2022 թվականի նոյեմբեր-դեկտեմբեր ամիսներին Քաթարում կկայանա տարվա գլխավոր մարզական իրադարձությունը՝ Ֆուտբոլի Աշխարհի առաջնությունը, որն անցակցվում է դեռևս 4 տարին մեկ։
Սակայն այս պահի դրությամբ մրցաշարի մասնակից ոչ բոլոր թիմերն են դեռ հայտնի։ 32 մասնակցից հայտնի է 14-ը, իսկ մնացած 18 ուղեգրերի ճակատագրերը դեռ որոշվում են ընտրական փուլերում։ Այսօր կանդրադառնանք հենց այդ ընտրական փուլերին՝ պարզելու, թե որ հավաքականներն են մոտ բաղձալի ուղեգրերը նվաճելուն։
Եվրոպա
Եվրոպական ընտրական փուլում Գերմանիան, Դանիան, Ֆրանսիան, Բելգիան, Խորվաթիան, Սերբիան, Իսպանիան, Շվեյցարիան, Անգլիան և Նիդերլանդները զբաղեցրել են առաջին տեղերը խմբերում։ Այս հավաքականներն արդեն ԱԱ-ում են։
ԱԱ-2022-ի որակավորման փուլի անցումային խաղերի վիճակահանության արդյունքներով ձևավորվել է 3 խումբ՝ 4-ական թիմով, որոնք կպայքարեն մրցաշարի եզրափակիչ փուլի համար։
A խմբում տեղ են գտել Շոտլանդիան, Ուկրաինան, Ուելսը և Ավստրիան։ Կիսաեզրափակչում կխաղան Շոտլանդիան ու Ուկրաինան և Ուելսն ու Ավստրիան։ Այս զույգերի հաղթողները կվիճարկեն մրցաշարի եզրափակիչ փուլի ուղեգիրը։ B խմբում կխաղան հետևյալ զույգերը՝ Ռուսաստան-Լեհաստան, Շվեդիա-Չեխիա։ C խումբ՝ Իտալիա-Հս Մակեդոնիա, Պորտուգալիա-Թուրքիա։
Անցումային խաղերը կկայանան 2022-ի գարնանը։ Այսինքն, ևս երեք հավաքական, ովքեր կհաղթեն իրենց կվարտետներում, դուրս կգան ԱԱ եզրափակիչ փուլ։ Հատկանշական է, որ Քաթարում չենք տեսնի երկու ուժեղ հավաքականներից մեկին՝ կամ Պորտուգալիային, կամ Իտալիային, քանի որ այդ թիմերն ընդգրկված են միևնույն խմբում։
Հարավային Ամերիկա
Մոլորակի այս հատվածում Բրազիլիայի և Արգենտինայի հավաքականները ժամանակից շուտ երաշխավորել են Աշխարհի առաջնության իրենց ուղեգրերը։
Ընտրական գոտու մրցաշարային աղյուսակն այս պահին ունի հետևյալ տեսքը․
1․ Բրազիլիա – 36 միավոր
2․ Արգենտինա – 32
3․ Էկվադոր – 24
4․ Ուրուգվայ – 19
5․ Կոլումբիա – 17
6․ Պերու – 17
7․ Չիլի – 16
8․ Բոլիվիա – 15
9․ Պարագվայ – 13
10․ Վենեսուելա – 7
Այս ընտարական գոտուց ԱԱ ուղեգրեր են նվաճում առաջին 4 տեղերը զբաղեցրած հավաքականները, իսկ 5-րդ հավաքականը կվիճարկի ուղեգիրը այլ կոնֆեդերացիայի թիմի հետ։ Էկվադորի հավաքականը, հավանաբար, կպահպանի տեղն առաջին քառյակում, բայց 4-րդ ուղեգրի համար այստեղ շա՜տ թեժ պայքար է սպասվում։
Հյուսիսային Ամերիկա
Այս ընտրական խմբում առաջին երեք տեղերը զբաղեցրած թիմերը կուղևորվեն Աշխարհի առաջնություն։ Չորրորդ թիմը միջմայրցամաքային փլեյ-օֆֆում կխաղա այլ կոնֆեդերացիայի թիմի հետ։
Մրցաշարային աղյուսակը 9 տուրից հետո՝
1. Կանադա՝ 19 միավոր;
2. ԱՄՆ — 18;
3. Մեքսիկա — 17;
4. Պանամա — 14;
5. Կոստա Ռիկա — 12;
6. Ճամայկա — 7;
7. Սալվադոր՝ 6;
8. Հոնդուրաս — 3
Հս․Ամերիկայում, կարծես թե, անակնկալներ չեն սպասվում։ Այո, Կանադան վաղուց չի մասնակցել ԱԱ մրցաշարին, բացի այդ, այս երկիրն ավելի շատ ասոցացվում է հոկեյի հետ, այլ ոչ ֆուտբոլի, բայց նրանց ներկայիս դիրքն ամբողջովին տրամաբանական է․ վերջին տարիներին այս հյուսիսային երկիրը մեծ առաջընթաց է գրանցում ֆուտբոլում և ունի մի քանի շատ տաղանդավոր երիտասարդ ֆուտբոլիստներ, օրինակ՝ Ալֆոնսո Դևիսը։ Այնպես որ, հետաքրքիր կլինի հետևել այս թիմին առաջիկա ֆուտբոլային տոնի ժամանակ։ Նույնը կարելի է ասել նաև ԱՄՆ-ի հավաքականի մասին, իսկ Մեքսիկան․․․ Մեքսիկան, ինչպես միշտ, ԱԱ-ում կլինի «ամուր ընկույզի» դերում։ Մնում է՝ այս եռյակից ոչ ոք չսայթաքի ընտրական փուլի վերջին խաղերում։
Ասիա
Երեկ կայացան ԱԱ ընտրական փուլի ասիական գոտու 7-րդ տուրի հանդիպումները: Իրանի հավաքականը նվազագույն հաշվով հաղթեց Իրաքին: Այսպիսով, թիմն ապահովեց նվազագույնը երկրորդ տեղն իր խմբում` ձեռք բերելով ԱԱ-2022 ուղեգիր։ Իրանն առաջին ասիական հավաքականն է, որն ապահովեց ուղեգիր (չհաշված Քաթարը, որը մրցաշարի կազմակերպիչ երկիրն է):
Մրցաշարային աղյուսակ
A խումբ
1․ Իրան – 19 միավոր
2․ Հրվ․Կորեա – 17
3․ ԱՄԷ – 9
4․ Լիբանան – 5
5․ Իրաք – 4
6․ Սիրիա – 2
B Խումբ
1․ Սաուդյան Արաբիա – 19 միավոր
2․ Ճապոնիա – 15
3․ Ավստրալիա – 14
4․ Օման – 7
5․ Չինաստան – 5
6․ Վիետնամ – 0
Խմբերում լավագույն երկու թիմերը ստանում են ԱԱ-2022-ի ուղեգիր, իսկ երրորդ տեղերը զբաղեցրած թիմերը կխաղարկեն վերջին՝ 5-րդ ուղեգիրն ասիական գոտուց, բայց ոչ ուղիղ ԱԱ․ այդ հավաքականը կվիճարկի ուղեգիրը Հարավային Ամերիկայում 5-րդ տեղ զբաղեցրած թիմի հետ։ Երկու խմբերում էլ արդեն երևում են առաջատար եռյակները, մնում է պարզել՝ ով ավելի հաջողակ կգտնվի։
Աֆրիկա
Օրերս կայացել է Աշխարհի առաջնության որակավորման փուլի՝ աֆրիկական գոտու փլեյ-օֆֆի վիճակահանությունը։
Վիճակահանությամբ ձևավորվել են հետևյալ զույգերը, որոնց հաղթողները դուրս կգան ԱԱ եզրափակիչ փուլ՝
Սենեգալ-Եգիպտոս
Ալժիր-Կամերուն
Նիգերիա-Գանա
Մարոկկո-Կոնգո
Թունիս-Մալի
Հիշեցնենք, որ այս պահին ընթանում է Աֆրիկայի Ազգերի գավաթի խաղարկության փլեյ-օֆֆը, որն ընդհանրապես կապ չունի ԱԱ ընտրական փուլի հետ։
Եվ վերջում մեկ տողով Օվկիանիայի մասին․ այս ընտրական փուլում մրցաշարը դեռ չի էլ սկսվել․ այն կանցկացվի գարնանը, իսկ մարտի 30-ին մենք կիմանանք այս գոտու ներկայացուցչին։ Դա, ամենայն հավանականությամբ, կլինի Նոր Զելանդիայի ընտրանին, քանի որ այս տարածաշրջանում դժվար թե այլ հավաքական կարողանա մրցակցել նորզելանդացիների հետ։ Սակայն այս գոտու ներկայացուցիչն անմիջական ուղեգիր չի ստանում․ թիմը կմասնակցի այլ կոնֆեդերացիաների ներկայացուցիչների հետ փլեյ-օֆֆին։
Ամփոփենք․ Եվրոպան ԱԱ-ում կունենա 13 մասնակից, Աֆրիկան՝ 5, Հարավային Ամերիկան և Ասիան՝ 4-ական, Հյուսիսային Ամերիկան՝ 3։ Այդ հավաքականներին գումարենք մրցաշարի կազմակերպչին՝ Քաթարին, կստացվի 30 մասնակից։ Եվս երկու մասնակից հայտնի կդառնա միջմայրցամաքային փլեյ-օֆֆի արդյունքներով․ Հարավային Ամերիկայի և Ասիայի գոտում 5-րդ տեղ զբաղեցրած թիմերը կխաղան միմյանց հետ, Հյուսիսային Ամերիկայում 4-րդ տեղ զբաղեցրած թիմը և Օվկիանիայի ընտրական գոտու հաղթողը կպարզեն մյուս ուղեգրի ճակատագիրը։ Այդ հանդիպումները կկայանան հունիսին։
Ստելլա Բաբլոյան
