Մյունխենի «Բավարիայի» գերմանացի կիսապաշտպան Ջամալ Մուսիալան առաջին անգամ խոսել է իր առողջական վիճակի մասին՝ ընկերական հանդիպումների ժամանակ երկու անգամ գիտակցությունը կորցնելուց հետո։
Նախ 23-ամյա ֆուտբոլիստը վախեցրել էր երկրպագուներին «Լայպցիգի» դեմ ստուգողական խաղում, ապա նմանատիպ դեպք կրկնվել էր «Հայդենհայմի» դեմ մրցավեճում։
Մուսիալան հանգստացրել է երկրպագուներին և հերքել վատագույն սցենարների մասին լուրերը։ Այնուամենայնիվ, ֆուտբոլիստը խոստովանել է, որ ունենում է աբսանսի (գիտակցության կարճատև կորուստ) նոպաներ։
«Նախևառաջ ամենակարևորի մասին. ինձ հետ ամեն ինչ կարգին է։ Ես հատկապես երախտապարտ եմ ձեր նամակների և աջակցության համար։ Հասկանում եմ, որ շատերդ անհանգստացած եք։ Ցանկանում եմ փարատել այդ մտահոգությունները և պարզաբանել որոշ բաներ։
Ինձ մոտ ախտորոշվել են նյարդաբանական դիսֆունկցիայով պայմանավորված կարճատև, բայց բուժման ենթակա աբսանսներ։ Դրանք կարող են հանգեցնել այնպիսի դրվագների, ինչպիսին տեղի ունեցավ վերջերս «Լայպցիգի», իսկ այժմ նաև «Հայդենհայմի» դեմ խաղում։
Գիտեմ, որ առաջին հայացքից սա սարսափելի է թվում, բայց այժմ դա իմ առօրյայի մի մասն է։ Ես գտնվում եմ լավագույն բժշկական հսկողության ներքո և շատ լավատեսորեն եմ տրամադրված։ «Բավարիան» և իմ մտերիմները միշտ կողքիս են ու աջակցում են ինձ այս ճանապարհին։
Կարևոր է նշել, որ առողջական այլ ռիսկեր չկան։ Փորձագետների հետ սերտ համագործակցությամբ և պարբերական խորհրդատվություններով, ինչպես նաև նյարդաբանների թույլտվությամբ՝ ես անձամբ ցանկացա ընդունել այս մարտահրավերը և շարունակել անել այն, ինչն ամենաշատն է օգնում իմ ապաքինմանը՝ պարզապես ապրել իմ սովորական կյանքով և զբաղվել իմ սիրելի գործով՝ ֆուտբոլ խաղալով։ Ես պատասխանատվություն եմ վերցրել դրա համար։ Ընդհանուր առմամբ, ինձ շատ լավ եմ զգում և ճիշտ ուղու վրա եմ։
Այս ճանապարհին ինձ ամենաշատն օգնում է թիմիս հետ միասին, ձեր անհավանական աջակցությամբ, հաղթանակներ ու տիտղոսներ նվաճելը շարունակելը։
Հուսով եմ՝ այժմ ինձ ավելի լավ եք հասկանում։ Միևնույն ժամանակ, խնդրում եմ ըմբռնումով մոտենալ նրան, որ հետագայում ես ցանկանում եմ այս թեման պահել միայն ամենամտերիմ մարդկանց, ակումբի և փորձագետների շրջապատում։
Շատ շնորհակալ եմ։ Ձեր Ջամալ»,- գրել է Մուսիալան սոցիալական ցանցերի իր էջերում։
Հիշեցնենք, որ վաղը՝ օգոստոսի 22-ին, «Բավարիան» Գերմանիայի Սուպերգավաթի շրջանակում կմրցի Դորտմունդի «Բորուսիայի» հետ։
