Նոյեմբերի 12-ին Հայաստանի ազգային հավաքականը ՈՒԵՖԱ-ի Ազգերի լիգայի խաղարկության C2 խմբի նախավերջին տուրի շրջանակում Երևանի Վազգեն Սարգսյանի անվան «Հանրապետական» մարզադաշտում ընդունել էր Կիպրոսի ընտրանուն։ Հանդիպումն ավարտվեց ոչ–ոքի՝ 1–1 հաշվով։ Հանդիպման մանրամասները՝ ԱՅՍՏԵՂ։
Հանդիպման արդյունքը մեկնաբանել է Հայաստանի հավաքականի գլխավոր մարզիչ Եղիշե Մելիքյանը․
«Ասեմ, որ պատրաստվել էինք, վերլուծել էինք ու տղաները ապրեն․ այն ծրագրերը, որ մենք ունեինք, իրենք տարան դաշտ և կարողացանք շատ լավ օգտագործել այն, ինչ որ պատրաստել էինք, ծրագիրն աշխատեց, մենք շատ լավ գրոհային ֆուտբոլ էինք ցույց տալիս, պատրաստվել էինք դրան, որ Կիպրոսը կխաղա երկրորդ համարով և մեզ մոտ երրորդ գոտում շատ լավ ստացվում էր սուր խաղալ և վտանգներ ստեղծել։ Այո, չստացվեց այնպես, որ մենք կարողանայինք հաղթենք, բայց շատ վտանգավոր էինք մրցակցի համար:
Ամենակարևորը՝ թիմը հասկանում է, թե ինչ է անում: Շատ եմ ափսոսում ու տա Աստված, որ վնասվածքներ ունեցող ֆուտբոլիստները վերականգնվեն ու հետ գան, ու մենք միասին կունենանք ավելի լավ, ուժեղ թիմ, ավելի լավ արդյունք կլինի: Ես տեսնում եմ, որ թիմը հասկանում է՝ ինչ անի: Մի քիչ պետք է ուժեղացնել, այն տղաները, որ պետք է գան միանան և ամեն ինչ լավ կլինի: Բոլորից շատ գոհ եմ` մեկնարկային կազմից և փոխարինողներից»,– ասել է Մելիքյանը հետխաղյա մամուլի ասուլիսի ժամանակ։
Շաղոյանի ու Թիկնիզյանի համագործակցության , ակումբների մարզիչների մասին․
«Դուք տեսաք՝ Ժիրայր Շաղոյանը ինչ լավ խաղաց։ Թիկնիզյանը միշտ է լավ խաղում, իսկ Շաղոյանը ոչ ստաբիլ․ լինում է լավ խաղ, լինում է՝ վատ։ Ամեն մարզիչ ունի իր մոտեցումը, մեթոդիկան՝ ինչ անի, որ ֆուտբոլիստը կարողանա ավելացնի։ Երբ ես ակումբում էի աշխատում, ունեի կոնֆլիկտ ֆեդերացիայի հետ և քննադատում էի։ Այդ ժամանակ, և Պետրակովի, և Կապառոսի ժամանակ, եղել են և լավ խաղեր, և վատ։ Ես երբեք, ունեի առիթներ, բայց երբեք չեմ մտել ազգային հավաքականի դաշտ որպես ակումբի մարզիչ, երբեք ինձ թույլ չեմ տվել դա, իմանալով, որ հավաքականում կա գլխավոր մարզիչ։ Խորհուրդ կտամ բոլոր ակումբների մարզիչներին զբաղվել իրենց գործով․ ես երբեք չեմ մեկնաբանում ակումբների աշխատանքը, քանի որ այնտեղ կան մարզիչներ։ Մեկ անգամ է եղել, որը «Նոայի» հետ կապված է եղել, ցանկացել եմ մի բան ասել և շատ զգույշ բարձրացրել եմ իմ հարցը։ Մենք միմյանց շատ լավ հասկացել ենք։
Խորհուրդ եմ տալիս և հորդորում, հանձինս «Արարատ–Արմենիայի» մարզչի, թող քիթը մյուս անգամ չմտցնի իմ գործերի մեջ, թող զբաղվի իր գործերով։ Ես եմ գլխավոր մարզիչը ու թող բոլորը իմանան՝ երբ ֆուտբոլիստը գալիս է հավաքական, նա իմ ֆուտբոլիստն է։ Ինչպես ես կաշխատեմ նրա հետ, դա ես եմ որոշում, երբ ֆուտբոլիստը գնա ակումբ՝ դա իր ֆուտբոլիստն է։ Ես գիտեի ինչպես աշխատել և այսօր տեսանք լավ խաղ Ժիրայր Շաղոյանից»,– ասել է Մելիքյանը։
Լրագրողի հարցին, որ հավաքականի դարպասապահների մարզիչը քննադատության էր ենթարկել «Արարատ-Արմենիային»՝ Արման Ներսիսյանին խաղաժամանակ չտրամադրելու համար։
«Մինչ այդ ոչ ես, ոչ էլ իմ օգնականները չենք մտել այդ դաշտ։ Իրենք թույլ տվեցին, իմ օգնականն էլ պատասխանը տվեց։ Դա իր ցանկությունն էր, իր պատասխանն էր։ Ոչ ոքի թույլ չեմ տա մտնել իմ գործերի մեջ։ Համարում եմ, որ ճիշտ է արել, երբ մտնում են մեր դաշտ՝ պետք է պատասխանը ստանան»,– ասել է հավաքականի մարզիչը։
Միշիևի մասին․
«Միշիևը ցույց տվեց, որ կա մրցակցություն դարպասապահների գոտում։ Շատ գոհ եմ, փորձառու դարպասապահի պես պահեց իրեն։ Ուրախ եմ, որ առաջին պաշտոնական խաղում կարողացավ մեզ օգնել»,– ավելացրել է Մելիքյանը։
Ասուլիսն ամբողջությամբ՝ ստորև․
Վերջին տուրի հանդիպումից առաջ Հայաստանի հավաքականն ունի 5 միավոր և երրորդն է աղյուսակում։ Կիպրոսի հավաքականը 8 միավորով երկրորդ տեղում է. Կիպրոսի հավաքականն ապահովել է երկրորդ տեղը խմբում։
Հայաստանի, Լատվիայի, Չեռնոգորիայի և Կիպրոսի հավաքականներն ընդգրկված են 2-րդ խմբում։ Այս խմբի 5–րդ տուրի մյուս՝ Չեռնոգորիայի և Լատվիայի միջև հանդիպումը կմեկնարկի քիչ անց։
Հիշեցնենք` Հայաստանի ազգային հավաքականը նոյեմբերի 15-ին, վերջին տուրի շրջանակում, ժամը 18։00-ին, մրցակցի հարկի տակ կհանդիպի Լատվիայի թիմի հետ։
Մրցաշարային աղյուսակն այս պահին՝ ստորև․
