Հայաստանի ձյուդոյի պատանեկան հավաքականի անդամ, 81 կգ քաշային Գոռ Կարապետյանն, ինչպես ավելի վաղ հայտնել էինք, Բոսնիա և Հերցեգովինայի մայրաքաղաք Սարաևոյում անցկացված Աշխարհի առաջնությունում դարձել է ոսկե մեդալակիր:
Հավաքականի գլխավոր մարզիչն ArmSport-ի հետ զրույցում ամփոփել է պատանի ձյուդոյիստների մասնակցությունն աշխարհի պատանեկան առաջնությունում.
«Առաջնությանը մասնակցել ենք 5 մարզիկով, իսկ մինչ այդ ուսումնամարզական հավաք ենք անցկացրել Վրաստանի Գորի քաղաքում, որին մասնակցում էին նաև Վրաստանի, Ղազախստանի, Ավստրիայի, Իտալիայի հավաքականները: Դա մեր վերջին նախապատրաստությունն էր ու շատ արդյունավետ անցավ»,- ասում է Հովհաննես Դավթյանը:
Oգոստոսի 24-28-ն անցկացված Աշխարհի առաջնությունում Հայաստանի մարզական պատիվը պաշտպանել են նաև Գոռ Սաֆարյանը (50 կգ), Վահե Աղասյանը (55 կգ), Էրիկ Սաղաթելյանը (55 կգ) և Արսեն Հայրապետյանը (90 կգ), որոնք, սակայն, անմասն են մնացել մեդալներից:
Հավաքականի գլխավոր մարզիչ Հովհաննես Դավթյանը թիմի մասնակցությունը բավարար է գնահատում։
«Հիմնականում ակնկալիքներ ունեինք 50, 55 և 81 կգ քաշային կարգերում հանդես եկող մեր մարզիկներից՝ հաշվի առնելով այն, որ նրանք Եվրոպայի առաջնություններում ու օլիմպիական մանկապատանեկան փառատոններում տարբեր հարգի մեդալներ էին նվաճել: 50 կգ քաշային Գոռ Սաֆարյանը բրոնզե մեդալի համար պայքարում պարտվեց ղազախ մարզիկին և վերջնարդյունքում զբաղեցրեց 5-րդ հորիզոնականը: 55 կգ քաշային Վահե Աղասյանը մեկ հաղթանակ տարավ, բայց հետո պարտություն կրեց, Էրիկ Սաղաթելյանն ու Արսեն Հայրապետյանը պարտվեցին մեկնարկում: Հասկանում ենք, որ սա Աշխարհի առաջնություն էր, մրցակցությունը բավական մեծ էր, այնպես որ, թիմի մասնակցությունը բավարար եմ գնահատում»,- նշում է Հովհաննես Դավթյանը:
Ինչ վերաբերում է Գոռ Կարապետյանին, ապա հայ մարզիկն Աշխարհի պատանեկան առաջնության 1/16 եզրափակչում 1 րոպե 12 վայրկանում հաղթանակի է հասել Խորվաթիայի ներկայացուցչի նկատմամբ, 1/8 եզրափակչում հայ մարզիկը հաղթել է Նիդերլանդների ներկայացուցչին, քառորդ եզրափակչում Գոռը դարձյալ ժամանակից շուտ հաղթանակ է տարել արդեն ադրբեջանցի մարզիկի նկատմամբ, իսկ կիսաեզրափակչում ուժեղ է գտնվել սերբ մրցակցից: Եզրափակչում էլ Գոռ Կարապետյանը մրցել է Ուզբեկստանի ներկայացուցիչ Ալիշեր Սամանովի հետ և տպավորիչ հաղթանակի հասել՝ նվաճելով չեմպիոնի տիտղոսը:
Հատկանշական է, որ ձյուդոյի աշխարհի պատանեկան առաջնություններում սա անկախ Հայաստանի պատմության առաջին չեմպիոնական մեդալն է:
Գոռ Կարապետյանը Երևանի օլիմպիական հերթափոխի պետական մարզական քոլեջի սան է, նրա անձնական մարզիչը Վահե Թորոսյանն է: Ավելի վաղ այս մրցաշրջանում Գոռ Կարապետյանը դարձել էր նաև Եվրոպայի փոխչեմպիոն և օլիմպիական մանկապատանեկան փառատոնի բրոնզե մեդալակիր:
«Սա, իսկապես, կարևոր նվաճում էր: Նախկինում երբեք այսպիսի արդյունք չէինք ունեցել: Գոռը լավ էր պատրաստվել այս առաջնությանը»,- ասել է Հովհաննես Դավթյանը:
Հայ ձյուդոիստներն առաջիկայում կմասնակցեն Եվրոպայի երիտասարդների առաջնությանը, որը կմեկնարկի սեպտեմբերի 14-ին Չեխիայի մայրաքաղաք Պրահայում: Հոկտեմբերին էլ մինչև 23 տարեկանների հավաքականը կմասնակցի Եվրոպայի առաջնությանը: