Հայաստանի գործող չեմպիոն «Փյունիկը» կարող է եվրագավաթային փլեյ-օֆֆ փուլի ուղեգիր նվաճել։ Դա պատմական նշանակություն կունենա հայկական ֆուտբոլի համար։ Դեռևս 2 տարի առաջ մեր թիմերը մեծ դժվարությամբ էին հասնում եվրագավաթային մրցաշարային որակավորման փլեյ-օֆֆ, իսկ հիմա կա իրական հնարավորություն տեսնելու Հայաստանի չեմպիոնին Կոնֆերենցիաների լիգայի փլեյ-օֆֆում։ Նոյեմբերի 3-ին՝ Վազգեն Սարգսյանի անվան «Հանրապետական» ստադիոնում «Փյունիկը» կհյուրընկալի Շվեյցարիան ներկայացնող «Բազելին»։ Armsport-ը ներկայացնում է, թե ինչ իրավիճակ է այս խմբում և ինչ կարելի է սպասել առաջիկա հանդիպումից։
Իրավիճակը H խմբում
5 տուրից հետո այս խմբում թիմերը տեղակայվել են հետևյալ կերպ․
- «Սլովան» — 8 միավոր
- «Բազել» — 8 միավոր
- «Փյունիկ» — 6 միավոր
- «Ժալգիրիս» 5 միավոր
Կոնֆերենցիաների լիգայի խմբերում առաջին տեղ զբաղեցրած թիմերը նվաճելու են 1/8 եզրափակչի, իսկ 2-րդ տեղ զբաղեցրած թիմերը՝ 1/16 եզրափակչի ուղեգիր։
Ըստ կանոնակարգի՝ հավասար միավորների դեպքում նախապատվությունը տրվում է միմյանց միջև խաղերում գրանցած արդյունքներով լավագույն թիմին։ Օրինակ՝ «Փյունիկը» հաղթում է «Բազելին», իսկ «Սլովանը» ոչ-ոքի է խաղում «Ժալգիրիսի» հետ։ «Ժալգիրիսը» 6 միավորով մնում է վերջին տեղում, «Բազելը» 8 միավորով հայտնվում է 3-րդ տեղում։ «Փյունիկն» ու «Սլովանն» ունենում են 9-ական միավոր, բայց առաջին տեղ է բարձրանում Հայաստանի չեմպիոնը, քանի որ տանը հաղթել է «Սլովանին» 2։0, իսկ հյուրընկալվելիս պարտվել 1։2 հաշվով։ Այսինքն՝ միմյանց միջև խաղերի արդյունքում առավելություն ունի։
Հայաստանի չեմպիոնին միայն հաղթանակ է հարկավոր։ Իսկ կախված զուհագեռ խաղի ելքից, կվճռվի, թե որ տեղում կհայտնվի «Փյունիկը»։ Այսինքն՝ «Բազելին» հաղթելու դեպքում երևանյան թիմը նվազագույնը կապահովի խմբում երկրորդ տեղը, իսկ «Սլովանի» չհաղթելու դեպքում, «Փյունիկը» կբարձրանա առաջին տեղ։ Այս սցենարն ավելի ցանկալի և նպատակահարմար է։
Ի՞նչ արդյունքներ են գրանցել թիմերը նախորդ խաղերում
Այս թիմին արդեն քիչ թե շատ ծանոթ ենք։ Կոնֆերենցիաների լիգայի խմբային փուլի առաջին տուրում Շվեյցարիայում «Փյունիկին» հյուրընկալած «Բազելը» հաղթել էր 3։1 հաշվով։ Առաջին կեսի միջնամասում թիմերը փոխանակվել էին գոլերով, իսկ երկրորդ կեսում՝ տանտերերը ևս 2 գոլ էին խփել։ Այո, կարելի է հիշել մրցավարին, «Բազելի» ֆուտբոլիստներին, որոնք գոլային գրոհի սկզբում դուրս չհանեցին գնդակը, երբ «Փյունիկի» ֆուտբոլիստը խոտածածկին էր։
Բայց այս ամենը կապ չունի առաջիկա խաղի հետ։ Հիմա «Փյունիկին» միայն հաղթանակ է հարկավոր։ Առանձին խաղում կարող է պատահել ինչ ասես։ Այո, «Բազելն» այս խմբի ամենալավ կազմ ունեցող, ամենամեծ բյուջե ունեցող թիմն է։ Բայց, ինչպես ասում են, դա դեռ թղթի վրա է։ Քանի դեռ կան մաթեմատիկական շանսեր, ապա պետք է պայքարել՝ նույնիսկ ամենահզոր մրցակցի հետ։
Իսկ արդյո՞ք այդքան հզոր է «Բազելը»։ Մեկնարկային 2 տուրում 2 հաղթանակ տանելուց հետո շվեյցարական թիմը, մեղմ ասած, չի տպավորում։ Վերջին 3 խաղերում թիմը նվազագույնը 2-ական գոլ է բաց թողել։
Իսկ «Փյունիկը» թեկուզ ավելի քիչ միավոր ունի, բայց 2 հաղթանակ է տարել «չոր» հաշվով։ «Բազելին» դա հաջողվել է ընդամենը 1 անգամ։
Եղիշե Մելիքյանի գլխավոր թիմն անցկացրած 5 խաղերում էլ դժավարություններ է ունեցել։ Եվ դա նորմալ է։ Իսկ տպավորիչ է այն, որ բոլոր խաղերում էլ թիմը լավ տեսք է ունեցել՝ նույնիսկ պարտված հանդիպումներում։ Նույն «Սլովանը» նախորդ տուրում սեփական հարկի տակ «Փյունիկին» կարողացել է հաղթել երևանյան թիմի պաշտպանությունում գրանցված կոպիտ սխալի պատճառով, այլ ոչ թե նրա համար, որ բյուջեով ու հնարավորություններով զգալիորեն գերազանցում է «Փյունիկին»։
Մելիքյանը կարողացել է այնպիսի մարտավարություն և խաղ ներդնել թիմում, որ յուրաքանչյուր հանդիպմանը «Փյունիկն» իրական շանսեր է ունենում հաջողության հասնելու, ոչ թե խաղից առաջ դատապարտված է լինում։
Ի՞նչ սպասել առաջիկա խաղից
Չնայած այն հանգամանքին, որ հաղթանակն ավելի շատ հարկավոր է «Փյունիկին», իսկ «Բազելին» կարող է բավարարել անգամ ոչ-ոքին, միևնույնն է, Հայաստանի չեմպիոնն ինքնամոռաց չի նետվի առաջ։ Գրեթե վստահ եմ, որ Մելիքյանն ինչ-որ բան է պատրաստել մրցակցի համար, բայց դժվար է ասել, թե երբ ու ինչ պարագայում կկիրառի այն։ Մի բան հստակ է․ «Փյունիկը» մեծ ուշադրություն պետք է դարձնի պաշտպանությանը, որպեսզի ժամանակից շուտ չկոտրվի։
Իսկապես դժվար է ասել, թե ինչ ընթացք կունենա հանդիպումը։ Ցանկացած սխալ, կարող է ճակատագրական լինել։ Ենթադրում եմ, որ երկու կողմերն էլ զգուշավորություն կցուցաբերեն՝ գոնե առաջին խաղակեսում, բայց, ինչպես արդեն նշեցի, անակնալ կարելի է սպասել Եղիշե Մելիքյանից։
Ի՞նչ կտա Կոնֆերենցիաների լիգայի փլեյ-օֆֆ դուրս գալը «Փյունիկին» և հայկական ֆուտբոլին
Այստեղ օգուտները շատ են։ Նախ՝ պատմական հաջողություն կլինի, որ հայկական ակումբը դուրս գա այսպես կոչված «եվրագավաթային գարուն»։ Բացի այդ, ֆինանսական կողմը նույնպես կարևոր է։ Խմբում առաջին տեղը գրաված թիմը կստանա 650 հազար եվրո, երկրորդ տեղը գրաված թիմը՝ 325 հազար եվրո։
Ակումբն ՈՒԵՖԱ-ի վարկանիշային աղյուսակում կարող է բարելավել դիրքերը։ Ընդհանուր առմամբ, դրական կողմերը շատ են։ Պետք է պարզապես սպասել խաղին, գնալ ստադիոն, աջակցել «Փյունիկին»։
Հայ ֆուտբոլասերները շատ են հիասթափության պահեր ապրել։ Գուցե եկել է ժամանակը, որ սառույցը կոտրվի։ Եթե Կոնֆերենցիաների լիգայի խմբային փուլում հայտնվելը շատեր կարող են կապել մրցաշարի ցածր կարգի կամ բախտի գործոնի հետ, ապա խմբից դուրս գալը միայն քրտնաջան և ճշգրիտ աշխատանքի արդյունքում կարող է լինել։
Այդ պատճառով էլ, մոռանում ենք մինչ այս կայացած խաղերը, արդյունքները, սխալները, դրական և բացասական պահերը և նոյեմբերի 3-ին գնում ենք մարզադաշտ՝ աջակցելու Հայաստանի չեմպիոնին։
«Փյունիկը» կարող էր նախորդ տուրում ապահովել իր տեղը փլեյ-օֆֆում, սակայն պարտվեց «Սլովանին»։ Կարծում եմ, որ բացի վերոնշյալ պատճառներից, կա մի հանգամանք ևս, որն ազդեց այդ խաղի ելքի վրա։ Դա մեծ ճնշումն է։ Այո, Մելիքյանն անընդհատ փորձում է այդ ճնշումը թեքել այլ կողմ, երբեմն իր կողմը, մաքսիմալ փորձում է հեռացնել ֆուտբոլիստներից։ Բայց դժվար է պատկերացնել, որ «Փյունիկի» ֆուտբոլիստները չեն տրվում էմոցիաներին և չեն թուլանում։
Հիշեք նախորդ մրցաշրջանը։ Քչերն էին հավատում, որ «Փյունիկը» կարող է դառնալ Հայաստանի չեմպիոն, բայց թիմն ապացուցեց, որ ֆուտբոլում անհնարին ոչինչ չկա։
Եզրափակելով, ուզում եմ նշել, որ հիմա իմաստ չունի հաշվել/նայել, թե հաղթելու դեպքում որտե՞ղ և ո՞ր թիմի հետ կխաղա «Փյունիկը»։ Դրա ժամանակը կգա, եթե ժողովրդական ասացվածքին հետևենք՝ «Առուն թռի` նոր ասա հոպ»։
«Փյունիկ» — «Բազել» հանդիպումը կկայանա նոյեմբերի 3-ին՝ Վազգեն Սարգսյանի անվան «Հանրապետական» ստադիոնում։ Խաղի սկիզբը՝ 21։45-ին։ Նոյեմբերի 3-ը կարող է մտնել հայկական ֆուտբոլի պատմության մեջ։
Միհրան Ալեքսանյան
