Անգլիական «Էվերթոնը» պատրաստ է նոր պայմանագիր առաջարկել 27-ամյա կիսապաշտպան Դելե Ալլիին, հայտնում է Sky Sport-ը՝ հղում անելով The Athletic-ին։ Ֆուտբոլիստի գործող համաձայնագիրը մերսիսայդցների հետ նախատեսված է մինչև 2024 թվականի հունիսի 30-ը:
Աղբյուրի տեղեկություններով՝ ֆուտբոլիստն ինքը նույնպես ցանկանում է մնալ Անգլիայի Պրեմիեր լիգայում և ցանկանում է տպավորել «Էվերթոնի» ղեկավարությանը։
Հիշեցնենք, որ Ալլին «Էվերթոնի» խաղացող է դարձել 2022 թվականի հունվարին։ Անցած մրցաշրջանը ֆուտբոլիստը վարձավճարով անցկացրել է «Բեշիքթաշում»: Ընդհանուր առմամբ, անգլիացին թուրքական ակումբի կազմում անցկացրել է 15 հանդիպում, որոնցում դարձել է երեք գոլի հեղինակ։ Դելեն այս մրցաշրջանում ոչ մի հանդիպում չի անցկացրել։
2023 թվականի ամռանը Ալլին էմոցիոնալ հարցազրույց է տվել «Մանչեսթեր Յունայթեդի» նախկին պաշտպան Գարի Նևիլին՝ խոսելով այն մասին, թե ինչպես է 18 տարեկանում դադարել շփվել իր կենսաբանական մոր հետ։ Հարցազրույցում Ալլին խոսել է նաև մանկական տրավմայի մասին՝ պնդելով, որ վեց տարեկանում իրեն բռնության է ենթարկել մոր ընկերը, իսկ ավելի ուշ ծնողները նրան ուղարկել են Աֆրիկա՝ «կարգապահություն սովորելու»։ Ֆուտբոլիստը հակումներից բուժում է անցել նաև վերականգնողական կենտրոնում։
