպկորն ու լիքը արևածաղիկ՝ թենիսի սիրահարներին այս խաղերում։
Տղամարդկանց մենախաղի վիճակահանությունում տեսանելի է, որ Նովակ Ջոկովիչին բավականին հեշտ ցանց է բաժին հասել։ Համենայն դեպս, այդպես են գրում թե՛ մասնագետները, թե՛ երկրպագուները։ Մինչդեռ ներքևում ամեն ինչ ավելի ծանր է։ Նադալն ու Տիմը կարող են հանդիպել կիսաեզրափակիչում։ Այստեղ են նաև Զվերևը, Մոնֆիսը, Վավրինկան։
Կանանց մենախաղում գլխավոր ֆավորիտը Սիմոնա Հալեպն է։ Նա այն թենիսիստների թվին է պատկանում, որոնք չեն մասնակցել US Open-ին ու ամիսներ շարունակ պատրաստվել են Ֆրանսիայի բաց առաջնությանը։ Հալեպը անկասելի էր նաև Հռոմի մրցաշարում։
Լավ շանսեր ունի նաև Էլինա Սվիտոլինան։ Նա Մոնֆիսի հետ նույնպես պատրաստվում էր Ռոլան Գարոսին։
Այս իմաստով ավելի մեծ են նրանց շանսերը ենթադրենք Սերենա Ուիլյամսի նկատմամբ, որը խաղացել է US Open-ում ու եկել է Փարիզ։ Գրունտը Սերենայի թերևս ամենաանցանկալի մակերևույթն է, բայց և այնպես նա կռվելու է այստեղ։
Հուսանք, որ Ռոլան Գարոսի այսպիսի անցկացումը վերջինը կլինի։ Հաջորդ տարի մրցաշարը կվերադառնա իր բնականոն ռիթմին, կանցկացվի գարնանը, երկրպագուները կվերադառնան կորտ՝ դիտելու իրենց սիրելի մարզիկների խաղը։ Իսկ թե ինչ է պատրաստել Ռոլան Գարոս-2020-ը կիմանանք առաջիկա երկու շաբաթների ընթացքում։
Արամ Սահակյան