Խորվաթիայի հավաքականը պատմության մեջ երրորդ անգամ մեդալ է նվաճում Աշխարհի առաջնություններում։
Այսօր՝ դեկտեմբերի 17-ին, ԱԱ-2022-ի երրորդ տեղի համար խաղում հանդիպեցին Մարոկկոյի և Խորվաթիայի հավաքականները։ Հիշեցնենք՝ թիմերն արդեն հանդիպել էին խմբային փուլի շրջանակում և այդ խաղում գրանցվել էր գոլազուրկ ոչ-ոքի։
Հանդիպման հենց մեկնարկից խորվաթներն սկսեցին շատ ակտիվ գործել՝ դիմելով բարձր պրեսինգի։ Եվ դա տվեց իր արդյունքը։ Հանդիպման 7-րդ րոպեին խորվաթ պաշտպան Գվարդիոլը բացեց հանդիպման հաշիվը։ Ի դեպ՝ Գվարդիոլը Խորվաթիայի հավաքականի ամենաերիտասարդ ֆուտբոլիստն է, ով գոլի հեղինակ է դարձել ԱԱ-ում․ նա այդ ցուցանիշով գերազանցեց Իվիցա Օլիչի ռեկորդը։
Բայց Դալիչի սաների ուրախությունը երկար չտևեց․ երկու րոպե անց Դարին հավասարեցրեց հաշիվը՝ 1-1։
Այս գոլային հրավառությունից հետո թիմերը շարունակեցին ակտիվ գործել՝ հաճախակի սպառնալով մրցակցի դարպասին։ Եթե մինչև 30-րդ րոպեն մի փոքր խաղային առավելություն ուներ Խորվաթիան, ապա խաղակեսի մնացած հատվածում ավելի ակտիվ էին մարոկկացիները։
Բայց այս խաղում երրորդ գոլը խփեցին ոչ թե Ռեգրագիի սաները, այլ՝ խորվաթները․ շատ գեղեցիկ գոլի հեղինակ դարձավ Օրսիչը՝ հաշիվը դարձնելով 2-1։
Երկրորդ խաղակեսը թիմերը ևս ակտիվ սկսեցին։ Մարոկկացիները կոմբինացիոն գրագետ խաղի շնորհիվ հաճախակի էին հասնում խորվաթների տուգանային հրապարակի մատույցներ, սակայն երկար ժամանակ սահմանափակվում էին այդքանով, որովհետև մրցակցի պաշտպանները չէին թողնում նրանց անել ավելին։ Փոխարենը, խորվաթներն ապավինում էին հակագրոհներին։
Հանդիպման 75-րդ րոպեին Էն Նեսերին շատ լավ հնարավորություն ստացավ հաշիվը հավասարեցնելու, բայց արդյունավետ ավարտել թիմակցի փոխանցումը նրա մոտ չստացվեց։ Իսկ տասը րոպե անց արդեն խորվաթներն ունեին իրենց առավելությունը մեծացնելու հնարավորություն, բայց Կովաչիչի հարվածը շեղ ստացվեց։
Այսպիսով երկրորդ խաղակեսում հանդիպման հաշիվը մնաց անփոփոխ․ մրցավարի վերջին սուլիչից հետո լուսատախտակին 2-1 էր՝ հօգուտ խորվաթների։ Խորվաթիան երկրորդ Մունդիալն անընդմեջ մրցաշարն ավարտում է մրցանակային տեղում։
Խորվաթիայի հավաքականը 7 անգամ մասնակցել է ԱԱ-ին, երեք անգամ դուրս է եկել փլեյ-օֆֆ փուլ։ Ամենահետաքրքիրն այն է, որ բոլոր երեք դեպքերում էլ թիմը հասել է նվազագույնը կիսաեզրափակիչ․ 1998 թվականին նվաճել է բրոնզե մեդալները, իսկ նախորդ ԱԱ-ում՝ 2018 թվականի մրցաշարում, դարձել է աշխարհի փոխչեմպիոն։ Այս անգամ նրանց ևս հաջողվեց նվաճել մեդալ՝ երկրորդ բրոնզը պատմության մեջ։
Խորվաթիայի հավաքականի մարզիչ Զլատկո Դալիչը հավաքականը մարզում է 2017 թվականից, և նրան միանշանակ կարող ենք համարել այդ երկրի պատմության մեջ ամենահաջողակ և առավելագույն արդյունք գրանցած մարզիչը։
Կիսաեզրափակչի ճանապարհին խորվաթները 1/8 եզրափակչում հետխաղյա 11 մետրանոց հարվաշարում հաղթել էին Ճապոնիայի հավաքականին, 1/4-ում՝ նորից 11 մետրանոցներով Բրազիլիային, իսկ ահա կիսաեզրափակչում 0-3 հաշվով զիջել արգենտինացիներին։
Իսկ ահա Մարոկկոյի հավաքականը, անկախ այսօրվա արդյունքից, արդեն իսկ հասել էր պատմական նվաճման․ մինչ այս ոչ մի աֆրիկյան հավաքական (նաև Արաբական աշխարհի ներկայացուցիչ) երբեք չէր հասել ԱԱ-ների կիսաեզրափակիչ։
Վալիդ Ռեգրագիի թիմն այս մրցաշարում 1/8 և 1/4 եզրափակչում հետագա պայքարից դուրս թողեց նախ Իսպանիայի, ապա Պորտուգալիայի հավաքականներին, իսկ կիսաեզրափակչում 0-2 հաշվով զիջեց մրցաշարի գործող չեմպիոն Ֆրանսիային։
Այսպիսով, Մարոկկոյի հավաքականը դարձավ այս մրցաշարի գլխավոր անակնկալներից մեկը, եթե ոչ գլխավորը։ Հատկանշական է, որ գլխավոր մարզիչ Ռեգրագին թիմի ղեկը ստանձնել էր ԱԱ-ի մեկնարկից ընդամենը մի քանի ամիս առաջ և այդ կարճ ժամանակահատվածում նա թիմի հետ կարողացավ գրանցել այսպիսի փայլուն արդյունք։ Տպավորիչ է․․․
Եվ վերջում հիշեցնենք, որ ԱԱ-2022-ի եզրափակչում կհանդիպեն Ֆրանսիայի և Արգենտինայի հավաքականները։ Հանդիպումը կկայանա վաղը՝ դեկտեմբերի 18-ին, և կմեկնարկի Երևանի ժամանակով 19։00-ին։
