Իսպանիայի հավաքականի եզրային պաշտպան Մարկ Կուկուրելյան խոստովանել է, որ մտադիր չէր հեռանալ Լոնդոնի «Չելսիից», իսկ Մադրիդի «Ռեալ» իր 52 միլիոն ֆունտ ստեռլինգ արժողությամբ տեղափոխությունն իրականացել է ընդամենը մեկուկես օրվա ընթացքում: Այս մասին տեղեկացնում է The Guardian-ը։
27-ամյա ֆուտբոլիստը նաև անդրադարձել է «Բարսելոնայի» երկրպագուների սուր քննադատությանը՝ պնդելով, որ թեև ծնվել ու մեծացել է Կատալոնիայում և 14 տարեկանում միացել կատալոնական ակումբի ակադեմիային՝ հռչակավոր «Լա Մասիային», ինքը չէր կարող մերժել Մադրիդի «Ռեալին»։
«Ամեն ինչ շատ արագ ստացվեց»,- նշել է Կուկուրելյան ԱՄՆ-ում տեղակայված Իսպանիայի հավաքականի ճամբարից։ «Մի առավոտ ինձ զանգահարեցին։ Ներկայացուցիչներս ասացին, որ ակումբները հիմնականում համաձայնեցրել են պայմանները, և ես պետք է որոշեմ՝ ուզո՞ւմ եմ տեղափոխվել, թե՞ ոչ։ Ես կասկածներ չունեի։ Սա մեծ և շատ կարևոր քայլ է իմ կարիերայում։ Ամեն ինչ տեղի ունեցավ մոտավորապես մեկուկես օրում։ Ինձ համար դա լավագույն սցենարն էր, որպեսզի հարցը փակվի, և ես կարողանամ 100 տոկոսով կենտրոնանալ Աշխարհի առաջնության վրա»։
Խոսելով Լոնդոնից հեռանալու մասին՝ պաշտպանը հավելել է․
«Եթե մի քանի ամիս առաջ ինձ հարցնեիք, հավանաբար կասեի, որ չեմ սպասում «Չելսիից» հեռանալուն։ Ես այնտեղ շատ երջանիկ էի, ընտանիքս՝ նույնպես։ Բայց կյանքում և ֆուտբոլում երբեմն պետք է փոփոխությունների գնալ ու սկսել նոր, անսպասելի էջեր։ Հեշտ չէր լքել «Չելսին». ես այնտեղ ապրեցի չորս տարի, երազում էի տիտղոսներ նվաճել, և այդ ակումբն ինձ հնարավորություն տվեց։ Բայց հիմա մարտահրավերն ավելի մեծ է։ Ես վերադառնում եմ հայրենիք՝ խաղալու աշխարհի լավագույն ակումբներից մեկում»։
Կուկուրելյան բացահայտել է նաև, որ հասցրել է զրուցել Մադրիդի «Ռեալ» վերադարձած գլխավոր մարզիչ Ժոզե Մոուրինյուի հետ։
«Մենք կարճ զրուցեցինք, բայց ես շատ ուրախ էի։ Երբ քեզ զանգահարում է Մոուրինյուի պես մասնագետն ու ասում, որ անհամբեր սպասում է քեզ հետ աշխատանքին, դա հսկայական վստահություն է հաղորդում։ Նա վստահեցրեց, որ ես կարող եմ շատ բան տալ թիմին և հանդերձարանին»։
Անդրադառնալով «Բարսելոնայի» երկրպագուների զայրույթին՝ ֆուտբոլիստը նշել է.
«Ես պետք է հարգեմ բոլորի կարծիքը և շատ շնորհակալ եմ «Լա Մասիայում» սովորածիս համար։ Բայց երբ «Ռեալն» է քեզ հրավիրում, շատ դժվար է ասել «ոչ»։ Կարիերաս հեշտ չի եղել, և այս հնարավորությունն ուղղակի ֆանտաստիկ է: Ի դեպ, կինս և նրա ընտանիքը միշտ «Ռեալի» երկրպագուներ են եղել։ Ո՞վ կպատկերացներ, որ նրա ամուսինը կդառնա «Ռեալի» խաղացող. այժմ մենք կարող ենք միասին վայելել այս պահը»,- եզրափակել է իսպանացին։
