Ռուս գեղասահորդուհի Սոֆյա Տիտովան վերջերս ստացավ Հայաստանի քաղաքացիություն և այժմ մեր երկիրը կներկայացնի տարբեր միջազգային մրցաշարերում։ Մարզիկի մայրը Sputnik Արմենիա-ի հետ զրույցում պատմել, թե ինչու է իրենց ընտրությունը կանգ առել Հայաստանի վրա։ Սոֆյայի մայրը՝ Լիդիա Տոպորովան, նախկինում նույնպես գեղասահորդուհի է եղել։
«Մեր ընտրությունը պատահական չի կանգ առել Հայաստանի վրա, դրան նպաստել են մի քանի գործոններ։ Առաջին հերթին, ես ու ամուսինս այստեղ ենք եղել 20 տարի առաջ, և հայկական վանքերը մեզ վրա ահռելի տպավորություն են թողել։ Մեզ համար շատ կարևոր է, որ այնտեղ քրիստոնյաներ են ապրում», — ասել է Սոֆյայի մայրը։
Մյուս կարևոր գործոն, ըստ Լիդիա Տոպորովայի, անարդար մրցավարությունն է, որին նրանք պարբերաբար բախվում են ռուսական մրցաշարերում։
«2023 թվականի Ռուսաստանի պատանեկան Գրան Պրիի եզրափակիչում, Սոֆյան բարելավել էր իր ելույթը, բայց և այնպես միավորներ չստացավ, և ես հասկացա որ եթե նա այստեղ ազնվորեն չգնահատվի, մենք պետք է մտածենք այլ երկրի կազմում հանդես գալու տարբերակի մասին», — նշել է Լիդիա Տոպորովան:
Այդ առաջնությունից հետո Սոֆյա Տիտովայի մարզիչ Եվգենի Պլյուշչենկոն հայտարարել է, որ իր սաները կարող են սկսել հանդես գալ այլ երկրների դրոշի ներքո։
Այդ ընթացքում Հայաստանի գեղասահքի ֆեդերացիան հայտնում է, որ իրենք պատրաստ են ընդունել Սոֆյային, եթե Ռուսաստանի գեղասահքի ֆեդերացիան չառարկի։ Արդյունքում, Ռուսաստանի Դաշնությունը թույլ տվեց, և տեղափոխությունը կայացավ։ Միևնույն ժամանակ, Սոֆյայի անձնական մարզչի պարտականությունները կրկին կշարունակի կատարել Պլյուշչենկոն։
Սոֆյան Եվգենի Պլյուշչենկոյի առաջին աշակերտներից է։ Կրկնակի օլիմպիական չեմպիոնի գլխավորությամբ նա արդեն հասել է զգալի հաջողությունների. նա դարձել է Մոսկվայի և Ռուսաստանի չեմպիոն կրտսեր տարիքային կատեգորիայում և մրցանակային տեղեր է զբաղեցրել տարբեր մրցաշարերում։
Այժմ Սոֆյան ընտանիքի հետ Մոսկվայում է, սակայն հուլիսին նախատեսում է գալ Երևան։ Նա կմարզվի ինչպես Ռուսաստանում, այնպես էլ Հայաստանում։ Սոֆյայի մայրը հավելում է. «Եվգենի Վիկտորովիչը նույնպես սիրում և խորապես հարգում է Հայաստանը, կարծում եմ՝ ամեն ինչ կստացվի այնպես, ինչպես պետք է»:
