Իսպանիայի ազգային հավաքականի և կատալոնական «Բարսելոնայի» հարձակվող Լամին Յամալը Ազգերի լիգայի խմբային փուլի 2-րդ տուրում Խորվաթիայի նկատմամբ տարած վստահ հաղթանակից (4:1) հետո կիսվել է տպավորություններով, ինչպես նաև խոսել 2026 թվականի «Ոսկե գնդակի» համար մղվող պայքարի մասին։ Այդ հանդիպումում 19-ամյա ֆուտբոլիստը դարձել է դուբլի հեղինակ։
«Միշտ պետք է խաղադաշտ դուրս գալ լիովին լիցքավորված՝ անելու այն, ինչ պահանջում է մարզիչը, և այն, ինչ քննարկում ենք մեր ներսում։ Շատ ուրախ եմ այս հաղթանակի համար։ Մենք մեծ ցանկություն ունենք նվաճել այս գավաթը, ցույց տալ այն մեր երկրպագուներին և տուն տանել: Դա հիանալի կլիներ:
Ինչ վերաբերում է «Ոսկե գնդակին», ես փորձում եմ պարզապես խաղալ և սպասել։ Ես ընտրող չեմ և անգամ չգիտեմ, թե ով է հաղթել քվեարկությունում։ Ի վերջո, ես խաղում եմ ոչ միայն այդ մրցանակի համար։ Ես խաղում եմ ինձ համար, երկրպագուների համար, հաջորդ մրցաշրջանի և իմ հավաքականի համար, որպեսզի շարունակենք հաղթել: Մնում է միայն սպասել և շարունակել խաղալ»,- 2026 թ․ աշխարհի չեմպիոնի խոսքերն է մեջբերում Marca-ն։
Հիշեցնենք, որ սեպտեմբերի 8-ին France Football պարբերականը հրապարակել է 2026 թվականի «Ոսկե գնդակի» հավակնորդների ցանկը, որում ընդգրկված է նաև Յամալը։ Քվեարկությունն արդեն ավարտված է, իսկ հաղթողի անունը պաշտոնապես հայտնի կդառնա հոկտեմբերի 26-ին Լոնդոնում կայանալիք հանդիսավոր արարողության ժամանակ։
Ազգերի լիգայի ընթացիկ խաղարկությունում Իսպանիայի հավաքականը 2 տուրից հետո 6 միավորով վստահորեն գլխավորում է մրցաշարային աղյուսակը։ Խորվաթիան 3 միավորով երրորդն է։
3-րդ տուրում, որի հանդիպումները կկայանան հոկտեմբերի 3-ին, Իսպանիան կմրցի Չեխիայի, իսկ Խորվաթիան ուժերը կչափի Անգլիայի հավաքականի հետ։
