Կոնֆերենցիաների լիգայի խաղարկության որակավորման երկրորդ փուլում «Արարատ-Արմենիան» վաղը՝ հուլիսի 21-ին, մրցելու է էստոնական «Պայդեի» հետ: Հայաստանի փոխչեմպիոնը նոր է սկսում պայքարը եվրագավաթներում, ի դեպ՝ նոր գլխավոր մարզչով և մի շարք նորեկներով:
«Արարատ-Արմենիայի» գլխավոր տնօրեն Պողոս Գալստյանն ArmSport-ի հետ զրույցում խոսել է «Պայդեի» դեմ խաղից ունեցած սպասելիքների, թիմի եվրագավաթային հեռանկարների և մի շարք այլ հարցերի մասին:
-Պարոն Գալստյան, «Արարատ-Արմենիան» շուտով կսկսի պայքարը եվրագավաթներում: Որքանո՞վ եք պատրաստ «Պայդեի» դեմ հանդիպումներին, ինչպիսի՞ն է թիմի տրամադրվածությունը:
-Կարծում եմ՝ 80 %-ով պատրաստ ենք առաջիկա դիմակայությանը: Շատ լավ ենք տրամադրված ու կռվելու ենք միայն հաղթանակի համար: Նախապատրաստական առաջին փուլն անցանք Երևանում՝ ֆուտբոլի ակադեմիայում, հետո արդեն հավաք ունեցանք Վրաստանում: Ժամանակը կարճ էր, բայց կարողացանք այն առավելագույնս օգտագործել՝ հնարավորինս լավ նախապատրաստվելու համար:
-Վստահ եմ՝ հասցրել եք ուսումնասիրել «Պայդեին»: Ի՞նչ եք կարծում, ինչպիսի՞ մրցակից է էստոնական թիմը:
-Եվրագավաթներում թույլ մրցակիցներ քիչ են լինում: Ինչ վերաբերում է «Պայդեին», ապա իրենք հաղթահարեցին Թբիլիսիի «Դինամոյի» արգելքը, իսկ մենք գիտենք, թե այդ թիմը որքան ուժեղ է: «Պայդեն» արդեն ապացուցել է, որ սովորական մրցակից չէ, ու նրանց պետք չէ թերագնահատել:
-Այս դիմակայությունում «Արարատ-Արմենիայի» շանսերն ինչպե՞ս եք գնահատում:
-Կարծում եմ՝ շատ բարձր շանսեր ունենք: Մեր թիմում բավականին ուժեղ տղաներ են հավաքված: Վստահ եմ՝ դիմակայության հաղթողը որոշվելու է երկու խաղի արդյունքում: Մենք կռվելու ենք մինչև վերջ:
-«Պայդեի» արգելքը հաղթահարելու դեպքում կհանդիպեք բելգիական «Անդերլեխտին»…
-Հնարավոր ամենաուժեղ մրցակիցը բաժին հասավ մեր զույգի հաղթողին, բայց մեր ոտքերը չեն դողում: Գիտենք, թե ինչպիսի ավանդույթներ ունեցող թիմ է «Անդերլեխտը», բայց որքան, որ մրցակիցն ուժեղ է լինում, այնքան թիմն ավելի հավաքված է գործում: Չեմ ցանկանա ժամանակից առաջ ընկնել: Աստված տա՝ մենք հաղթենք, կարողանանք կատարել մեր առջև դրված առաջին խնդիրը, հետո նոր խոսենք երկրորդի մասին:
-Երկրպագուների աջակցությունը ևս կարևոր կլինի առաջիկա խաղերում:
-Իհարկե: Շատ կցանկանամ, որ երկրպագուները գան մարզադաշտ ու ոգևորեն մեր ֆուտբոլիստներին: Վստահ եմ՝ շատ հետաքրքիր խաղ է լինելու:
-Պարոն Գալստյան, հունիսին թիմը նոր գլխավոր մարզիչ ունեցավ՝ ի դեմս Վարդան Բիչախչյանի: Մարզչի ու ֆուտբոլիստների միջև փոխհամագործակցությունն ինչպե՞ս է ստացվում այս կարճ ժամանակահատվածում:
-Բնական է՝ մարզչի համար սա կարճ ժամանակահատված է, բայց հուսով եմ՝ ինքն արդեն գիտի թիմը, ֆուտբոլիստներին:
Հայկական ֆուտբոլի երկրպագուները լավ են ծանոթ Բիչախչյանին ու նրա մասնագիտական որակներին: Ծանոթացնելու կարիք չկա: Բոլորն էլ գիտեն, թե նա որքան որակով մարզիչ է: Շատ ուրախ եմ, որ համաձայնության եկանք, ու նա գլխավորեց մեր ակումբը: Հուսով եմ՝ Վարդան Բիչախչյանի հետ մեր թիմը նորանոր հաջողությունների կհասնի:
-Նախորդ մրցաշրջանում շատ մոտ էիք Հայաստանի չեմպիոնությունը նվաճելուն: Ինչո՞ւ չստացվեց:
-Չեմ ցանկանա խոսել անցյալի մասին: Ամեն դեպքում, շատ կարևոր խաղերում շատ թեթև գոլեր էինք բաց թողնում, մեր դարպասապահը, կարելի է ասել, կոտրեց թիմի մեջքը ու մեզ ծանր իրավիճակում դրեց: Թիմը լավն էր, կոպլեկտավորված, բայց ֆուտբոլ է, այդպես էլ է լինում: Պետք է պարզապես ճիշտ հետևություններ անել ու ավելի ուժեղանալ: Եվ մենք, կարծում եմ, հենց այդ ճանապարհով ենք գնում:
-Այս ընթացքում նաև մի շարք ձեռքբերումներ ունեցաք: Թիմի տրանսֆերային քաղաքականության մասին կխոսե՞ք:
-Իսկապես լավ ձեռքբերումներ ենք ունեցել: Դարպասապահի դիրքում թիմ հրավիրեցինք Վսևոլոդ Երմակովին «Արարատից», քանի որ մեր դարպասապահը (խմբ. — Վալերի Վիմերկատին) երկրորդ մրցաշրջանը ձախողեց, ինչի արդյունքում մենք շատ խնդիրներ ունեցանք: Մեզ միացան նաև Գևորգ Ղազարյանն ու Արման Հովհաննիսյանը, որոնց ևս ներկայացնելու կարիք չկա, հավաքականի առաջատար ֆուտբոլիստներ են: Ցանկություն հայտնեցինք, որ թիմի գույները պաշտպանի նաև «Փյունիկի» նախկին հարձակվող Ուգո Ֆիրմինոն: Մեր նորեկներից են նաև բրազիլացի հարձակվող Ագդոնը, նիգերիացի կիսապաշտպան Տենտոն Յենեն, որը հայ ֆուտբոլասերին հայտնի է «Նորավանքում» իր ելույթներով, պաշտպան Հակոբ Հակոբյանն ու Միլոշ Ստամենկովիչը:
Ընդհանուր առմամբ գոհ ենք կատարած սելեկցիայից: Թիմն արդեն 99%-ով կոպլեկտավորվել է, ինչը բավականին լավ ցուցանիշ է: Նախատեսում ենք ևս մեկ նորեկ ունենալ, թեև դեռ չեմ բարձրաձայնի, թե որ դիրքի խաղացողի մասին է խոսքը: Տեսնենք՝ կհասցնե՞նք նրա հետ ևս պայմանագիր կնքել:
-Մարտունակ թիմ եք հավաքվել: Մարզչի և ֆուտբոլիստների առջև առաջնային ի՞նչ խնդիրներ եք դրել:
-Մենք մշտապես՝ թե՛ Հայաստանի առաջնությունում և թե՛ եվրոպական մրցասպարեզում, թիմի առջև դնում ենք առավելագույն խնդիրները: Որքան՝ կարողանանք, գնալու ենք առաջ:
