Վաղը՝ հուլիսի 30-ին, ՈuԵՖԱ-ի Կոնֆերենցիաների լիգայի 2026/27 մրցաշրջանի որակավորման երկրորդ փուլի պատասխան խաղում «Ալաշկերտը» Դոկտոր Կոնստանտին Ռադուլեսկու անվան մարզադաշտում կհյուրընկալվի տեղի «Կլուժին»։
Երևանյան ակումբի գլխավոր մարզիչ Վահե Գևորգյանը նախախաղային ասուլիսի ժամանակ պատասխանել է լրագրողների հարցերին․
«Խաղից առաջ «թղթի վրա» ֆավորիտը «Կլուժն» էր, բայց ինչպես խաղից առաջ, այնպես էլ հիմա շանսերը գնահատում եմ հավասար»։
– Կա՞ արդյոք «Կլուժում» այնպիսի ֆուտբոլիստ, որը կարող է տարբերություն ստեղծել խաղում:
«Ընդհանրապես չեմ սիրում առանձնացնել ֆուտբոլիստներին: Դուք շատ լավ թիմ ունեք, բայց կարող եմ ասել, որ հարձակման գծում խաղում են բավականին որակյալ տղաներ՝ վինգերներ, հարձակվողներ, հատկապես՝ նոր ֆուտբոլիստը»:
– Գիտե՞ք, որ 7 տարի առաջ խաղացել եք «Կլուժի» հետ, ու «Կլուժը» հաղթել էր ու դուրս եկել հաջորդ փուլ:
«Մենք չենք խաղացել. 7 տարի առաջ այլ «Ալաշկերտ» է խաղացել, և թե՛ ֆուտբոլիստները, թե՛ մարզչական շտաբը փոփոխվել են: Ես չեմ ասում, որ այդ «Ալաշկերտը» լավը չէր, ուղղակի ժամանակի մեծ տարբերություն կա, և դա ոչինչ չի որոշում»:
– Երևանում կայացած ոչ-ոքիից հետո ասացիք, որ բարկացած եք, բայց թիմը պետք է վերականգնվի և պատրաստ լինի այս հանդիպմանը։ Հիմա Ռումինիայում ի՞նչ եք կարծում, արդյոք թիմը պատրաստ է ցույց տալ այն խաղը, որը դուք սպասում էիք Երևանում:
«Թիմը Երևանում արդեն ցույց տվեց այն խաղը, որին ես սպասում էի: Ես շեշտեցի, որ բարկացած եմ, որովհետև բարկացած էի արդյունքի համար: Կարծում եմ, որ մենք տոտալ առավելություն ունեինք հատկապես առաջին խաղակեսում, իսկ երկրորդ խաղակեսի մի հատված վատ ստացվեց արագ ընդունած գոլի պատճառով: Գտնում եմ, որ այո, թիմը պատրաստ է: Ամենակարևորը՝ մենք տեսնում ենք, որ խաղից խաղ պրոգրես կա. սկսած մեր առաջին եվրագավաթային խաղից՝ մենք ամեն խաղում ավելացնում ենք: Այսինքն՝ մենք ճիշտ ճանապարհի վրա ենք, ու միանշանակ պետք է ակնկալենք, որ վաղն ավելի լավ ենք խաղալու, քան Երևանում»:
– Կրկին համեմատելով երևանյան խաղի երկու խաղակեսերը՝ առաջինում «Կլուժը» փորձում էր ավելի բաց խաղալ, պրեսինգ անել. ճիշտ է՝ այդքան էլ չէր ստացվում, իսկ երկրորդ կեսում՝ գոլից հետո, սկսեց ավելի փակ խաղալ: Դուք վաղն ի՞նչ ոճի «Կլուժ» եք սպասում՝ առաջին կեսի «Կլուժի՞ն», թե՞ երկրորդ կեսի:
«Մենք պատրաստվել ենք թե՛ առաջին կեսի, թե՛ երկրորդ կեսի «Կլուժին»: Մենք պարտավոր էինք այդպես պատրաստվել: «Կլուժը» բավականին փորձառու, որակյալ թիմ է, խաղասեղանին հաջորդ փուլ դուրս գալու ուղեգիրն է դրված, հետևաբար մենք իրավունք չունենք պատրաստվելու միայն մեկ սցենարով»:
– Նախատեսու՞մ եք արդյոք տակտիկական փոփոխություններ, և հնարավո՞ր է արդյոք, որ «Ալաշկերտը» հանդես գա առաջին համարով և իր խաղը պարտադրի մրցակցին:
«Տակտիկական ոչ մի բացահայտում չեմ անի, ամեն ինչ էլ հնարավոր է: Մենք կարող ենք հանդես գալ ինչպես առաջին, այնպես էլ երկրորդ համարով. մենք նույնպես ճկուն թիմ ենք»:
– Քիչ չեն նոր խաղացողները «Ալաշկերտում», նրանցից շատերը, կարելի է ասել, հիմնական կազմում են և հիմնականում խաղում են այս խաղերի ընթացքում: Ինչպե՞ս կգնահատեք նրանց ադապտացիան:
«Նորեկները բավականին լավն են: Մենք մեր կողմից փորձում ենք օգնել նրանց, իրենք էլ քրտնաջան աշխատում են, որպեսզի հնարավորինս արագ ադապտացվեն: Վստահաբար կարող եմ ասել, որ ոչ մի նորեկ դեռևս մոտ չէ իր պոտենցիալի գագաթնակետին: Նրանք բոլորն էլ որակյալ են, ու եթե այդ ադապտացիան առանց ֆորսմաժորների անցնի, բավականին օգտակար կլինեն մեզ համար»:
– Թիմը նոր է ժամանել Ռումինիա, ու խաղին քիչ ժամանակ է մնացել, վաղն արդեն հանդիպումն է: Արդյո՞ք վերականգնման տեսանկյունից կարող են ինչ-որ խնդիրներ առաջանալ ֆուտբոլիստների մոտ:
«Ես շնորհակալ եմ մեր ղեկավարությանը, որ, ինչպես «Ելիմայի» հետ հանդիպմանը, այնպես էլ այս դեպքում, մեզ հնարավորություն ընձեռեց չարտերային չվերթով ժամանել Ռումինիա: Կարծում եմ՝ այո, մենք կհասցնենք վերականգնվել, քիչ անց կանցկացնենք մարզում և արդեն ըստ ծրագրի կհանգստանանք»:
– Ինչպես «Ելիմայի» հետ դիմակայությունում՝ երևանյան խաղում 1-1 հաշվով ոչ-ոքի ու պատասխան խաղ նմանատիպ իրավիճակում. տեսնու՞մ եք արդյոք նմանություններ այս պարագայում երկրորդ խաղից առաջ, թե՞ կատարելապես տարբեր մրցակիցներ են:
««Ելիմայի» դեմ առաջին խաղից հետո չեմ կարող ասել՝ ինտուիցիա էր, թե ավելի շատ տրամաբանություն, բայց վերլուծելով խաղադաշտում կատարվածն ու այն, ինչ կարող է լինել երկրորդ խաղում, ես թե՛ իմ մարզչական շտաբին, թե՛ այլ մարդկանց ասել էի, որ շատ մեծ հավանականություն եմ տեսնում 11-մետրանոցների հարվածաշարի, և մենք պատրաստվել էինք դրան: Անկեղծ ասած, այս հանդիպումից առաջ այդպիսի զգացողություն չունեմ:
– Դուք՝ որպես մարզիչ, ի՞նչ կնախընտրեք վաղը՝ նորից էմոցիոնալ հաղթանա՞կ 11-մետրանոցներով, թե՞ վստահ հաղթանակ 90 րոպեում: Եվ այդ սցենարներից երկուսին էլ արդյո՞ք պատրաստ է թիմը ֆիզիկապես:
«Բնականաբար, վաղը կնախընտրեմ վստահ հաղթանակ 90 րոպեում: Ինչ վերաբերում է թիմի ֆիզիկական վիճակին, կարծում եմ, որ ֆիզիկապես մենք խաղից խաղ ավելացնում ենք ու ավելի լավ վիճակում ենք լինելու, քան երևանյան հանդիպմանը»:
– Ձեր գլխավորությամբ արտագնա եվրագավաթային խաղերը հիմնականում լավ են ստացվում. եթե նույնիսկ «Արսենալ Տիվատի» հետ կապվածը չհաշվենք, ապա ունենք «Դեբրեցենի» դեմ պատասխան խաղը (ճիշտ է՝ դիմակայությունում չանցաք առաջ, բայց տպավորիչ հաղթանակ էր), «Ելիմայը», և հիմա այս խաղը: Արտագնա խաղերի հետ կապված ինչ-որ ընդհանրություն նկատո՞ւմ եք, որ լավ է ստացվում, թե՞ ընդհանրապես համընկել է:
«Հատկապես «Ելիմայի» դեմ տնային հանդիպումից հետո այդ ուղղությամբ շատ եմ մտածել ու վերլուծել: Կարծում եմ՝ դա հոգեբանական գործոն է, և գաղտնիք չէ (եկեք անկեղծ լինենք), որ մենք չունենք երկրպագուների մեծ բանակ: Այսինքն՝ տնային հանդիպումն ինքնին մեզ չի տալիս այն էմոցիաները՝ համեմատած ձեր նշած արտագնա խաղերի հետ: Բայց կա այսպիսի մի բան. վաղն էլ մեզ սպասում են մեծաքանակ երկրպագուներ: Մենք գիտենք, թե «Կլուժն» ինչ մեծաքանակ երկրպագուներ ունի: Ու մարզիչները պետք է կարողանան դա օգտագործել ի օգուտ իրենց ֆուտբոլիստների: Ֆուտբոլիստներն էլ երիտասարդ են, ստացվում է նրանց ճիշտ մոտիվացնել, ու կարծում եմ, որ վաղն էլ եմ սպասում այդպիսի կրկնության», — եզրափակել է Գևորգյանը
Հիշեցնենք, որ թիմերի միջև կայացած առաջին խաղն ավարտվել էր ոչ-ոքի՝ 1-1 հաշվով։ Պատասխան խաղը կկայանա վաղը՝ հուլիսի 30-ին, Երևանի ժամանակով 22:30-ին։
