«Փյունիկ» է վերադարձել ակումբի սան Տարոն Ոսկանյանը, հայտնում է երևանյան ակումբի մամուլի ծառայությունը։
Պաշտպանը իր ֆուտբոլային կրթությունը ստացել է «Փյունիկի» ակադեմիայում՝ հանդես գալով բոլոր տարիքային խմբերում: 2011-ին Տարոն Ոսկանյանը կնքել է իր առաջին պրոֆեսիոնալ պայմանագիրը և սկսել մրցելույթները Հայաստանի Բարձրագույն խմբում: Բացի «Փյունիկից», Տարոն Ոսկանյանը 6 տարի հանդես է եկել «Ալաշկերտի» կազմում: 31-ամյա պաշտպանը Հայաստանի եռակի չեմպիոն է, մեկ անգամ՝ «Փյունիկի», երկու անգամ էլ՝ «Ալաշկերտի» կազմում: Տարոնը 4 անգամ նվաճել է Հայաստանի գավաթը, երկու անգամ էլ՝ Սուպերգավաթը: Տարոն Ոսկանյանը Հայաստանի առաջնություններում մասնակցել է 321 պաշտոնական հանդիպման: Ոսկանյանը «Ալաշկերտի» կազմում 4 հանդիպման է մասնակցել Կոնֆերենցիաների լիգայի խմբային փուլում, իսկ ընդհանուր առմամբ, եվրագավաթներում նա անցկացրել է 42 հանդիպում և աչքի ընկել մեկ գոլով: Ոսկանյանը 2016-ից մինչև 2018 թվականը անցկացրել է Կիպրոսում՝ պաշտպանելով «Կարմիոտիսայի» և «Նեա Սալամիսի» գույները:
«Փյունիկը» պայմանագիր է կնքել նաև 26-ամյա պորտուգալացի կիսապաշտպան Մարտիմ Մայայի հետ:
Թիմի նորեկի նախորդ ակումբը եղել է «Նոան», որի կազմում Մայան նախորդ մրցաշրջանում անցկացրել է 35 հանդիպում, դարձել մեկ գոլի և երկու արդյունավետ փոխանցման հեղինակ: Պորտուգալացին ֆուտբոլային կրթությունը ստացել է հեղինակավոր «Պորտուի» ակադեմիայում, որից հետո մեծամասամբ հանդես է եկել պորտուգալական ակումբներում: Առաջին պրոֆեսիոնալ պայմանագիրը Մարտիմը կնքել է տեղի «Լեյշոյնշի» հետ, այնուհետև 5 տարի հանդես է եկել «Ռիո Ավեի» տարբեր տարիքային թիմերում: Հայրենի երկրում Մարտիմը խաղացել է նաև «Կազա Պիայում», «Ամորայում», «Տրոֆենսեում» և «Սանտա-Կլարայում»: Մարտիմը Պորտուգալիայի 2-րդ լիգայում 26 հանդիպում է անցկացրել, ինչպես նաև մասնակցել է երկու հանդիպման երկրի գլխավոր գավաթի խաղարկությունում:
