Իսպանացի Անտոն Ֆարբերը ֆուտբոլային աշխարհում հայտնի է որպես թիմերի ուսումնամարզական հավաքների կազմակերպիչ և խաղացողների գործակալ։ Անցած տարեվերջին նա դարձել է Հայաստանի ամենատիտղոսակիր թիմի՝ «Փյունիկի» սեփականատերը, և անմիջապես ակումբ է հրավիրել Դենիս Կուլակովին, որը Ռուսաստանում հայտնի է Եկատերինբուրգում իր ելույթներով։ Միգուցե մոտ ապագայում Երևանում հայտնվի «Ուրալի» մեկ այլ լեգենդ՝ Էրիկ Բիկֆալվին։ Այս և շատ ավելիի մասին Match TV-ն զրուցել է Ֆարբերի հետ:
«Ավելի քան տասը տարի է, ինչ աշխատում եմ պրոֆեսիոնալ ֆուտբոլային թիմերի հետ։ Ապրել և մեծացել եմ Իսպանիայում, և ինչպես գիտեք, այս երկրում մարզաշապիկին վերաբերվում են որպես կրոնի։ Ինքս էլ զբաղվել եմ ֆուտբոլով և այլ սպորտաձևերով։ Մանկուց միշտ երազել եմ ակումբ ունենալ և ղեկավարել։ Այդ պատճառով ես շատ ուրախ էի, երբ սկսեցի աշխատել մեր ոլորտում։
Վերջին շրջանում հանգամանքներն այնպես էին դասավորվել, որ ես հնարավորություն եմ ունեցել աշխատելու այս նախագծի վրա։ Մենք գրասենյակ ունենք Հայաստանում, և «Փյունիկը» մեր մշտական հաճախորդներից էր։ Այդ իսկ պատճառով մենք միշտ բաց և վստահելի հարաբերություններ ենք ունեցել ակումբի ղեկավարության հետ։ Ես սկսեցի հետաքրքիր ակումբ փնտրել գումար, ժամանակ և ռեսուրսներ ներդնելու համար: Դա հենց նրա համար է, որ ակումբը կարողանա մասնակցել եվրոպական մրցումներին, որպեսզի կարողանանք զարգացնել խաղացողներին և որպեսզի օգտագործվի իմ աշխատանքային փորձը, կապերը և այլն։
Գործարքի ֆինանսական մասը շատ պարզ է. Մենք պատասխանատու ենք ակումբի բոլոր ծախսերի համար։ Ուստի մենք լիովին պարտավոր ենք ֆինանսավորել ու զարգացնել այն: Ուզում եմ ուշադրություն հրավիրել այն փաստի վրա, որ նախորդ սեփականատերերի հիմնական ցանկությունն էր, որ ակումբը հայտնվի հուսալի ձեռքերում, որպեսզի այն լինի կայուն նախագիծ։ Դա է գլխավորը, ինչ փնտրում էին։ Որովհետև նրանք շատ ջանք են գործադրել, մեծ գումարներ են ներդրել: Մենք ի վիճակի չենք դատելու՝ նրանց արածը ճի՞շտ էր, թե՞ սխալ։ Խոսքը հենց այն մասին է, որ իրականում մեծ գումար ու ջանք է ծախսվել։ Ինչպես ինձ ասացին, գլխավոր ցանկությունն էր չկորցնել այդ ամենը, որպեսզի ակումբը շարունակի զարգանալ և էլ ավելի մեծ հաջողությունների հասնել։ Երբ ես նրանց բացատրեցի իմ նախագիծն ու նպատակները, մենք շատ արագ ընդհանուր լեզու և փոխըմբռնում գտանք և որոշեցինք, որ դա լավագույն տարբերակն է ակումբի համար»,- ասել է Ֆարբերը։
— Ներկայիս մարզչական շտաբը Եղիշե Մելիքյանի գլխավորությամբ կշարունակի՞ աշխատել թիմի հետ։
— Իմ կարծիքով, և ոչ միայն իմ կարծիքով, մեր մարզչական շտաբը լավագույնն է Հայաստանում և լավագույններից մեկը հետխորհրդային տարածքում։ Վերջերս Եղիշեն ճանաչվել է երկրի լավագույն մարզիչ։ Նա նվաճեց չեմպիոնական տիտղոսը, ուստի մենք միանշանակ ցանկանում ենք, որ ներկայիս կազմը մնա, և մենք երկար աշխատենք միասին։ Մենք կզարգացնենք կառուցվածքը և նրանց կտանք գործիքներ ավելի արդյունավետ աշխատելու համար։
— Մելիքյանի կողմից լրացուցիչ պայմաններ եղե՞լ են, որ նա շարունակի աշխատել «Փյունիկում»:
— Նշեմ, որ Եղիշե Մելիքյանին մենք վաղուց ենք ճանաչում։ Հենց սա էլ պատճառներից մեկն էր, որ որոշեցինք միանալ «Փյունիկին»: Քանի որ մենք շատ ենք հարգում մարզչին, հարգում ենք նրա հավակնությունները։ Որպես հավակնոտ մարզիչ՝ նրա հիմնական ցանկությունն այն է, որ ակումբն ունենա բարձրագույն նպատակներ ինչպես տեղական, այնպես էլ միջազգային մակարդակով: Մեր նպատակները համընկել են նրանով, որ մենք՝ որպես հայկական ֆուտբոլի գրանդ, պետք է պայքարենք ամենաբարձր նպատակների համար։
— Ձմռանը «Փյունիկը» կորցրեց իր թիմի առաջատարներին՝ Հենրի Ավագյանին և Ջեյմս Սանտոսին, ովքեր գնացին մրցակիցների մոտ։ Ինչպե՞ս կմեկնաբանեք այս խաղացողների հեռանալը:
— Ձեր նշած խաղացողների պայմանագրերը լրացել են նախքան մեր՝ ակումբին միանալը: Այնպես որ, ցավոք սրտի, մենք դրա հետ կապ չունենք։ Մեր նպատակն է, որ ակումբում ամեն ինչ կայուն լինի։ Այսօր «Փյունիկը» երկրի չեմպիոնն է։ Ուստի մենք միանշանակ ցանկանում ենք, որ թիմի կորիզը մնա, առաջատարները մնան ու շարունակեն պայքարը չեմպիոնության համար։
— Մամուլում տեղեկություններ են հայտնվել, որ Էրիկ Բիկֆալվին կարող է տեղափոխվել «Փյունիկ»։ Այդպե՞ս է։
— Նախ, ինչպես գիտեք, տրանսֆերները լռությունեն սիրում, ուստի ոչինչ չեմ կարող մեկնաբանել։ Միակ բանը, որ կավելացնեմ, այն է, որ Էրիկն իմ ընկերն է։ Մենք հիանալի հարաբերություններ ունենք։ Կարծում եմ՝ նա կարող է ուժեղացնել ցանկացած թիմ։ Բայց ավելին ոչինչ ասել չեմ կարող։
— «Փյունիկ» գալուց հետո Դենիս Կուլակովը, որը 9 մրցաշրջան է անցկացրել «Ուրալի» կազմում, դարձել է ակումբի սպորտային տնօրեն։ Ի՞նչ կարող եք ասել այս նշանակման մասին։
— Երևի նկատել եք, որ «Փյունիկում» փոփոխություններ են եղել ղեկավարության մեջ: Ակումբի փոխնախագահ է նշանակվել նաև Սուրեն Բաղդասարյանը։ Ակումբում ստեղծում ենք սպորտային բաժին և սա շատ կարևոր քայլ ենք համարում։ Դենիս Կուլակովը վերջերս որոշել է ավարտել ֆուտբոլային կարիերան։ Նա լավ թիմերում խաղալու մեծ փորձ ունի։ Նրա որակներն ու պրոֆեսիոնալիզմը մեզ կօգնեն ստեղծել սպորտային բաժին։
