«Մինչև հիմա չեմ հավատում, որ Եվրոպայի չեմպիոն եմ դարձել»: Այս մասին ArmSport-ի հետ զրույցում ասել է բռնցքամարտի Եվրոպայի կանանց առաջնության չեմպիոն հռչակված Անի Հովսեփյանը:
«Շատ երկար էի սպասել մեդալին: Անբացատրելի զգացողություններ ունեցա, երբ ձեռքիս մեջ շոշափեցի ոսկե մեդալը: Շատ ուրախ և հպարտ եմ, որ կարողացա իմ երկրին ինչ-որ չափով ուրախացնել և հպարտության պահեր պարգևել իմ ընկերներին և հարազատներին»,- ավելացնում է մարզուհին:
Անդրադառնալով անցկացրած մենամարտերին՝ Անին առանձնացնում է եզրափակիչն իռլանդացի մարզուհու հետ. «Եզրափակիչն ավելի բարդ ստացվեց: Գիտենք, որ Իռլանդիայի բռնցքամարտի դպրոցը շատ ուժեղ է: Ամեն դեպքում, կարողացա պատվով հաղթահարել»:
Անին, հիշեցնենք, դարձել է Հայաստանի պատմության առաջին կին բռնցքամարտիկը, որը Եվրոպայի մեծահասակների առաջնության չեմպիոն է հռչակվել: Ասում է՝ իր համար դա մեծ պատիվ և պատասխանատվություն է.
«Այս ոսկե մեդալն իմ նոր նվաճումների լավ սկիզբն է լինելու: Ամեն ինչ անելու եմ, որ այս հաջողությունը կրկնեմ նաև Աշխարհի և Օլիմպիական խաղերում: Բոլոր մարզիկների գերագույն նպատակներից մեկն Օլիմպիական խաղերն են: Ամեն ինչ կանեմ, որ լինեմ Հայաստանի օլիմպիական հավաքականում»:
Ի դեպ, Անի Հովսեփյանն առաջնության ընթացքում նաև ընտրվել է EUBC-ի (Սիրողական բռնցքամարտի եվրոպական ֆեդերացիա) մարզիկների գործկոմի անդամ։ Ընտրությունը կատարվել է բռնցքամարտիկների կողմից։ Գործկոմում են նաև մեկական կին և տղամարդ բռնցքամարտիկներ։ Նրանք գործկոմում կբարձրացնեն բռնցքամարտիկներին վերաբերող հարցեր։
«Մարզիկների շրջանում որևէ խնդրի և բարդության դեպքում կարող եմ հուզող հարցերը բարձրացնել գործկոմում: Կկարողանամ նաև առաջարկներ անել, խոսել թերի և ոչ թերի իրավիճակներից»:
Բռնցքամարտի կանանց հավաքականի գլխավոր մարզիչ Ռաֆայել Մեհրաբյանն էլ ընդգծել է՝ տարիներ շարունակ երազել է, որ հայ մարզուհիներից մեկը կանգնի պատվո հարթակի վերին աստիճանին. «Սա տարիների քրտնաջան աշխատանքի արդյունք է:
Աշխարհի առաջնությունից հետո աղջիկներին ասացի, որ եթե հաջորդ մրցմանը ձախողվեն ու մեդալ չնվաճեն, կհեռանամ հավաքականից: Աղջիկները սկսեցին լաց լինել, ես ևս չկարողացա զսպել հուզմունքս: Շատ ուրախ եմ այս արդյունքի համար ու շնորհակալ եմ մեր մարզուհիներին: Հիմա արդեն նպատակը Փարիզի օլիմպիական խաղերին ու մեդալային պայքարին մասնակցելն է: Ոչինչ չենք խնայի և կանենք ամեն բան, որպեսզի հասնենք մեր նպատակին»:
Հիշեցնենք՝ Հայաստանի կանանց հավաքականի կազմում բրոնզե մեդալներ էլ նվաճել են 54 կգ քաշային Եկատերինա Սիչևան և 63 կգ քաշային Սոնա Հարությունյանը՝ կանգնելով պատվո հարթակի երրորդ աստիճանին։