«Մանչեսթեր Յունայթեդի» նորանշանակ գլխավոր մարզիչ Մաուրիսիո Պոչետինոն ակումբի պաշտոնական հեռուստաալիքին տված առաջին ծավալուն հարցազրույցում ներկայացրել է իր տեսլականն ու առաջնահերթությունները։
Արգենտինացի մասնագետը վստահ է, որ ճգնաժամից դուրս գալու բանալին ֆուտբոլիստների հոգեբանական ազատությունն ու նոր մշակույթի ձևավորումն է։
«Սխալ է կենտրոնանալ միայն ներկայիս բարդ իրավիճակի վրա. մենք պետք է տեսնենք այս ակումբի ներուժը։ Այժմ մեր գլխավոր խնդիրն է աշխատել ֆուտբոլիստների հետ և թեթևացնել նրանց վրա եղած ճնշումը։ Ճնշումն ու պատասխանատվությունը պետք է էներգիա հաղորդեն, հակառակ դեպքում դրանք չափազանց ծանր բեռ են դառնում։ Խաղացողները պետք է կարողանան ազատ արտահայտել իրենց տաղանդը»,- նշել է Պոչետինոն։
Մասնագետն ընդգծել է, որ պատրաստվում է զրոյից կառուցել սեփական ֆուտբոլային փիլիսոփայությունը և չի մեղադրում ֆուտբոլիստներին թիմի անհաջողությունների համար.
«Մշակույթի ձևավորումն ամենակարևորն է։ Պետք է ստեղծենք հստակ սովորություններ ու սկզբունքներ, որպեսզի յուրաքանչյուր խաղի դուրս գանք հաղթելու պատրաստակամությամբ։ Լավագույն կազմը, որը կարող ենք ունենալ, հենց այն ֆուտբոլիստներն են, որոնք հիմա մեր տրամադրության տակ են։ Մենք չենք կարող մեղադրել որևէ մեկին. պետք է սիրենք ու աջակցենք նրանց»։
Արգենտինացու նորամուտը կկայանա նոյեմբերի 22-ին՝ սկզբունքային մրցակից «Լիվերպուլի» դեմ արտագնա խաղում։ Չնայած մրցաշարային ծանր դիրքին՝ Պոչետինոն մարտական է տրամադրված.
«Մենք պետք է գնանք «Էնֆիլդ» հաղթելու, համարձակ լինելու և «Մանչեսթեր Յունայթեդ» լինելու մտադրությամբ։ Պետք է խաղանք առանց վախի և մարտահրավեր նետենք շատ ուժեղ մրցակցին»։
Հիշեցնենք, որ Պոչետինոն «կարմիր սատանաների» ղեկին փոխարինել է Մայքլ Քերիկին՝ թիմին միանալով ԱՄՆ-ի հավաքականում աշխատանքն ավարտելուց անմիջապես հետո։ Նա թիմն ընդունել է խորը ճգնաժամի պայմաններում. Պրեմիեր լիգայի մեկնարկային 10 տուրերից հետո «Մանչեսթեր Յունայթեդը» վաստակել է ընդամենը 8 միավոր և գտնվում է 18-րդ հորիզոնականում՝ անկման գոտում։




























































