Հայաստանի հունահռոմեական ոճի ըմբշամարտի հավաքականի գլխավոր մարզիչ Արմեն Բաբալարյանն ամփոփել է թիմի ելույթները Խորվաթիայում անցկացված Եվրոպայի առաջնությունում, որտեղ հայ ըմբիշները 2 ոսկե և 1 բրոնզե մեդալ նվաճեցին:
«Ռուդիկ Մկրտչյանը այնքան էլ լավ հանդես չեկավ: Իր ելույթներից այնքան էլ գոհ չեմ, քանի որ կարող էր անել ավելին:
Գևորգ Ղարիբյանը վիրահատությունից հետո էր վերականգնվել, չէր մասնակցել միջազգային մրցաշարերի: Եվրոպայի առաջնությունում պարտվեց Էդմոնդ Նազարյանին ու իրավունք ստացավ պայքարելու բրոնզե մեդալի համար, որտեղ ցավոք պարտվեց:
Հրաչյա Պողոսյանը բրոնզե մեդալ նվաճեց, ինչի համար շնորհավորում եմ: Սա նրա առաջին մեդալն էր մեծահասակների Եվրոպայի առաջնությունում: Ցանկանում եմ, որ շարունակական լինեն հաջողությունները:
Սլավիկ Գալստյանից էլ գոհ չեմ: Անհասկանալի պատճառներով պարզվեց, շուտով հավաքներ ենք անելու, կխոսենք ու կհասկանանք, թե ինչ խնդիր կա:
Շանթ Խաչատրյանը լավ հանդես եկավ երկու գոտեմարտ հաղթելուց հետո հանդիպեց Սերբիան ներկայացնող աշխարհի անցած տարվա չեմպիոնին: 4-3 հաշվով հավասար պայքարից հետո պարտվեց: Շանթից այնքան էլ դժգոհ չեմ, թեև կարող էր ավելին անել:
Մալխաս Ամոյանը հերթական 3-4 գոտեմարտեր հաղթելուց հետո եզրափակչում հանդիպեց սերբ Նեմեշին: Ներքին ձայնս ինձ հուշում էր, որ Մալխասը չի պարտվելու: Իսկական չեմպիոնական բնավորություն էր: Հաղթելու ցանկությունը մեծ էր ու մինչև վերջին վայրկյանը պայքարեց՝ մեծ կամք դրսևորելով:
Սամվել Գրիգորյանը բավական վստահ մեկնարկեց, բայց հետո իր երիտասարդ անփորձ լինելն իրեն խանգարեց:
Վիգեն Նազարյանը երկու գոտեմարտ հաղթելուց հետո շվեյցարացի ըմբիշի հետ գոտեմարտում կոպիտ սխալ թույլ տվեց ու չկարողացավ հաղթանակի հասնել:
Արթուր Ալեքսանյանի ելույթին բնականաբար գերազանց գնահատական կտամ: Արթուրը մեկ ոտքով հաղթեց եզրափակչում, քանի որ առաջին վայրկյաններից մրցակիցը հարվածեց նրա ոտքին, հեմատոմա էր առաջացել. Արթուրը բնավորություն ցույց տվեց, ինչպես միշտ է անում:
Դավիթ Օվասափյանի մոտ արդեն դրական շարժ ենք նկատում: Հուսանք նա ավելի կավելացնի ու հաջորդ մրցումներում ավելի շատ կուրախացնի մեզ»:
