Սեպտեմբերի 8-ին աշխարհը ցնցվեց Մեծ Բրիտանիայի թագուհի Եղիսաբեթ II-ի մահվան լուրից, որը, թվում էր, այնքան էլ անսպասելի պետք է չլիներ։ Լուրին արձագանքելուց անմասն չմնացին նաև սպորտային աշխարհի ներկայացուցիչները։
Բրազիլացի լեգենդ Պելեն, անդրադառնալով, Եղիսաբեթ II-ի մահվանը, վերհիշել էր 1968 թվականին իրենց առաջին հանդիպումը Բրազիլիայում, երբ թագուհին գնացել էր «Մարականա» մարզադաշտում հետևելու ֆուտբոլային խաղի։ «Ես թագուհի Եղիսաբեթ II-ով հիացել եմ նրան առաջին անգամ հանդիպելու պահից ի վեր»,- ասել էր Պելեն։
ՄՅՈՒ-ի և Պորտուգալիայի հավաքականի հարձակվող Կրիշտիանու Ռոնալդուն գրել էր․ «Անդառնալի կորուստ մի երկրի համար, որը ես իմ տունն եմ կոչում»։
Անգլիայի հավաքականի նախկին ավագ Դևիդ Բեքհեմն ընդգծել էր․ «Թագուհին իր երկրին ծառայում էր արժանապատվորեն և ողորմածությամբ»։
Թագուհու մահվան լուրին անդրադարձել են նաև Անգլիայի տղամարդկանց և կանանց հավաքականների ավագներ Հարի Քեյնը և Լի Ուիլեմսոնը՝ նրան անվանելով «մեծ ոգեշնչում» և «վառ լույս, որը հույս էր տալիս այն ժամանակ, երբ թվում էր՝ այլևս ոչ ոք չկա»։
Ֆուտբոլային աշխարհից զատ, թագուհու մահը սգում են ձիասպորտի, ավտոսպորտի, կրիկետի, գոլֆի, ռեգբիի, թենիսի և մյուս մարզաձևերի համաշխարհային աստղերն ու ներկայացուցիչները։
Սպորտային աշխարհը սգում է ոչ միայն թագուհու, այլև սպորտի մեծ երկրպագուի կորուստը։ Հայտնի է, որ Եղիսաբեթ II-ը հաճախ էր ներկա լինում սպորտային իրադարձությունների, իսկ ամուսնու հետ ծանոթացել էր թենիսի կորտում։ Բրիտանացիներին երկար տարիներ հետաքրքրում էր, թե որ ֆուտբոլային ակումբին է երկրպագում թագուհին, վերջինս խնամքով թաքցնում էր սա, բայց նրա անունը կապում էին շատ ակումբների հետ։
Օրինակ, 2009 թվականին ԶԼՄ-ները գրում էին, որ թագուհին երկրպագում է «Վեսթ Հեմ Յունայթեդին»։ Նշվում էր, որ նա թիմին սկսել էր երկրպագել 1960-1970 թվականներին, երբ լոնդոնյան ակումբը գլխավորում էր լեգենդար մարզիչ Ռոն Գրինվուդը։
Ավելի ուշ, իսպանացի ֆուտբոլիստ Սեսկ Ֆաբրեգասը հայտարարեց, որ թագուհու սիրելի թիմը Լոնդոնի «Արսենալն» է։ «Զինագործների» նախկին ֆուտբոլիստի խոսքով՝ Եղիսաբեթ II-ն ինքն էր այդ մասին ասել, երբ 2007-ին Բուքինգեմյան պալատում ընդունել էր լոնդոնյան ակումբի ֆուտբոլիստներին։ Իսկ խաղացողների հետ հանդիպումը նվիրված էր ակումբի հիմնադրման 120-ամյակին։ «Արսենալը» դարձավ պատմության մեջ առաջին ակումբը, որը հանդիպում ունեցավ թագուհու հետ։
Թեև ոչ հաճախ, բայց թագուհին ներկա էր լինում ֆուտբոլային խաղերի։ Առաջին հանդիպումը, որին նա այցելել է 1953 թվականի Անգլիայի Գավաթի եզրափակիչն էր․ «Ուեմբլիում» մրցում էին «Բլեքփուլը» և «Բոլթոն Ուոնդերերսը»։
Հաջորդ անգամ Եղիսաբեթ II-ը ֆուտբոլային խաղի այցելեց միայն 13 տարի անց։ 1966 թվականին Անգլիան ընդունում էր Աշխարհի առաջնությունը։ Այս մրցաշարում Անգլիան նվաճեց իր միակ աշխարհի գավաթը։ Թագուհին ներկա եղավ մրցաշարի երկու խաղի՝ բացման և եզրափակչի։
Թագուհին և իր ամուսինը ձիասպորտի մեծ երկրպագու էին։ Հենց դա է պատճառը, որ մարզաձևի ներկայացուցիչները միաբերան նույն խոսքերն են կրկնում․ «Ձիասպորտը կորցրեց իր լավագույն ընկերոջը»։
Եղիսաբեթ II-ը սիրում էր ոչ միայն հետևել այս մարզաձևին, այլև՝ անձամբ ձիավարել։
Իսկ թենիսի հետ կապված են Եղիսաբեթ II-ի հուշերը ամուսնու հետ 1939 թվականին ծանոթության վերաբերյալ։ Գեորգ VI թագավորը դստրերին տարել էր Դևոնում գտնվող թագավորական ռազմա-ծովային քոլեջ։ Էքսկուրսիան նրանց համար անցկացրել էր արքայազն Ֆիլիպը։ Նա թագավորական ընտանիքի անդամներին առաջարկել էր այցելել նաև թենիսի կորտեր։
Թագավորական ընտանիքի կենսագրությունը գրի առնող սըր Ջոն Ուիլեր-Բենեթի խոսքով՝ ֆիզիկական լավ վիճակը ցույց տալու համար արքայազն Ֆիլիպը մի քանի անգամ ցատկել է ցանցի վրայով։ Եղիսաբեթին դա տպավորել է։
Բրիտանիայի թագուհին հետաքրքրված էր նաև մյուս մարզաձևերով՝ աթլետիկայով, բռնցքամարտով, գոլֆով, բոուլինգով, աղավնիների մրցավազքով (սպորտաձև, որը ներառում է հատուկ վարժեցված թռչուններ, որոնք վանդակներից դուրս գալուց հետո վերադառնում են իրենց տները: Նրանց երթուղին մանրակրկիտ որոշվում է, չափվում է աղավնիների ժամանակն ու արագությունը, որոնք էլ որոշում են հաղթողներին` ArmSport):
Թագուհին մինչև վերջին օրերը մնաց աղավնիների մրցավազքով զբաղվող մի քանի կազմակերպությունների հովանավորն ու սպորտի մեծ երկրպագու։
