Ի՞նչ վիճակով է Հայաստանի հավաքականը մոտենում Ազգերի լիգայի վերջին խաղերին

Հայաստանի Ազգային հավաքականը սեպտեմբերի 24-ին և 27-ին կանցկացնի Ազգերի լիգայի խաղարկության B դիվիզիոնի խմբային փուլի վերջին 2 հանդիպումները ։ Նախ՝ մեր ընտրանին կհյուրընկալի Ուկրաինային, իսկ հետո արտագնա խաղում կմրցի Իռլանդիայի հավաքականի հետ։ Armsport-ը ներկայացնում է, թե ինչ իրավիճակ է Հայաստանի հավաքականի խմբում և ինչ կարելի է սպասել Խոակին Կապառոսի գլխավորած թիմից։

Իրավիճակը խմբում

Ազգերի լիգայի խմբային փուլում մնացել է 2 տուր։ 5-րդ տուրում Հայաստանի հավաքականը կընդունի Ուկրաինային, իսկ Շոտլանդիան՝ Իռլանդիային։ Եթե Հայաստանի հավաքականը պարտվի Ուկրաինային, իսկ Իռլանդիան հաղթի Շոտլանդիային, ապա վերջին տուրից առաջ իռլանդացիները կունենան 7, իսկ Հայաստանը 3 միավոր։ Արդյունքում, մենք կմնանք վերջին տեղում և կնահանջենք C դիվիզիոն։

Մյուս իրավիճակը․ եթե Հայաստանը պարտվի Ուկրաինային, իսկ Շոտլանդիան և Իռլանդիան ոչ-ոքի խաղան, ապա ամեն ինչ կվճռվի վերջին տուրում։

Պետք է նշել մի կարևոր հանգամանք։ Ըստ Ազգերի լիգայի կանոնակարգի, եթե 2 թիմեր հավասար միավորներ են հավաքել, ապա լրացուցիչ ցուցանիշներով առաջին կետը միմյանց միջև խաղերի արդյունքն է։ Այս պարագայում մենք առավելություն ունենք միայն Իռլանդիայի հանդեպ, քանի որ տանը հաղթել ենք 2։0 հաշվով։

Բնականաբար, չենք դիտարկում այն իրավիճակը, երբ Հայաստանն ու Իռլանդիան հաղթանակներ կտանեն 5-րդ տուրում։ Այդ դեպքում բոլոր հաշվարկները կարելի է անել միայն վերջին տուրից առաջ։

Ստացվում է, որ ոչինչ դեռ կորած չէ։ Պետք է պայքարել։ Այո, ուկրաինացիները կրկնակի մոտիվացիայով կժամանեն Երևան, քանի որ սեպտեմբերի 21-ին 0։3 հաշվով պարտվել են Շոտլանդիային։ Ուկրաինայի թիմը կարգով ավելի բարձր է և առավելություն ունի Հայաստանի հավաքականի նկատմամբ, բայց այնպես չէ, որ Կապառոսի թիմը դատապարտված է։ Ինչպես արդեն նշեցի, նույնիսկ պարտության դեպքում, մեզ կարող է օգնել Շոտլանդիայի հավաքականը՝ զուգահեռ խաղում միավորներ խլելով իռլանդացիներից։

Հայտացուցակը

Հայաստանի Ազգային հավաքական են հրավիրվել հետևյալ ֆուտբոլիստները։

Դարպասապահներ

Դավիթ Յուրչենկո — «Փյունիկ»
Ստանիսլավ Բուչնև «Փյունիկ»
Արսեն Բեգլարյան — «Ուրարտու»

Պաշտպաններ

Վարազդատ Հարոյան — «Անորտոսիս» (Կիպրոս)
Հովհաննես Համբարձումյան — «Անորտոսիս» (Կիպրոս)
Անդրե Չալըշըր — «Սիլկեբորգ» (Դանիա)
Ժորդի Արարատ — «Ինդեպենդիենտե Մեդեյին» (Կոլումբիա)
Տարոն Ոսկանյան — «Ալաշկերտ»
Հրայր Մկոյան — «Արարատ»
Ժիրայր Մարգարյան — «Ուրարտու»
Հակոբ Հակոբյան -«Արարատ-Արմենիա»
Ստյոպա Մկրտչյան — «Արարատ-Արմենիա»

Կիսապաշտպաններ/Հարձակվողներ

Խորեն Բայրամյան — «Ռոստով» (Ռուսաստան)
Էդուարդ Սպերցյան — «Կրասնոդար» (Ռուսաստան)
Արթուր Սերոբյան — ԲԿՄԱ
Տիգրան Բարսեղյան — «Սլովան» (Սլովակիա)
Վահան Բիչախչյան — «Պոգոն» (Լեհաստան)
Լուկաս Սելարայան — «Քոլամբուս Քրյու» (ԱՄՆ)
Ժիրայր Շաղոյան — ԲԿՄԱ Սոֆիա (Բուլղարիա)
Արտակ Դաշյան — «Փյունիկ»
Հովհաննես Հարությունյան — «Փյունիկ»
Արտակ Գրիգորյան — «Ալաշկերտ»
Կարեն Մուրադյան — «Արարատ-Արմենիա»
Սերգեյ Մկրտչյան — «Ուրարտու»
Սերոբ Գալստյան — «Արարատ»

Դարպասապահները

Հայաստանի հավաքականի դարպասապահ լինելը, մեղմ ասած, նման է ականապատ տարածքով քայլելուն։ Եթե ամբողջ թիմը վատ գործի տվյալ գրոհի ժամանակ՝ սկսած առաջին պաշտպանական գիծ համարվող հարձակվողներից մինչև վերջին պաշտպան, իսկ դարպասապահը գոլ բաց թողնի, ապա շատերը կմոռանան նրա առջև կանգնած 10 հոգուն և կսկսեն քարկոծել դարպասապահին։ Յուրչենկոն արդեն ապացուցել է, որ իր վրա կարելի է հույս դնել, իսկ սխալներից ոչ ոք ապահովագրված չէ։

Պաշտպանները

Պաշտպանությունում փոքր-ինչ անհանգստացնում է մեր ընտրանու ավագ Վարազդատ Հարոյանի՝ կիպրական «Անորտոսիսի» կազմում քիչ խաղաժամանակ ստանալը։ Միջազգային դադարից առաջ կայացած Կիպրոսի առաջնության խաղում Հարոյանը փոխարինման էր մտել 43-րդ րոպեին։

Հունիսի 14-ին Ազգերի լիգայի խաղարկության 4-րդ տուրի Շոտլանդիայի դեմ խաղից հետո Հարոյանը նոր թիմի կազմում մասնակցել է ընդամենը 2 պաշտոնական խաղի։ Կիպրոսի առաջնության 1-ին և 3-րդ տուրերում ընդգրկված չի եղել հայտացուցակում, 2-րդ տուրում էլ խաղացել է 9 րոպե։ Փոխարենը, լավ մարզավիճակում է «Անորտոսիսի» մեկ այլ հայ պաշտպան Հովհաննես Համբարձումյանը։ Վերջինս մասնակցել է ընթացիկ մրցաշրջանի բոլոր 4 խաղերին և գոլի հեղինակ դարձել Կիպրոսի առաջնության 3-րդ տուրի «Կարմիոտիսայի» հետ խաղում։

Հավաքական է վերադարձել Անդրե Չալըշըրը, որը բաց էր թողել նախորդ խաղերը վնասվածքի պատճառով։ Հայտացուցակում են նաև Տարոն Ոսկանյանը, Ստյոպա Մկրտչյանը և Հրայր Մկոյանը։ Վերջինս ամբողջական հանդիպում է անցկացրել Ազգերի լիգայի խմբային փուլի առաջին 4 խաղերում։ Եվ դա այն դեպքում, որ Մկոյանը 36 տարեկան է։ Կարծում եմ, որ դա ավելի շատ կապված էր Չալըշըրի բացակայության հետ։ Հիմա ընդամենը 2 խաղ է լինելու և ընտրության հնարավորությունն էլ մեծ է։

Ձախ պաշտպանի դիրքում կորուստներ ունենք։ Արման Հովհաննիսյանն ու Կամո Հովհաննիսյանը որակազրկված են, ուստի չեն ընդգրկվել հայտացուցակում։

«Ուրարտուի» նորընծա ավագ Ժիրայր Մարգարյանը հրավիրվել է հավաքական։ Վերջինս ակումբում կայուն խաղաժամանակ է ստանում և իրեն լավ դրսևորում։ Կարող ենք սպասել, որ հենց նա կլինի թիմի հիմնական ձախ պաշտպանն այս խաղերում։ Կա նաև տարբերակ, որ պաշտպանության եզրերում կգործեն Ժոա Ժորդի Մոնրոյ Արարատն ու Հովհաննես Համբարձումյանը։ Չի բացառվում, որ Խոակին Կապառոսը կընտրի 3 կենտրոնական պաշտպանով խաղային սխեմա։

Կիսապաշտպաններն ու հարձակվողները

Կիսապաշտպանությունում ևս խնդիրները շատ չեն։ Բայրամյանը, Սպերցյանը, Դաշյանը և Հարությունյանը, ինչպես Նաև Բարսեղյանը, կայուն խաղաժամանակ են ստացել իրենց ակումբներում։

Փայլում է Սպերցյանը, որը Ռուսաստանի առաջնության 10 տուրերից հետո դարձել է 8 գոլի և 3 գոլային փոխանցման հեղինակ։ Արտակ Դաշյանը Կոնֆերենցիաների լիգայի խմբային փուլի մեկնարկային երկու խաղերում էլ գոլ է խփել։

Հենակետային գոտում ունենք Արտակ Գրիգորյան և Կարեն Մուրադյան։ Մի փոքր տխրեցնում է այն, որ Վահան Բիչախչյանը քիչ խաղաժամանակ է ստացել «Պոգոնի» ընթացիկ մրցաշրջանի խաղերում։

Փոխարենը` Լուկաս Սելարայանն է վերադարձել հավաքական։ Նա բաց էր թողել հունիսին կայացած հանդիպումները։ Երիտասարդներից էլ ունենք Արթուր Սերոբյանին և Ժիրայր Շաղոյանին։ Երկուսն էլ արդեն ապացուցել են, որ փոխարինման մտնելով կարող են զգալի ակտիվացնել մեր խաղն առջևի գծում։

Հայաստանի Ազգային հավաքականը լուրջ խնդիրներ ունի հարձակման գծում։ Հայտացուցակում չունենք նոմինալ կենտրոնական հարձակվող, որը անվերապահորեն տեղ կունենա մեկնարկային կազմում։ Այս անգամ ևս, ամենայն հավանականությամբ, Բարսեղյանը կամ Սելարայանը կլինեն հարձակման կրակագծում, չնայած նրան, որ երկու ֆուտբոլիստներն էլ այդ դիրքի խաղացողներ չեն։

Բնականաբար, հայտացուցակին ծանոթանալուց հետո փորձում ես պարզել՝ իսկ ո՞վ չի ընդգրկվել ցանկում։ Այս անգամ այդ «երջանիկը» «Քյոլնի» հարձակվող Սարգիս Ադամյանն էր։ Ինչո՞ւ չի հրավիրվել մի ֆուտբոլիստ, որը երկար ժամանակ եղել է գլխավոր մարզչի վստահությունը վայելող թերևս առաջին խաղացողներից մեկը։ Այս հարցին կա՛մ Կապառոսը կպատասխանի ասուլիսի ժամանակ, կամ էլ այն կդառնա հռետորական։

Ամեն դեպքում, կարծում եմ, որ ցանկացած իրավիճակում մարզչին նախապես մեղադրելը սխալ է։ Առաջին պլանում միշտ արդյունքն է։ Եթե կլինի արդյունք, ապա քննադատությունն ու բողոքներն անտեղի են։ Մարզիչն է պատասխանատու արդյունքի համար։ Միշտ ու բոլոր տեղերում՝ հավաքականներում և ակումբներում այդպես է։ Չի լինում այնպես, որ թիմը արդյունք չտա և մարզիչը մնա, բայց փոխարինվեն 15, 20, կամ 25 ֆուտբոլիստներ։ Լեգենդար Սըր Ալեքս Ֆերգյուսոնը ժամանակին ասել է․ «Տվեք ինձ Զինեդին Զիդանին և 10 փայտի կտոր ու ես կհաղթեմ Չեմպիոնների լիգան»։

Ստացվում է, որ քարկոծել Կապառոսին նրա համար, որ չի հրավիրել այս կամ այն խաղացողին, սխալ կլինի, քանի որ արդյունք տալու պարագայում մարզիչը միշտ ճիշտ է լինելու։ Անկասկած, մեր գլխավոր ու միակ նպատակն է եղել պահպանել տեղը B դիվիզիոնում կամ, որ նույնն է, չզբաղեցնել խմբում վերջին տեղը։

Այլ հարց է, որ նույնիսկ արդյունք գրանցելուց հետո պետք է կատարվի վերլուծություն։ Ինչպե՞ս է խաղում թիմը, ի՞նչ մարտավարությամբ։ Արդյոք օգտագործո՞ւմ է իր ամբողջ պոտենցիալը։ Այդ բոլոր հարցերի պատասխանները պետք է ստանա նախ՝ ՀՖՖ ղեկավարությունը, իսկ հետո նաև ֆուտբոլասեր հանրությունը։ Ազգերի լիգայի խմբային փուլի ավարտից հետո ճիշտ ժամանակն է թե՛ արդյունքը, թե՛ պրոցեսը վերլուծելով հասկանալ՝ պե՞տք է Խոակին Կապառոսը շարունակի աշխատանքը և պատրաստի Ազգային հավաքականին ԵՎՐՈ 2024-ի ընտրական փուլին, թե՞ մեր ընտրանուն նոր մարզիչ է անհրաժեշտ։ Իսկ հիմա պետք է լինել Հայաստանի հավաքականի կողքին, աջակցել և հուսալ, որ կհաջողվի դրական արդյունք գրանցել։

Ի՞նչ սպասել առաջիկա խաղերից

Բնականաբար թե՛ Ուկրաինայի, թե՛ Շոտլանդիայի հավաքականները կարգով գերազանցում են Հայաստանին։ Հատկանշական է, որ երկու թիմերը տարբեր խաղաոճեր ունեն և առաջին հայացքից, դժվար է ասել, թե որ մրցակիցն է ավելի հարմար։

Ուկրաինան տեխնիկապես լավ պատրաստված ֆուտբոլիստներ ունի, բայց չնայած դրան` մանր ու միջին փոխանցումներով խաղը համադրում է երկար փոխանցումներով առջևի գծի խաղացողներին գրոհի ուղարկելու հետ։ Շոտլանդիան ավելի ուժային ֆուտբոլ է խաղում, որտեղ կարևոր նշանակություն ունի նաև պայքարը երկրորդ հարկում և ստանդարտների ժամանակ։ Հայաստանի հավաքականի հիմնական զենքը երկու խաղերում էլ լինելու են հակագրոհները։

Ուկրաինայի հետ խաղի համար որակազրկված են նաև Վարազդատ Հարոյանն ու Էդուարդ Սպերցյանը, որոնք նախորդ խաղերում, ընդհանուր առմամբ, 2-ական դեղին քարտ են ստացել։ Հետևաբար, մեր ընտրանու առանցքային 2 ֆուտբոլիստները չեն մասնակցի Ուկրաինայի հետ հանդիպմանը։

Բայց, այդ ամենը պետք է անի Կապառոսն իր մարզչական շտաբի հետ։ Գուցե իսպանացի մասնագետն անակնկալներ պատրաստած լինի։

Այս տարի խաղային գրաֆիկը շատ խիտ է։ Առաջատար հավաքականները կադրային լուրջ խնդիրներ են ունենում։ Մարզիչները ռոտացիա են կիրառում, ինչի արդյունքում էլ տուժում է թիմերի ընդհանուր խաղային որակը։ Նման դեպքերում թույլ մրցակիցների շանսերն ավելի են մեծանում։

Շոտլանդիայի և Ուկրաինայի հավաքականներն այս օրերին 3-ական հանդիպում են անցկացնելու (մեկն արդեն կայացել է), իսկ Հայաստանն ու Իռլանդիան՝ 2-ական։

Հուսանք, որ Հայաստանի Ազգային հավաքականի ֆուտբոլիստներն ու մարզչական շտաբը կկարողանան մեր երկրի համար այս դժվարին պահին ինչ-որ չափով դրական լիցքեր փոխանցել հայ ազգին։

Հայաստան — Ուկրաինա հանդիպումը կկայանա սեպտեմբերի 24-ին՝ Երևանում։ Սկիզբը՝ 17։00։ Իռլանդիա — Հայաստան հանդիպումը նախատեսված է Դուբլինում և կկայանա սեպտեմբերի 27-ին։ Սկիզբը՝ 22։45։ 

Միհրան Ալեքսանյան