Ռումինական «Ունիվերսիտատյան» պատրաստվում է Եվրոպա լիգայի որակավորման փլեյ-օֆֆ փուլի իր գլխավոր մարտին, որտեղ Ռումինիայի չեմպիոնի մրցակիցը հայկական «Արարատ-Արմենիան» է։ Դիմակայության առաջին հանդիպումը կկայանա հինգշաբթի՝ օգոստոսի 20-ին, Կրայովայի «Իոն Օբլեմենկո» մարզադաշտում։
Ընդառաջ գնալով այս կարևորագույն խաղին՝ ռումինական մարզական մամուլն ուշադրություն է հրավիրել հայկական լրատվամիջոցների, մասնավորապես՝ Armsport.am-ի հրապարակումների վրա։
Digi Sport-ը նշում է, որ երևանյան թիմը կանգնած է պատմություն կերտելու շեմին. մինչ օրս ոչ մի հայկական ակումբ հանդես չի եկել Եվրոպա լիգայի լիգայի փուլում։
«Արարատ-Արմենիան իսկապես պատմական իրադարձության շեմին է», — մեջբերում են ռումինական պարբերականները մեր կայքի անդրադարձը։
Հիշեցնենք, որ այս զույգի պարտվողը պայքարը կշարունակի Կոնֆերենցիաների լիգայի հիմնական փուլում, այնպես որ երկու թիմերն էլ արդեն իսկ ապահովել են իրենց եվրոպական աշունը։
«Ունիվերսիտատյայի» հայտացուցակն ու կադրային ներուժը
«Ունիվերսիտատյան» արդեն հրապարակել է այն ֆուտբոլիստների ցանկը, որոնք նախապատրաստվում են հայկական թիմի դեմ դիմակայությանը.
- Դարպասապահներ. Մաքսիմ, Պոպեսկու, Սավա
- Պաշտպաններ. Ռոմանչուկ, Սկրեչիու, Ստևանովիչ, Ռուս, Վեբստեր
- Կիսապաշտպաններ. Կրեցու, Անզոր, Բելուցե, Բանկու, Մորա, Ռեդուլեսկու, Տավարեշ, Չիկիլդեու, Տելես, Մատեյ, Մունտյան
- Հարձակվողներ. Նսիմբա, Ալ-Համլավի, Բայարամ, Էթիմ, Էլիսոր, Բեսչանու
«Արարատ-Արմենիայի» հետ հանդիպումից առաջ Ռումինիայի գործող չեմպիոնը հերթական հանդիպումն է անցկացրել տեղի Սուպերլիգայի 5-րդ տուրում՝ արտագնա խաղում 1:1 հաշվով ավարտելով մրցավեճը «Օցելուլ Գալացիի» հետ։
Հատկանշական է, որ այդ խաղում «Ունիվերսիտատյան» ավելի քան մեկ խաղակես հանդես է եկել տասը հոգով՝ Ալեքս Կրեցուի հեռացման պատճառով։ Չնայած թվային անհավասարությանը՝ կրայովացիները կարողացել են բովանդակալից ֆուտբոլ ցուցադրել և ընդմիջումից անմիջապես հետո բացել հաշիվը, սակայն հանդիպման վերջնամասում դաշտի տերերը հեռահար հարվածով վերականգնել են հավասարությունը։
Ռումինական աղբյուրները չեն մոռացել հիշեցնել, որ «Արարատ-Արմենիան» ռումինական ֆուտբոլի հետ բախվելու թարմ փորձ ունի։ Նախորդ մրցաշրջանում՝ Կոնֆերենցիաների լիգայի որակավորման երկրորդ փուլում, երևանյան թիմի մրցակիցը «Կլուժն» էր։ Երևանում գրանցված գոլազուրկ ոչ-ոքիից հետո, «Արարատ-Արմենիան» Սիբիու քաղաքում կայացած պատասխան խաղի լրացուցիչ ժամանակում 2:1 հաշվով տպավորիչ հաղթանակ կորզեց և անցավ հաջորդ փուլ, որտեղ զիջեց Պրահայի «Սպարտային» (1:4, 1:2)։
Արդյո՞ք հայկական ակումբին կհաջողվի կրկնել ռումինական հողում գրանցած նախորդ հաջողությունն ու պատմական քայլ կատարել դեպի Եվրոպա լիգա. կպարզվի արդեն առաջիկա հինգշաբթի։
