Sputnik մամուլի ակումբում տեղի ունեցավ Հայաստանի գրեփլինգի ֆեդերացիայի նախագահ Սարգիս Բազինյանի և գլխավոր քարտուղար Վլադիմիր Հովհաննիսյանի մամուլի ասուլիսը։
Ասուլիսի քննարկման հիմնական թեմաներն էին առաջին տարվա կատարած աշխատանքները, անցած տարի կայացած Հայաստանի առաջնությունը, մարտին կայանալիք Եվրոպայի առաջնությունը, ինչպես նաև առաջիկայում նախատեսված կարևոր իրադարձությունները։
Մինչև բուն թեմաներին անդրադառնալը՝ Բազինյանը ներկայացրեց՝ ինչ է իրենից ներկայացնում գրեփլինգ մարզաձևը․
«Գրեփլինգը ըմբշամարտի տեսակ է, որի հնարքներին մեր մարզաձևում ավելացել են խեղդող և ցավեցնող հնարքները։ Բոլորին հայտնի և մեծ մասսայականություն վայելող MMA կամ Խառը մենամարտեր մարզաձևում առկա հնարքների 60%-ը նույն գրեփլինգի հնարքներն են»:
Հովհաննիսյանն ավելացրեց, որ անցած տարվա կարևոր ձեռքբերումներից մեկն այն է, որ իրենք կարողացել են դառնալ UWW-ի (Ըմբշամարտի միջազգային ֆեդերացիա) անդամ։ Այդկերպ, արդեն մեկ տարի է, ինչ Գրեփլինգի ֆեդերացիան Հայաստանում կրում է պաշտոնական բնույթ․
«Անցած տարի մասնակցել ենք տարբեր տարիքայինների մի շարք միջազգային մրցաշարերի, ինչպես նաև աշխարհի և Եվրոպայի առաջնությունների։ Մեծահասակների մեջ ունենք Եվրոպայի առաջնության մեկ արծաթե և Եվրոպայի առաջնության մեկ բրոնզե մեդալ։ Եվս հինգ բրոնզե մեդալ նվաճել ենք աշխարհի երիտասարդական առաջնությունում, ինչպես նաև 14 մեդալ դպրոցահասակ երեխաների աշխարհի առաջնությունից»:
Բազինյանը նշեց նաև, որ 2021 թվականի փետրվարի 17-ին հուշագիր է ստորագրվել նաև Գրեփլինգի և ըմբշամարտի Հայաստանի ֆեդերացիաների միջև․
«Արդեն Արմավիրի և Լոռու մարզերում ունենք ներկայացուցչություն։ Աշխատանքներ են տարվում նաև Կոտայքի մարզում մարզադպրոց ունենալու համար։ Մեծ աշխատանքներ ենք կատարել և կատարում նաև մարզիչների վերապատրաստման համար։ Նույն աշխատանքները տարվում են՝ կապված վերապատրաստման հետ։ Արդյունքում ունենք միջազգային մրցավար, խոսքը Հրանտ Քոթանջյանի մասին է։
2021 թվականի փետրվարի 27-ից 28-ը անցկացրել ենք Հայաստանի առաջնություն, որին մասնակցել են 300-ից ավելի մարզիկներ։ Մարտին էլ Հունգարիայի մայրաքաղաք Բուդապեշտում տեղի է ունենալու Եվրոպայի առաջնությունը։ Այսօր Հայաստանում մարզաձևով զբաղվում է 2500-ից ավելի մարզիկ, ինչը բավականին լավ ցուցանիշ է նման կարճ ժամանակահատվածի համար»։
Հովհաննիսյանը, խոսելով իրենց ֆեդերացիային ուղղված աջակցության մասին, նշեց, որ կարևոր է ոչ միայն ֆինանսական աջակցությունը։ Օրեր առաջ Եվրոպայի առաջնության արծաթե և աշխարհի առաջնության բրոնզե մեդալակիր Մայիս Ներսիսյանը ստացավ միջազգային կարգի սպորտի վարպետի կոչում, ինչը, ըստ Հովյաննիսյանի, շատ կարևոր է մարզաձևի զարգացման համար և հետագայում խթան կլինի, որ ավելի շատ մարզիկներ զբաղվեն գրեփլինգով։
Բազինյանը կարևորեց ֆեդերացիայի գործընկերների՝ Vbet և SoftConstruct ընկերությունների առկայության դերը, որոնք ֆեդերացիայի կողքին են հիմնադրման առաջին օրերից։ Ֆեդերացիայի նախագահի խոսքով, նախորդ տարի ծախսել են 53 միլիոն դրամ, որոնց միջոցով կազմակերպվել են մրցաշարեր, ուսումնամարզական հավաքներ։
Սուրեն Մելիքսեթյան
