«Մի քանի տարի անց մեր մանկապատանեկան ֆուտբոլն ասելու է իր մասին»,- ArmSport-ի հետ զրույցում վստահություն է հայտնում Մակիչ Բզնունին՝ Գեղարքունիքի մարզի Մարտունի քաղաքը ներկայացնող «Կիլիկիա» ֆուտբոլային ակումբի գլխավոր մարզիչը: Հայաստանի մանկապատանեկան ֆուտբոլն անշուշտ ունի որակյալ շատ մասնագետների կարիք, բայց ըստ Բզնունու՝ ոլորտում ունենք մի քանի լավ մասնագետներ, որոնց շնորհիվ մեր մանկապատանեկան ֆուտբոլը սկսել է զարգացում ապրել:
«Կիլիկիա» ֆուտբոլային ակումբը գործում է 2016 թվականից և այժմ թիմում մարզվում են 7-15 տարեկան ավելի քան 120 երեխաներ ինչպես Մարտունի քաղաքից, այնպես էլ մոտակա գյուղերից։ Ինչ վերաբերվում է ակումբի անվանը, ապա այն բացարձակապես կապ չունի նախկինում Հայաստանի Բարձրագույն խմբի առաջնությանը մասնակցող ակումբի հետ։
4-ամյա գործունեությունից հետո իրականացավ «Կիլիկիայի» ֆուտբոլիստների վաղեմի երազանքը. ակումբն առաջին անգամ մասնակցում է Հայաստանի ֆուտբոլի մանկապատանեկան առաջնությանը: Թիմը հանդես է գալիս մինչև 15 տարեկանների մրցաշարի Բ2 ենթախմբում։ «Կիլիկիան» արդեն անցկացրել է 6 հանդիպում հոկտեմբերի 9-ից մեկնարկած առաջնությունում և այժմ մրցաշարային աղյուսակի 4-րդ հորիզոնականում է։ Ներկայումս վերսկսելով մարզումները՝ նրանք պատրաստվում են ապրիլի 15-ից մեկնարկող մրցաշրջանի հանդիպումներին։
«Մեծ լրջությամբ ենք մոտենում մարզումներին, քանզի այն խմբում, որտեղ մենք ենք հանդես գալիս կան բավականին լավ պատրաստված թիմեր: Այժմ մեր գլխավոր նպատակն է լավ ներկայանալ խաղերին և ձգտել խմբում առաջատար դիրք զբաղեցնել»,- ասում է թիմի գլխավոր մարզիչ Մակիչ Բզնունին:
«Հույս ունենք, որ, առաջին անգամ մասնակցելով մանկապատանեկան առաջնությանը, կկարողանանք առաջատար դիրքեր զբաղեցնել: Մեր թիմի համար կարևորը լավ ֆուտբոլ ցուցադրելն է և ամեն խաղից հետո մեր խաղամակարդակը բարելավելը: Կարծում եմ ֆուտբոլում կարևորը թիմային աշխատանքն ու հաղթելու ձգտում ունենալն է, ինչը մեր թիմում կա»,- ասում է թիմի կենտրոնական հարձակվող Հայկ Գևորգյանը:
«Կիլիկիայի» հենակետային կիսապաշտպան Նարեկ Զախարյանն էլ նշում է, որ չնայած մոտ չորս տարի է, ինչ մարզվում են, սակայն այս տարին իրենց համար շատ կարևոր է, որովհետև իրենց ձգտումը միշտ եղել է մանկապատանեկան առաջնությանը մասնակցելը և դա իրականացել է: Ըստ Նարեկի՝ սա լավ հնարավորություն է ցույց տալու իրենց չորս տարվա քրտնաջան աշխատանքի արդյունքը:
Մակիչ Բզնունին ձեռքբերումներից բացի նկատում է, որ Հայաստանում մանկապատանեկան ֆուտբոլի թիմերը զարգացման ճանապարհին ունեն բազում խնդիրներ. «Ինչպես և մարզերի մյուս մանկապատանեկան թիմերի մեծամասնության մոտ, մեր մոտ էլ գլխավոր խնդիրները կապված են մարզագույքի, մարզահագուստների ձեռքբերման, ինչպես նաև ճանապարհածախսերի հետ»: «Կիլիկիայի» մարզիչն ավելացնում է, որ առկա է նաև մարզադաշտի խնդիրը։ Այժմ թիմը մարզվում է Երանոս գյուղի մարզադաշտում և նույնիսկ թիմի առաջին պաշտոնական խաղում «Կիլիկիային» գրանցվել է տեխնիկական պարտություն՝ մարզադաշտի անհրաժեշտ չափանիշներին չհամապատասխանելու պատճառով։ Այդ իսկ պատճառով էլ թիմը հանդես է գալիս Մարտունու քաղաքային մարզադաշտում, որն համեմատական կարգով բարվոք վիճակում է, բայց ամեն դեպքում վերանորագման կարիք ունի:
Թիմը նաև ամեն ամառ ուսումնամարզական հավաք և ընկերական խաղեր է անցկացնում Վրաստանում և այս տարի էլ նախատեսված է այդպիսի հավաք հարևան երկրում։ Այդպիսի հավաքի կազմակերպման մեջ մեծ ներդրում ունեն ֆուտբլիստների ծնողները, ովքեր իրենց վրա են վերցնում բոլոր ծախսերը։
««Կիլիկիայում» կան բազմաթիվ լավ ֆուտբոլիստներ, որոնց հնարավորություն է տրվելու ցույց տալ իրենց լավագույն որակները: Մ15 տարեկանների հավաքականի գլխավոր մարզիչ Մհեր Միրումյանն էլ հետաքրքվել է մեր ֆուտբոլիստներով: Ունենք մեր թիմում ֆուտբոլիստներ, որոնք կարող են նույնիսկ հավաքականում հադես գալ»,- թիմի սաների որակներով ձեռքբերումներով հպարտանում է մարզիչը:
Մակիչ Բզնունուց տեղեկանում ենք նաև, որ թիմի ֆինանսական ծանրաբեռնվածությունն իր վրա է վերցրել մի բարերար։ Ակումբի նպատակը առաջիկա երկու տարվա ընթացքում Հայաստանի Առաջին խմբում մասնակցություն ունենալն է և թիմի ներկայիս հաջողությունները կարող են ներգրավվել նոր հովանավորների և ներդրողների, ովքեր հետաքրքրված կլինեն թիմի հետագա առաջընթացով։ Բզնունին նաև նշում է, որ հաջորդ մրցաշրջանից «Կիլիկիայի» մինչև 13 տարեկանների թիմը ևս կմասնակցի Հայաստանի ֆուտբոլի մանկապատանեկան առաջնությանը։
Վար Բաբայան
