Պորտուգալիայի ֆուտբոլի ֆեդերացիայի նախագահ Պեդրու Պրոենսան ստիպված է եղել անձամբ միջամտել ազգային հավաքականում ծագած ներքին կոնֆլիկտին, որի գլխավոր դերակատարներն են 41-ամյա Կրիշտիանու Ռոնալդուն և գլխավոր մարզիչ Ժորժե Ժեզուշը։
Ազգերի լիգայի խմբային փուլի 2-րդ տուրում պորտուգալացիները արտագնա խաղում 2:1 հաշվով հաղթել էին Նորվեգիային, սակայն այդ հանդիպումը նշանավորվել էր Ռոնալդուի շուրջ ստեղծված անսպասելի իրավիճակով։ Վերջին 18 տարվա ընթացքում առաջին անգամ Կրիշտիանուն պաշտոնական խաղում ամբողջությամբ մնաց պահեստայինների նստարանին՝ այդպես էլ խաղադաշտ դուրս չգալով։
A Bola պարբերականի հաղորդմամբ՝ Ժեզուշը նախապես տեղեկացրել էր հարձակվողին, որ նա փոխարինման դուրս կգա երկրորդ խաղակեսում և կստանա մոտ կես ժամ խաղաժամանակ։ Ռոնալդուն նախավարժանք էր արել, բայց մարզիչը փոխել էր որոշումն ու նրան դաշտ դուրս չէր բերել՝ ավելի ուշ հայտարարելով, որ դա զուտ իր անձնական որոշումն էր։
Մրցավարի եզրափակիչ սուլիչից հետո դժգոհ Ռոնալդուն, առանց երկրպագուներին շնորհակալություն հայտնելու, միանգամից ուղևորվել էր հանդերձարան։ Իրավիճակն ավելի էր սրվել սեպտեմբերի 29-ին, երբ ավագը բաց էր թողել թիմային մարզումն ու աշխատել անհատական ծրագրով՝ մարզասրահում։
Լարվածությունը մեղմելու և կոնֆլիկտը չխորացնելու նպատակով ֆեդերացիայի նախագահ Պրոենսան շտապ մեկնել է հավաքականի ճամբար։ Ըստ տեղական աղբյուրների՝ Պրոենսայի, Ժեզուշի և Ռոնալդուի միջև կայացած եռակողմ բանակցությունները հաջող են անցել. մթնոլորտը եղել է դրական, իսկ տարաձայնություններն ամբողջությամբ հարթվել են։
Նշենք, որ հինգշաբթի՝ հոկտեմբերի 1-ին, Պորտուգալիան Ազգերի լիգայի 3-րդ տուրի շրջանակում Կոպենհագենում հյուրընկալվելու է Դանիայի հավաքականին։ Անցկացրած երկու հանդիպումներից հետո պորտուգալացիները 6 միավորով գլխավորում են A դիվիզիոնի 4-րդ խումբը, իսկ Դանիան 3 միավորով երրորդն է։
