Անցյալ ամառ «Ինտերի» գործադիր տնօրեն Բեպե Մարոտան ասել էր, որ միլանյան ակումբը Ռաջա Նաինգոլանի կարիքը չունի: Շատ ակումբներ ցանկանում էին տեսնել բելգիացուն իրենց կազմում, բայց նա ընտրեց համեստ «Կալյարին»:
Պարզվել է, որ նա դա արել էր հանուն իր կնոջ՝ Կլաուդիայի. վերջինս ծնվել է Սարդինիայում (Կալյարին կղզու մայրաքաղաքն է):
Կլաուդիան խոստովանել էր, որ ինքը կրծքագեղձի քաղցկեղ ունի: Անցել է մեկ տարի, և Instagram-ում նա կիսում է իր ուրախությունը. քիմիաթերապիայի կուրսը հաղթահարել է հիվանդությունը:
«Կներեք, բայց ես պետք է նշեմ իմ հաղթանակը: Շնորհակալություն, շնորհակալություն և կրկին շնորհակալություն նրանց, ովքեր այս մեկ տարվա ընթացքում, այս կամ այն քիմիաթերապիայի միջև, հավատացին ինձ: Նրանք, ովքեր օգնեցին ինձ, շեղեցին ինձ այդ խնդրից և նրանք, ովքեր սովորեցրեցին ինձ հավատալ ինքս իմ ուժերին»:,- գրել է Կլաուդիան։
Քաղցկեղի մասին Կլաուդիան իմացել էր 2019 թվականին։ Նա և Ռաջան ամուսնացել են 2011 թվականին և ունեն երկու դուստր։
Ռաջան պատրաստ էր ամեն ինչ անել կնոջ հարմարավետության համար, քանի որ հիվանդության պատճառով նա արդեն կորցրել էր իր սիրելիներին. 2010-ին Նաինգոլանի մայրը մահացավ քաղցկեղի պատճառով: Նրա հայրը լքել էր ընտանիքը, և Ռաջայի մայրը միայնակ մեծացրել էր տղային, նրա երկվորյակ քրոջը և երեք եղբայրներին:
Հենց նրա մայրն էր, ով Ռաջային խորհուրդ է տվել զբաղվել ֆուտբոլով. նա հավատում էր, որ սա աղքատությունից դուրս գալու լավագույն միջոցն է: «Մայրիկս իմ կյանքի ամենակարևոր անձնավորությունն էր», — ասել էր Նաինգոլանը «Ռոմային» միանալուց հետո: «Նա ինձ սովորեցրեց չհանձնվել և պայքարել մինչև վերջ իմ երազանքի համար: Երբ նա մահացավ, ես նրա անունը դաջեցի իմ մարմնի վրա»:
Նոր մրցաշրջանից առաջ Նաինգոլանը հնարավորություն ուներ կրկին հանդես գալ «Կալյարիում», բայց «Ինտերը» հրաժարվեց նրան նորից վարձակալության տալ։ Լրագրող Ֆաբրիցիո Ռոմանոն հայտնում է, որ բելգիացին 2020/21 մրցաշրջանը կանցկացնի միլանյան ակումբում:
Դե ինչ, Ռաջայի՝ «Կալյարի» տեղափոխվելու գեղեցիկ պատմությունն ավարտված է:
