Ապրիլի 7-ին՝ մայրության և գեղեցկության օրը, անցկացվել է «Ուժը սեռ չունի» միջոցառումը՝ նվիրված սպորտում և սպորտից դուրս կարծրատիպերը կոտրելուն։
Նպատակ ունենալով ընդգծելու կանանց կարևոր դերը հասարակության մեջ, կոտրելու գենդերային կարծրատիպերը սպորտում և սպորտից դուրս, ինչպես նաև շեշտելով այն հանգամանքը, որ կանայք, բացի գեղեցիկ և նուրբ լինելուց, կարող են լինել նաև ուժեղ ամենատարբեր ոլորտներում, այդ թվում` սպորտում, «TotoGaming» ընկերությունը երկրորդ տարին անընդմեջ պարգևատրել է տարվա ընթացքում նշանակալի արդյունքներ ցույց տված 7 մարզուհիների, և խրախուսել ևս 3 կանանց, որոնք հայկական իրականության համար ոչ սովորական մասնագիտություններ ունեն։
300 հազարական դրամ մրցանակներին և հուշանվերներին արժանացել են պարափաուերլիֆտինգի աշխարհի չեմպիոն Գրետա Վարդանյանը, ծանրորդ Իզաբելլա Յայլյանը, բռնցքամարտիկ Անի Հովսեփյանը, դահուկորդ Կատյա Գալստյանը, թենիսիստ Անի Ամիրաղյանը, հրաձիգ Լիլիթ Մկրտչյանը, բասկետբոլիստ Լուսինե Սեդրակյանը, օդաչու Նադեժդա Բենկլյանը, հանքավայրի բեռնատարի վարորդ Արինե Առաքելյանը և շինարար Անուշ Մարգարյանը։
«Պատահական չէ, որ այս միջոցառումն անցկացնում ենք ապրիլի 7-ին։ Շնորհավորելով կանանց՝ միևնույն ժամանակ ցանկանում ենք ասել, որ «Ուժը սեռ չունի»։ Սա վերաբերում է թե՛ ֆիզիկական, թե՛ ներքին ուժին։ Այս տարի այս հարցին մի քանի կողմից ենք որոշել մոտենալ՝ հումորային Stand UP-ի, պանելային քննարկման և իհարկե իրենց ոլորտներում հաջողությունների հասած մարզուհիների և այլ մասնագիտություններ ունեցող կանանց պարգևատրությամբ»,- ասում է ընկերության PR և հաղորդակցության մասնագետ Աելիտա Չիլինգարյանը։
Նրա խոսքով՝ «Ուժը սեռ չունի» կարգախոսով ընկերությունն առաջնորդվում է ոչ թե միայն կանանց տոների, այլ ամբողջ տարվա ընթացքում․ «Մեկ ամիս առաջ էլ պարգևատրեցինք Ֆիզկուլտուրայի հայկական պետական ինստիտուտի՝ 2022 թվականի լավագույն ուսանողներին։ Նրանց թվում ևս կային կին մարզիկներ։
Փորձում ենք մեր օրինակով և քայլերով ավելի մեծ ուշադրության արժանացնել կին մարզիկներին։ Մենք խոսում ենք այնպիսի լուրջ խնդիրների և կարծրատիպերի մասին, որոնք հարյուրամյակների պատմություն ունեն, և մեկ քայլով դրանք լուծելը հնարավոր չէ։ Ամեն դեպքում, վստահ եմ՝ ցանկացած քննարկումը, մրցանակաբաշխությունը, հումորի միջոցով խնդիրների վերհանումը, անգամ կարգախոսն արդեն քայլ է՝ խնդրի կարգավորման ուղղությամբ»։
Միջոցառման շրջանակում տեղի ունեցած պանելային քննարկմանը մասնակցում էր նաև Հայաստանի ֆիզիկական կուլտուրայի և սպորտի պետական ինստիտուտի մարզական լրագրության ամբիոնի դասախոս Էվելինա Ղանթարչյանը, որն արդեն 18 տարի է ուսանողներին «Գենդերային գիտելիքներ» առարկան է դասավանդում․
«Շատ կարևորում եմ «ՏոտոԳեյմինգ»-ի այս նախաձեռնությունը՝ հասարակության կարծրատիպերը կոտրելու ճանապարհին։ Մենք ունենք բավական հզոր աղջիկներ, որոնք իրենց մարզաձևերում հաջող են հանդես գալիս, մեդալներ են նվաճում, բայց նրանց մասին ավելի քիչ է խոսվում, քան տղաների։ Կարևոր եմ համարում կանանց մասին խոսելը, ովքեր կարծրատիպեր են կոտրել և ինչ-որ բան են արել։ Նրանք կարող են մոտիվացնել իրենց հասակակիցներին՝ գնալ իրենց հետևից»,- ասում է Ղանթարչյանը։
Թենիսիստ Անի Ամիրաղյանի գնահատմամբ էլ՝ նմանօրինակ միջոցառումները եզակի են։
«Սա, իսկապես, բավական հետաքրքիր նախաձեռնություն է։ Հետաքրքիր է լսել մարդկանց կարծիքը կին-մարզիկների և առհասարակ կանանց մասին և փորձել օգնել կոտրել կարծրատիպերը։ Ինձ էլ տարիներ առաջ ասում էին՝ ինչո՞ւ ես թենիսով զբաղվում, սպորտը, թենիսը կնոջ համար չէ։ Ես դա միշտ էի լսում, բայց փորձում էի ուշադրություն չդարձնել»,- խոստովանում է Անի Ամիրաղյանն ու սպորտը սիրող աղջիկներին խորհուրդ տալիս նախևառաջ կամքի ուժ դրսևորել։
«Երբ ունես կամքի ուժ, պատրաստ ես ամեն ինչի դեմ գնալ։ Իսկ դա, անպայման, կտա իր դրական արդյունքը»։
Մարզուհիները խոստովանում են՝ լրացուցիչ ուշադրությունն ու գնահատված լինելու գիտակցումը շատ հաճելի է և մղում է նորանոր նվաճումների, իսկ ֆուտբոլիստ Դավիթ Մանոյանը ընդգծում է՝ այն, որ ուժը սեռ չունի ամեն տարի ապացուցում են հազարավոր կանայք թե՛ սպորտում և թե՛ սպորտից դուրս․ «Կարծրատիպերը կոտրելը հեշտ չէ, բայց անհնարին էլ չէ»։
