Տարբեր քաշային կարգերում աշխարհի նախկին չեմպիոն Արթուր Աբրահամն Երևանում ներկա է բռնցքամարտի երիտասարդների Եվրոպայի առաջնությանը:
Արթուրն իրականացրել է նաև 63,5 կգ քաշային կարգում մրցանակակիր դարձած բռնցքամարտիկների պարգևատրման արարողությունն, ինչից հետո ArmSport-ի հետ զրույցում կիսվել է մեր մարզիկների ելույթներից ունեցած տպավորություններով:
«Մեր բոլոր տղաների ելույթը շատ բարձր եմ գնահատում: Բոլորն էլ մինչև հիմա շատ լավ են մենամարտել: Կա իհարկե փորձի պակաս, որը լրացվում է այսպիսի մրցաշարերի միջոցով: Ոչ մեկ աշխարհի չեմպիոն չի ծնվում. բոլորն էլ այսպիսի մրցումներում մի անգամ հաղթում են, հաջորդ անգամ գուցե երկրորդ, երրորդ տեղերը զբաղեցնեն:
Տեսեք, թե փոքր պետություն լինելով հանդերձ՝ արդեն իսկ որքան մեդալներ ենք նվաճել: Պետք է հպարտ լինենք մեր բռնցքամարտիկներով: Իհարկե, բոլորս էլ ցանկանում ենք , որ մեր մարզիկները միշտ առաջին տեղը զբաղեցնեն, բայց դա անհնար է: Պետք է ոգևորենք մեր մարզիկներին ու աջակցենք ինչով կարողանանք, որպեսզի հետագայում ավելի մեծ նվաճումների հասնեն: Նրանք աշխարհի ու Օլիմպիական խաղերի ապագա չեմպիոններ են»,- ասել է Աբրահամը:
Հիշեցնենք՝ 63,5 կգ քաշային կարգում հանդես եկող Արթուր Մկրտչյանն ու ևս 8 բռնցքամարտիկ Երևանում ընթացող երիտասարդների ԵԱ-ում դարձել է բրոնզե մեդալակիր: Հայաստանի մյուս ներկայացուցիչ, 57 կգ քաշային Գոռ Ազիզյանը նվաճել է երիտասարդների ԵԱ-ի արծաթե մեդալը:
Այսօր Հայաստանի ևս երկու ներկայացուցիչ ուժերը կչափի ԵԱ-ի եզրափակչում: