«Փյունիկ» ՖԱ-ի երկրպագուները՝ Sector 18 ֆան ակումբի ներկայացուցիչները, հայտարարություն են տարածել՝ անդրադառնալով ակումբի նախագահ Արթուր Սողոմոնյանի հայտարարությանը։ Ավելի վաղ, Սողոմոնյանը հայտարարել էր․ «Եթե Արմեն Մելիքբեկյանը մնա ՀՖՖ նախագահի պաշտոնում, և չլինեն փոփոխություններ, «Փյունիկ» ֆուտբոլային ակումբը կդադարի մասնակցել Հայաստանի առաջնությանը»։
Sector 18 ֆան ակումբի հայտարարությունը։
«Արդեն շուրջ մեկ տարի է շարունակվում է ՀՖՖ- «Փյունիկ» կոնֆլիկտը։ Այս ընթացքում մենք քանիսցս զգացել ենք թե ինչ է նշանակում անարդարություն։ Մենք փոխել ենք արդեն մի քանի մարզադաշտ և պարզ չէ դեռ թե որքանը կփոխենք եթե ներկայիս իշխող կազմը վերընտրվի։ Վերջին 4 տարիների ընթացքում ՀՖՖ-ն չի արել ոչ մի քայլ հայկական ֆուտբոլը ավելի մասսայական դարձնելու համար, հանդիպումները դնելով երկրպագուի համար խայտառակ անհարմար օրերի և ժամերի։ ՀՖՖ-ն վերջին տարիներին որդեգրել է ակնհայտ խտրականական քաղաքականություն, փորձելով խաղից հանել այն թիմերին, որոնք նրան չէին աջակցում( Փյունիկ, Լոռի Սևան)։Վստահ ենք, որ ներկայիս կազմի վերընտրվելու դեպքում հայկական ֆուտբոլը չի ունենա որակական աճ և ի հայտ կգան նոր թիմեր, որոնց Արմեն Մելիքբեկյանի իշխանությունը կփորձի կործանել։ Չնայած այս ամենին, մենք երբեք հրապարակայնորեն չենք աջակցել կողմերից և ոչ մեկին, մտածելով, որ այն հեռավար վիրավորանքների ձևաչափը, որը ընտրել էին կողմերը մեզ դնելու է ծանր դրության մեջ, ժամանակը ցույց տվեց, որ չենք սխալվել։
Այնուամենայնիվ մեզ համար անընդունելի է Արթուր Սողոմոնյանի հայտարարությունը, որ Արմեն Մելիքբեկյանի վերընտրվելու դեպքում մյուս մրցաշրջանում մեր սիրելի թիմը և ակադեմիայի բոլոր թիմերը չեն մասնակցի Հայաստանի առաջնություններին։ «Փյունիկը» բացարձակ արժեք է և չի կարող ոչ մի դեպքում լինել սպառնալիքի առարկա։ «Փյունիկի» ակադեմիայում դաստիարակվել են ներկայումս արդեն լեգենդար ֆուտբոլիստներ և հիմա էլ շուրջ 1500 երեխայի ֆուտբոլային ճակատագիր վտանգված է։Կոչ ենք անում Արթուր Սողոմոնյանին հետ կանգնել այս աբսուրդային մտքից և հետագայում երբեք հանդես չգալ նմանատիպ հայտարարություններով։ Սեկտոր 18 ֆան ակումբը կանի հնարավոր և անհնարին ամեն ինչ որպիսզի մեր սիրելի թիմը շարունակի իր գոյությունը»,- գրված է հայտարարության մեջ։
