Վինիսիուս Ժունիորի պայմանագրի երկարաձգումը Մադրիդի «Ռեալի» համար վերածվել է բարդ գլուխկոտրուկի: Այս գործընթացը ձգձգվում է դեռևս 2025 թվականի Աշխարհի ակումբային առաջնությունից հետո, երբ թիմը գլխավորում էր Խաբի Ալոնսոն: Հենց այդ ժամանակ կայացավ խաղացողի ներկայացուցիչների և ակումբի միջև վերջին դեմ առ դեմ հանդիպումը, որտեղ կողմերը մոտ էին համաձայնության, սակայն վերջին պահին ամեն ինչ կանգ առավ: Այժմ բանակցությունները վերսկսվելու են հենց այդ կետից։ Այս մասին տեղեկացնում է AS-ը։
2025-ի հուլիսին Վալդեբեբասում կայացած հանդիպման ժամանակ բրազիլացին զգալիորեն զիջել էր իր ի սկզբանե պահանջած ֆինանսական ախորժակը (տարեկան մոտ 30 մլն եվրո), իսկ «Ռեալն» էլ, իր հերթին, բարձրացրել էր առաջարկը: Թվում էր, թե ստորագրումն անխուսափելի է, սակայն տարօրինակ կերպով ոչ մի կողմ չցանկացավ վերջնական զիջման գնալ փոքրիկ դետալներում։
Ի վերջո, Վինիսիուսը պահանջեց տարեկան 20 միլիոն եվրո մաքուր աշխատավարձ։ Սա այնքան էլ կտրուկ աճ չէ (ընդամենը 5 մլն տարբերություն) այն պայմաններից, որոնք նա ունի հիմա։ Հիշեցնենք, որ 2022-ին (թեև պաշտոնապես հայտարարվեց միայն 2023-ի հոկտեմբերին) Վինին ստորագրել էր 5 տարվա պայմանագիր՝ մինչև 2027 թվականը, որով նախատեսվում էր 75 մլն եվրո մաքուր աշխատավարձ։ Այն ունի աճողական բնույթ. սկսելով մոտ 10 միլիոնից՝ վերջին տարում այն հասնելու է 18 միլիոնի։ Բացի այդ, կար կետ, ըստ որի՝ The Best մրցանակը կամ «Ոսկե գնդակը» նվաճելուց հետո խաղացողը ստանում է տարեկան ևս 2 մլն եվրո բոնուս։
Այսօրվա բանակցություններում արդեն կան նոր կետեր: Վինին կարող է պահանջել պայմանագրի երկարաձգման հավելյալ բոնուս՝ նման այն բոնուսին, որը Մբապեն ստացավ «Ռեալ» տեղափոխվելիս, ինչպես նաև ավելի մեծ տոկոսաբաժին իր իմիջային իրավունքներից։
Իմիջային իրավունքները ֆինանսական կարկանդակի ամենահամեղ պատառն են։ Կիլիան Մբապեն տնօրինում է իր գովազդային եկամուտների գրեթե 100%-ը, ինչն օգնեց ակումբին կոմպենսացնել նրա աշխատավարձը։ Վինիսիուսը, լինելով մոլորակի գլխավոր մարզական դեմքերից մեկը, ձգտում է նույնին։ Նա պայմանագրեր ունի համաշխարհային 18 հսկաների հետ, որոնց թվում են՝ Nike, Apple, Playstation, Pepsi, Gatorade, Prada, Boss և անգամ ՅՈւՆԵՍԿՕ-ն։
Բրազիլացու շրջապատից եկող լուրերը հուշում են, որ նա ցանկանում է մնալ Մադրիդում։ Անգամ եթե կողմերը համաձայնության չգան, խաղացողի պլանն է մնալ ակումբում մինչև պայմանագրի ավարտը և հեռանալ ազատ գործակալի կարգավիճակով։ Սակայն այս բոլոր հարցականների պատասխանները կտրվեն առաջիկա ժամերին, երբ կկայանա վճռորոշ դեմ առ դեմ հանդիպումը Վինիսիուսի, Ժոզե Մոուրինյուի և «արքայական» ակումբի ղեկավարության միջև:
