Հայաստանի ազգային հավաքականի և Վարշավայի «Լեգիայի» կիսապաշտպան Վահան Բիչախչյանը մոտենում է ապաքինման փուլի ավարտին։ Հայ ֆուտբոլիստը մանրամասնել է իր վերականգնման ընթացքն ու նշել, թե երբ կրկին պատրաստ կլինի միանալ թիմին։
«Շատ մեծ հույս ունեմ, որ եթե ամեն ինչ լավ ընթանա, արդեն հաջորդ շաբաթ կմարզվեմ թիմի ընդհանուր խմբում։ Եթե պարապմունքների ընթացքում ամեն ինչ նորմալ լինի, հնարավոր է՝ պատրաստ լինեմ մասնակցել արդեն «Յագելոնիայի» դեմ խաղին»,— Բիչախչյանի խոսքերը մեջբերում է CANAL+-ը։
Լեհաստանի առաջնության 9-րդ տուրի՝ «Յագելոնիայի» դեմ խաղը կկայանա սեպտեմբերի 20-ին։ Եթե մինչ այդ հայ կիսապաշտպանը հասցնի վերականգնվել, կարող է խաղային պրակտիկա ստանալ և մարզավիճակ հավաքել մինչև Հայաստանի ազգային հավաքականի մոտալուտ հանդիպումները։
Հիշեցնենք, որ Ազգերի լիգայի C լիգայի 2-րդ խմբի շրջանակում մեր ընտրանին մեկնարկային երկու խաղերը կանցկացնի սեփական հարկի տակ։ Սեպտեմբերի 25-ին՝ ժամը 20:00-ին, Հայաստանի հավաքականը կմրցի Լատվիայի ընտրանու հետ, իսկ սեպտեմբերի 28-ին՝ նույն ժամին, կընդունի Չեռնոգորիային։
