«Արարատի» գլխավոր մարզիչ Գագիկ Սիմոնյանը IDBank Հայաստանի Պրեմիեր լիգայի 7-րդ տուրի «Շիրակի» դեմ խաղից հետո պատասխանել է լրագրողների հարցերին․
— Շնորհակալ եմ տղաներին նվիրվածության համար։ Հանդիպումը բավական բարդ ստացվեց։ Մրցակցի ֆուտբոլիստը շատ լավ գոլի հեղինակ դարձավ։ Հարվածը շատ լավ ստացվեց և հայտնվեցինք հետապնդողի դերքում։ Բայց լավ էր, որ առաջին կեսում կարողացանք ոչ միայն հետ բերել կորցրածը, այնպես էլ առաջ անցնել հաշվի մեջ։ Ուրախ եմ, որ կարողացանք երեք միավոր վաստակել նման բարդ խաղում։
— Ի՞նչ կասեք աջ պաշտպանի դիրքում այսօր հանդես եկած Քլինթոն Դոմբիլայի մասին։
— Նա բավական լավ որակներ ունեցող ֆուտբոլիստ է՝ պինդ է և արագաշարժ, ինչպես նաև լավ է հասկանում խաղը։ Առաջին կեսում մի փոքր դիրքային սխալներ արեց, ինչն ընթացքում շտկվեց։ Որպես առաջին խաղ, գոհ եմ իր ցուցադրած խաղից։
— «Շիրակի» կիսապաշտպան Կոդիան այսօր խաղում էր ոչ թե ձախ եզրից այլ աջից։ Արդյո՞ք դա անակնկալ էր Ձեզ համար։
— Ոչ, խաղասկզբում մենք արդեն գիտեինք, որ աջ եզրից է նա խաղալու։ Մեր պաշտպանության երկու եզրերի ֆուտբոլիստները՝ Սերոբ Գալստյանն ու Քլինթոն Դոմբիլան, արագ խաղացողներ են։ Ձախ եզրում խաղացող Ռազմիկ Հակոբյանն էլ հաճախ էր փոխօգնության գալիս։ Երկրորդ կեսում Կասիմ Հաջիին էլ հանձնարարեցինք ավելի շատ օգնել պաշտպաններին։ Դրա հետևանքով հարձակման գծում մի փոքր կիսատ էինք գործում, բայց պաշտպանությունում հստակ խաղացինք։
— Ի՞նչ կասեք Ռազմիկ Հակոբյանի տուգանայինների մասին։ Նա հաճախ է նման գոլեր խփում։
— Ռազմիկն այն ժամանակ է գոլ խփում, երբ պետք է հաղթենք։ Տուգանայինից նրա խփած յուրաքանչյուր գոլը մեզ երեք միավոր է բերում։
— Թիմին վերջերս միացած ֆուտբոլիստներն արդեն աստիճանաբար մերվում են թիմին։ Ըստ Ձեզ ձևարվորված թիմ ունե՞ք Ձեր տրամադրության տակ։
— Ունենք ևս մեկ ֆուտբոլիստ, որի հետ պայմանագիր ենք ստորագրել, և նա շուտով կմիանա թիմին։ Ունենք այն, ինչ ունենք։ Այս տղաներով պետք է շարունակենք մինչև տարվա վերջ։ Կփորձենք որքան հնարավոր է լավ հանդես գալ։ Այսօր Արմեն Նահապետյանը խաղալու հնարավորություն չստացավ, բայց ոչինչ, նա դեռ կխաղա։ Խաղավարտին դաշտ մտավ մեր նոր հարձակվող Բերտրան Մանին։ Նա բավական բարձրակարգ ֆուտբոլիստ է։ Թիմի համալրվածությունը նորմալ է։ Մենք կարող ենք այս թիմով ավելի լավ ֆուտբոլ խաղալ։
