Ֆուտբոլի աշխարհի 2022 թվականի առաջնության մեկնարկին հաշված օրեր են մնացել։ Նոյեմբերի 20-ից դեկտեմբերի 18-ը Կատարում կանցկացվի ԱԱ 2022-ը։
Armsport-ը շարունակում է ձեզ ծանոթացնել մրցաշարի խմբերի և մասնակից հավաքականների հետ։ Հերթը F խմբին է, որտեղ ընդգրկվել են Խորվաթիայի, Բելգիայի, Կանադայի և Մարոկկոյի հավաքականները։
Խաղացանկը
1-ին տուր
Նոյեմբերի 23, Մարոկկո — Խորվաթիա, 14։00
Նոյեմբերի 23, Բելգիա — Կանադա, 23։00
2-րդ տուր
Նոյեմբերի 27, Բելգիա — Մարոկկո, 17:00
Նոյեմբերի 27, Խորվաթիա — Կանադա, 20։00
3-րդ տուր
Դեկտեմբերի 1, Կանադա — Մարոկկո, 19։00
Դեկտեմբերի 1, Խորվաթիա — Բելգիա, 19։00
Հայտացուցակները
ԱԱ-2022․ Բելգիայի հավաքականի վերջնական հայտացուցակը
ԱԱ-2022․ Խորվաթիայի հավաքականի վերջնական հայտացուցակը
ԱԱ-2022․ Կանադայի հավաքականի վերջնական հայտացուցակը
ԱԱ-2022․ Մարոկկոյի հավաքականի վերջնական հայտացուցակը
Բելգիայի ոսկե սերնդի վերջին շանսը
Բելգիայի ազգային հավաքականը նոր բարձունքների է հասել այն բանից հետո, երբ Ռոբերտո Մարտինեսն ստանձնել է թիմի ղեկը՝ 2016 թվականի օգոստոսից։
Ռուսաստանում կայացած ԱԱ 2018-ում բրոնզե մեդալ նվաճելը միայն նպաստեց Բելգիայի հավակնություններին, որ 2022 թվականին թիմը փորձի դառնալ աշխարհի չեմպիոն։ Բելգիայի հավաքականին ներկայացնելու կարիք չկա։ Տիբո Կուրտուա, Կևին Դե Բրույնե, Էդեն Ազար, Ռոմելու Լուկակու․․․ նրանք այն խաղացողներն են, որ գրեթե ամեն շաբաթ փայլում են խաղադաշտում և մեր հեռուստաէկրաններին։
2014 թվականին Բրազիլիայում կայացած ԱԱ-ում բելգիացիները դուրս մնացին քառորդ եզրափակչից՝ զիջելով Արգենտինային։
2016 թվականին Ֆրանսիայում կայացած ԵՎՐՈ-ում բելգիացիները նորից դուրս մնացին քառորդ եզրափակչից՝ այս անգամ զիջելով Ուելսին։
Մարկ Ուիլմոթսին փոխարինեց Ռոբերտո Մարտինեսը, որի գլխավորությամբ Բելգիայի հավաքականը ԱԱ 2018-ում հասավ մինչև կիսաեզրափակիչ, բայց պարտվեց Ֆրանսիային։ Երրորդ տեղի համար պայքարում Բելգիան հաղթեց Անգլիային։
Եվրո 2020-ում բելգիացիները հերթական խոշոր մրցաշարից դուրս մնացին քառորդ եզրափակչից՝ պարտվելով ապագա չեմպիոն Իտալիային։
Բելգիայի հավաքականի հիմնական աստղերը բոլորվին էլ երիտասարդ չեն։ Գուցե նրանցից շատերի համար սա լինի վերջին խոշոր մրցաշարը։ Բելգիայի ոսկե սերնդի ներկայացուցիչները վերջին շանսն ունեն իրենց անունները ոսկե տառերով պատմության մեջ գրելու համար։
Խորվաթիայի թարմացված հավաքականը
Խորվաթիայի հավաքականը եվրոպական և նույնիսկ համաշխարհային ֆուտբոլի վերջին տարիների հայտնությունն է։ Այն, թե ինչպես է ընդամենը 4 մլն բնակչություն ունեցող երկրի հավաքականը խաղում վերջին տարիներին, պարզապես ապշեցնող է։
2018 թվականին թիմը սենսացիա գրանցեց՝ հասնելով աշխարհի առաջնության եզրափակիչ, որտեղ գոլառատ խաղում պարտվեց Ֆրանսիային (2:4): Խորվաթները ԱԱ 2022-ի ընտրական փուլում կարողացան խմբում առաջին տեղը զբաղեցնել, իսկ Ազգերի լիգայի խաղարկությունում դուրս եկան եզրափակիչ փուլ Նիդերլանդների, Իտալիայի և Իսպանիայի հավաքականների հետ։ Զլատկո Դալիչի թիմը լուրջ հավակնություններ ունի: Խորվաթների կազմը լրջորեն թարմացվել է՝ ԱԱ 2018-ի համեմատ։
Գրեթե բոլոր դիրքերում երիտասարդներ են ընդգրկվել, որոնք թե Ազգերի լիգայում, թե ԱԱ 2022-ի ընտրական փուլում ապացուցեցին, որ կարող են փոխարինել վետերաններին։
Թերևս միայն Լուկա Մոդրիչն է, որը տարիների ընթացքում ոչ թե չի ծերանում, այլ նույնիսկ երիտասարդանում է։ Այնուամենայնիվ, «Ռեալի» կիսապաշտպանի համար այս մրցաշարի հանդիպումները վերջինը կլինեն ազգային հավաքականի կազմում։
Կանադայի հավաքականի վերադարձը Մունդիալ 36 տարի անց
36 տարի անց Կանադայի հավաքականը նորից կմասնակցի աշխարհի առաջնությանը։ Եվ այս հաջողության գլխավոր «մեղավորներից» մեկը թիմի մարզիչ Ջոն Հերդմանն է։
Դատելով վերջին ընկերական խաղերից` Հերդմանը չնայած մի շարք փորձերին, կիրառելու է 3-4-1-2 տակտիկական սխեման։ Նրա խոսքերով՝ թիմը պետք է ազատություն ունենա։ Կանադացիների գլխավոր զենքը հակագրոհներն են։
Թիմի գլխավոր աստղը Ալֆոնսո Դեյվիսն է, որը հաստիքային ձախ պաշտպան է, սակայն գործելու է առջևի գծում, որպեսզի առավելագույնս վտանգավոր լինի մրցակիցների համար։ Մյունխենի «Բավարիայի» 21-ամյա ֆուտբոլիստն իր արագությամբ և տեխնիկայով ապահովելու է Կանադայի հավաքականի գրոհների կառուցումն ու զարգացումը։
Հարձակման գծում պետք է առանձնացնել «Լիլի» հարձակվող Ջոնաթան Դևիդին, որը միջազգային 34 խաղերում դարձել է 22 գոլի հեղինակ։ Ֆրանսիական ակումբի նախկին գլխավոր մարզիչ Քրիստոֆ Գալտիեն ասել է, որ Դևիդն ամենաբարդ ֆուտբոլիստներից մեկն է, որի հետ նա երբևէ աշխատել է։ Դևիդ/Դեյվիս զույգն իսկապես կարող է սարսափեցնել ցանկացած մրցակցի։
1986 թվականին Մեքսիկայում կայացած աշխարհի առաջնությունը միակն է եղել Կանադայի հավաքականի համար։ Կանադացիները պարտվել են խմբում բոլոր 3 խաղերում։ Նախ՝ Եվրոպայի գործող չեմպիոն Ֆրանսիայից նվազագույն հաշվով պարտություն են կրել՝ Ժան Պյեր Պապենի գոլի շնորհիվ, այնուհետև միևնույն 0։2 հաշվով զիջել են Հունգարիայի և ԽՍՀՄ հավաքականներին։
Մարոկկոյի հավաքականը՝ նոր գլխավոր մարզչով
Մարոկկոյի համար ԱԱ 2022-ը կլինի 6-րդ Մունդիալը։ Մրցաշարի մեկնարկից երեք ամիս առաջ Վալիդ Ռեգրագին ստանձնել է թիմի ղեկը և շատ հարցեր մնացել են անպատասխան։ Չնայած բոլոր ցնցումներին, նոր մարզչի շուրջ զգալի ոգևորություն կա:
Սխալ կլիներ չնշել թիմի նախկին մարզիչ Վահիդ Հալիլհոջիչի ջանքերի մասին, որի օրոք Մարոկկոյի հավաքականը լավագույն արդյունքը ցուցադրեց աֆրիկյան թիմերի շրջանում։
Մարոկկոն կատարյալ ցուցանիշ ունեցող միակ թիմն էր որակավորման երկրորդ փուլի ընթացքում՝ հաղթելով Գվինեայի, Գվինեա-Բիսաուի և Սուդանի դեմ բոլոր վեց հանդիպումներում: Մարոկկոն Կոնգոյին հաղթեց ընդհանուր 5։2 հաշվով։ Չնայած այդ հաղթանակներին, թիմի ներսում լարված մթնոլորտ էր։ Իսկ իրավիճակը ծայրահեղ դարձավ, երբ մարզիչը թիմից հեռացրեց այնպիսի աստղերի, ինչպիսիք են «Չելսիի» կիսապաշտպան Հակիմ Զիեշը և Մյունխենի «Բավարիայի» խաղացող Նուսաիր Մազրաուին: Երկրպագուների դժգոհության մեծ ալիք բարձրացավ։
Հասարակության այդ ամբողջ ճնշումը` զուգորդված լրատվամիջոցների ինտենսիվ ինտենսիվ հրապարակումներով, վերջ դրեց Հալիլհոջիչի աշխատանքին, որը օգոստոսին հեռացվեց իր զբաղեցրած պաշտոնից Մարոկկոյի թագավորական ֆուտբոլի ֆեդերացիայի կողմից: Նմանատիպ դեպքեր Հալիլհոջիչի կարիերայում արդեն գրանցվել էին՝ Ալժիրի, Ճապոնիայի և Կոտ՛Դիվուարի հավաքականներում։
Բնականաբար, Հալիլհոջիչի հեռանալուց հետո թիմ են վերադարձել Զիեշն ու Մազրաուին։
Մարոկկոյի հավաքականի գլխավոր աստղը, թերևս ՊՍԺ-ի պաշտպան Աշռաֆ Հակիմին է։ Նրանից ևս սպասելիքները մեծ են։ Թեև շատ բարդ խումբ է ստացվել, բայց Մարոկկոյի հավաքականը, անկասկած, խնդիրներ է ստեղծելու բոլոր մրցակիցների համար։
