Հարավային Ամերիկայի գոտու 2026 թվականի աշխարհի առաջնության ընտրական մրցաշարի 4-րդ տուրում Արգենտինայի հավաքականը 2 անպատասխան գնդակ ուղարկեց Պերուի հավաքականի դարպասը։
Դուբլի հեղինակ դարձավ հարձակվող Լիոնել Մեսսին։ Այսպիսով, 36-ամյա ֆուտբոլիստը դարձել է հարավամերիկյան ընտրական մրցաշարերում գոլերի ռեկորդակիրը։ Մեսսին Արգենտինայի հավաքականի կազմում 31 գոլ է խփել աշխարհի առաջնության ընտրական փուլում: Երկրորդ տեղը զբաղեցնում է Ուրուգվայի հավաքականի հարձակվող Լուիս Սուարեսը (29 գոլ):
Մեսսին իր նորամուտը ազգային հավաքականում նշել է 2005 թվականի օգոստոսի 17-ին։ 18 տարվա ընթացքում ֆուտբոլիստը անցկացրել է 178 հանդիպում, խփել 106 գոլ և կատարել 56 գոլային փոխանցում։ Արգենտինայի հետ Մեսսին հաղթել է Ամերիկայի գավաթը (2020/2021) և աշխարհի գավաթը (2022):
