ՈւԵՖԱ-ի (Եվրոպական ֆուտբոլային ասոցիացիաների միության) նախագահ Ալեքսանդեր Չեֆերինը դեմ է աշխարհի առաջնության հիմնական հատվածի մասնակից թիմերի քանակը 64-ի հասցնելու առաջարկին։
Ավելի վաղ ԶԼՄ-ները հայտնել էին, որ ՖԻՖԱ-ի (Միջազգային ֆուտբոլային ֆեդերացիա) խորհրդի նիստում քննարկվել է 2030 թվականի աշխարհի առաջնությունը 48-ից 64 թիմով անցկացնելու հնարավորությունը՝ մրցաշարի հարյուրամյակի առթիվ։
— Ինչպե՞ս եք վերաբերվում ՖԻՖԱ-ի խորհրդի՝ Ուրուգվայի անդամի առաջարկին՝ ընդլայնել աշխարհի առաջնության մասնակից թիմերի թիվը մինչև 64։
— Այս առաջարկն ինձ ավելի շատ զարմացրեց, քան ձեզ։ Կարծում եմ՝ դա վատ գաղափար է։ Այն լավ միտք չէ ոչ աշխարհի առաջնության, ոչ էլ որակավորման փուլերի համար։ Չեմ աջակցում այդ գաղափարին և չգիտեմ, որտեղից է այն առաջացել։ Տարօրինակ է, որ մենք նախկինում այս մասին ոչինչ չգիտեինք, — ասել է Չեֆերինը ՈւԵՖԱ-ի կոնգրեսի ավարտին տեղի ունեցած մամուլի ասուլիսի ընթացքում։
Ավելի վաղ աշխարհի առաջնության եզրափակիչ փուլին մասնակցող թիմերի թիվը մեծացվել էր մինչև 48։ Նոր ձևաչափով առաջին մրցաշարը կանցկացվի 2026 թվականին՝ ԱՄՆ-ում, Կանադայում և Մեքսիկայում։
Աշխարհի առաջնության մասնակիցների թվի ավելացումը, ամենայն հավանականությամբ, առաջին հերթին կապված է ֆինանսական շահերի հետ։ Ջանի Ինֆանտինոն, ով ՖԻՖԱ-ի նախագահն է 2016 թվականից, իր կառավարման ընթացքում ակտիվորեն խթանում է ֆուտբոլի գլոբալիզացիան և մեծածավալ մրցաշարերի անցկացումը, ինչը բերում է լրացուցիչ եկամուտների:
