«Փյունիկի» նոր սեփականատեր Անտոն Ֆարբերը հայտնել է՝ արդեն հանդիպում է ունեցել Հայաստանի ֆուտբոլի ֆեդերացիայի ղեկավարության հետ: Նա կարևորել է աշխատանքային առողջ հարաբերություններ ունենալու անհրաժեշտությունը: Այս մասին Ֆարբերը հայտնել է Match TV-ին տված հարցազրույցում:
— «Փյունիկի» նախկին ղեկավարությունը բարդ հարաբերություններ ուներ Հայաստանի ֆուտբոլի ֆեդերացիայի հետ։ Արդեն հանդիպե՞լ եք ՀՖՖ ղեկավարության հետ։
— Մեզ համար շատ կարևոր է բոլորի հետ ունենալ առողջ հարաբերություններ։ Ֆեդերացիան, իհարկե, այս համակարգի շատ կարևոր մասնակից է։ Հաստատում եմ, որ հանդիպել ենք ֆեդերացիայի ղեկավարության, այդ թվում՝ ՀՖՖ նախագահ Արմեն Մելիքբեկյանի հետ։ Շատ առողջ խոսակցություն էր։ Մենք նախկինում ճանաչում էինք միմյանց: Ուստի մենք ակնկալում ենք և հույս ունենք, որ աշխատանքային հարաբերություններ կունենանք և կմտածենք միայն ֆուտբոլի մասին։ Մենք ոչ մեկի հետ կոնֆլիկտներ չենք ուզում, մենք պարզապես ցանկանում ենք մտածել ֆուտբոլի մասին և պայքարել խաղադաշտում։ Խաղադաշտից դուրս մենք ցանկանում ենք բոլորի հետ ընկերանալ և աշխատանքային հարաբերություններ կառուցել՝ ելնելով «Փյունիկ» ՖԱ-ի և հայկական ֆուտբոլի շահերից:
— Արթուր Սողոմոնյանը դժգոհում էր մարզումների և հանդիպումների համար պայմանների բացակայությունից։ Մտադի՞ր եք բարելավել ենթակառուցվածքը։ Թիմը կշարունակի՞ հյուրընկալել մրցակիցներին «Ջունիոր Սպորտ» մարզադաշտում:
— Ցանկացած պրոֆեսիոնալ ֆուտբոլային ակումբի համար ենթակառուցվածքները շատ կարևոր դեր են խաղում: Մենք նպատակ ունենք բարելավելու պայմանները թիմի համար՝ թե՛ մարզումային գործընթացի, թե՛ մարզադաշտում հանդիպումների առումով։ Եվ ոչ միայն առաջին թիմի համար, քանի որ մեզ համար ակադեմիան շատ կարևոր է։ «Փյունիկի» ակադեմիան լավագույնն է երկրում. Մենք անկասկած ուսումնասիրում ենք տարբեր տարբերակներ՝ ապահովելու համար, որ մեր թիմն ունենա առավել հարմարավետ պայմաններ: Մենք մտածում ենք նաև ապագայում սեփական ենթակառուցվածքի զարգացման մասին։
— Որո՞նք են «Փյունիկի» նպատակներն այս մրցաշրջանում: Կարո՞ղ է ակումբը պայքարել չեմպիոնության համար:
-Միանշանակ: Մենք ունենք ամենահավակնոտ նպատակները։ Ամեն խաղում, ամեն մրցաշարում «Փյունիկը» պետք է խաղա միայն հաղթանակի, չեմպիոն դառնալու համար։ Բացի այդ, մեր նպատակը եվրագավաթների խմբային փուլում խաղալն է։ Որպեսզի հնարավորինս շատ ուսանողներ խաղան առաջին թիմում՝ ապագայում մեծ թիմերում ու լիգաներում հանդես գալու հեռանկարով։
Մենք ուզում ենք նաև, որ «Փյունիկի» երկրպագուները հավատան թիմին և գան մարզադաշտ, որպեսզի նրանք հնարավորինս շատ լինեն։ Մենք ամեն ինչ կանենք, որպեսզի մեր երկրպագուները հպարտանան ակումբով։
