«Մանչեսթեր Յունայթեդի» և Ֆրանսիայի հավաքականի նախկին հարձակվող Լուի Սահան վստահ է, որ իր նախկին թիմակից Կրիշտիանու Ռոնալդուն կարող էր ավելի մեծ հաջողության հասնել MLS-ում, քան «Ինտեր Մայամիի» հարձակվող Լիոնել Մեսսին։
Այս պահին 39-ամյա Ռոնալդուն խաղում է Սաուդյան Արաբիայի «Ալ-Նասր» ակումբում, մինչդեռ Մեսսին արդեն հանդես է գալիս ամերիկյան լիգայում։ Complete Sports-ին տված հարցազրույցում Սահան ներկայացրել է իր տեսակետը.
«Կրիշտիանու Ռոնալդուն ավելի շատ գոլ կխփեր ՄԼՍ-ում, քան Լիոնել Մեսսին։ Արգենտինացին ընդամենը 20 գոլ խփեց, թեև նրա կողքին բարձրակարգ խաղացողներ կային։ Կարծում եմ, որ Ռոնալդուն չունի նման խաղընկերների կարիք, որպեսզի մեկ մրցաշրջանում 30 գոլ խփի, ինչը նրա համար նույնիսկ քիչ է՝ անկախ այն բանից, թե որտեղ է նա խաղում»։
Ֆրանսիացի նախկին ֆուտբոլիստն ընդգծել է երկու աստղային ֆուտբոլիստների մոտեցման տարբերությունը.
«Կրիշտիանուն չէր բավարարվի առաջնությունում խփած 20 գոլով։ Նախորդ տարի մենք տեսանք, որ նա 35 գոլ խփեց լիգայում և 50՝ բոլոր մրցաշարերում։ Մեսսին հիմա այլ ֆուտբոլիստ է, նա այլևս չի փորձում ռեկորդներ սահմանել և ավելի շատ գոլեր խփել, նա պարզապես վայելում է խաղը։ Իսկ Ռոնալդուն դեռ ձգտում է ռեկորդներ սահմանել»։
Հատկանշական է, որ 2024 թվականին Մեսսին ՄԼՍ-ում ցույց տվեց տպավորիչ արդյունք՝ 19 հանդիպումներում խփելով 20 գոլ և կատարելով 10 գոլային փոխանցում։ Այնուամենայնիվ, Սահայի կարծիքով, այս ցուցանիշները կարող էին գերազանցվել, եթե Ռոնալդուն հանդես գար ամերիկյան լիգայում։
