Մադրիդի «Ռեալը» մտադիր չէ հեշտությամբ բաժանվել Վինիսիուս Ժունիորից, սակայն բրազիլացի հարձակվողի հնարավոր տրանսֆերի համար արդեն հստակ ֆինանսական շեմ է սահմանել։
Ինչպես El Chiringuito-ի եթերում հայտնել է իսպանացի հայտնի լրագրող Խոսեպ Պեդրերոլը, մադրիդյան ակումբը ֆուտբոլիստին չի վաճառի 150 միլիոն եվրոյից պակաս գումարի դիմաց։
«Նվազագույնը 150 միլիոն եվրոյից ավելի կլինի։ Վինիսիուսը 150 միլիոն եվրոյից պակաս գումարով չի վաճառվի, դա անհնար է։ Պետք է հստակ հասկանալ՝ «Ռեալը» նրան վաճառքի չի հանել։ Այլ հարց է, եթե ինքը՝ ֆուտբոլիստը, ցանկանա հեռանալ։ Այդ դեպքում ակումբը նրան 150 միլիոնից պակաս գումարով բաց չի թողնի»,- նշել է Պեդրերոլը։
Լրագրողը նաև հաստատել է, որ Լոնդոնի «Արսենալը» շարունակում է հետևել բրազիլացու շուրջ ստեղծված իրավիճակին։ Այնուամենայնիվ, այս պահին պաշտոնական առաջարկ չկա, իսկ ձմեռային տրանսֆերային պատուհանի ընթացքում անգլիական ակումբի կողմից քայլերը քիչ հավանական են համարվում։
«Ռեալում» Վինիսիուսի ապագայի շուրջ քննարկումները պայմանավորված են նաև հարձակման գծում աճած մրցակցությամբ։ Բացի Կիլիան Մբապեից, Ռոդրիգոյից և Էնդրիկից, վերջին շրջանում իրեն լավ է դրսևորում նաև երիտասարդ իվուարցի Յան Դիոմանդեն՝ լուրջ մրցակցություն ստեղծելով բրազիլացու համար։
Հիշեցնենք, որ 26-ամյա Վինիսիուսը 2026/27 մրցաշրջանում բոլոր մրցաշարերում անցկացրել է 12 հանդիպում՝ դառնալով 1 գոլի և 3 գոլային փոխանցման հեղինակ։ Նրա երկարաժամկետ պայմանագիրը «Ռեալին» ամուր դիրքեր է ապահովում հնարավոր բանակցություններում։


























































