Հայ կարատեիստները վերջերս Հնդկաստանում մասնակցել են կարատեի UKL (Ultimate Karate Ligue) թիմային լիգային և հաղթող դարձել։ 35-ամյա Հունան Ավետիսյանն ու 39-ամյա Արծրուն Օհանյանը, ովքեր օրերս նաև 6-րդ դան են ստացել, տարբեր թիմերի կազմերում դուրս են եկել եզրափակիչ և նվաճել համապատասխանաբար առաջնության չեմպիոնի և փոխչեմպիոնի կոչումը։
Հատկանշական է, որ լիգային մասնակցելու հազարավոր հայտեր են եղել ամբողջ աշխարհից, սակայն կազմակերպիչներն ընտրել են 6 թիմ և հրավեր ուղարկել։ Հայ կարատեիստները ստացել են հրավերը` անգամ մասնակցության հայտ չուղարկելով․
«Սա լիգայի երկրորդ մրցաշրջանն էր։ Այն անցկացվում էր Հնդկաստանի Լաքհնաու քաղաքում։ Բուն մրցումը տևեց 10 օր։ Մրցումը թիմային է եղել, այնպես չեղավ, որ ես և Արծրունը միմյանց դեմ մենամարտենք։ Բոլորն էլ գիտեին, որ մենք իրար դեմ չենք կռվի, քանի որ արդեն 25 տարի իրար հետ ենք մարզվում և շատ մտերիմ ընկերներ ենք։ Մրցաշարն իր ձևաչափով նման չէր մեր նախկին փորձերին, շատ էր տարբերվում, բայց ադապտավեցինք տեղում, քանի որ առաջին անգամ պետք է մասնակցեինք այս մրցաշարին»,- ArmSport-ի հետ զրույցում պատմել է Հունան Ավետիսյանն ու ընդգծել, որ սա շատ մեծ ձեռքբերում էր իրենց համար․
«Այդքան մասնակցի մեջ Հայաստանը մենք ենք ներկայացրել ու մրցանակային տեղեր զբաղեցրել։ Երբ Արծրունի թիմը դուրս եկավ եզրափակիչ, իմ թիմը դեռ նոր պետք է մենամարտեր ու շատ էինք ցանկանում, որ մենք էլ դուրս գանք եզրափակիչ։ Ու այդպես էլ եղավ․ առաջին երկրորդ տեղերը մենք զբաղեցրինք, հաղթեց ընկերությունը, կարելի է ասել։ Երբ երկուսս էլ դուրս եկանք եզրափակիչ, արդեն նշում էինք հաջողությունը, քանի որ արդեն էական չէր, թե որ մեկս կհաղթի։
Շատ ուրախ ենք այս հաղթանակի առթիվ, ու ցանկանում ենք այն նվիրել մեր բոլոր զինվորներին․ մենք խոնարհվում ենք նրանց առաջ և պարտք ենք մինչև մեր կյանքի վերջը»,- պատմում է Ավետիսյանը։
Հայ կարատեիստները կարիերան սկսել են Երևանում, մարզվել են տարբեր ակումբներում և ժամանակի ընթացքում ընկերացել։ Երկուսն էլ տարբեր տարիներին դարձել են աշխարհի և Եվրոպայի չեմպիոններ։ Ավետիսյանն արդեն մոտ 10 տարի է` բնակվում է Բարսելոնայում և հանդիսանում է Իսպանիայի ֆուդոկան կարատեի ֆեդերացիայի նախագահը, բայց ընդգծում է կապը հայրենիքի հետ մշտապես պահում է․
«Մեր վերջին համատեղ հաջողությունը 2019 թվականի աշխարհի առաջնությունում ենք ունեցել, երբ թիմային կոմիտե ձևով առաջին հորիզոնականն ենք զբաղեցրել և դարձել Աշխարհի չեմպիոն.։ Դրանից հետո առաջին մրցաշարը, որ մասնակցեցինք Հնդկաստանի լիգան էր, քանի որ մինչ այդ կորոնավիրուսի համավարակի պատճառով առաջնությունները չեղարկվել էին։ Հուսով ենք, որ 2022 թվականին արդեն Աշխարհի և Եվրոպայի առաջնությունները կանցկացվեն ու երկուսին էլ կմասնակցենք։
Բոլոր մրցաշարերում ներկայացնում ենք Հայաստանը, հանդես ենք գալիս Հայաստանի դրոշի ներքո։ Կապը հայրենիքի հետ միշտ պահում եմ ու շատ հաճախ եմ այստեղ լինում»,- պատմում է Հունան Ավետիսյանը և նշում, որ 2019 թվականի Աշխարհի առաջնությանը երեք մարզիկով են մասնակցել․ նրանց միացել է նաև Տիգրան Մնացականյանը, ով ի դեպ արդեն հրավեր է ստացել Հնդկաստանում մասնակցելու Ultimate Karate լիգայի հաջորդ առաջնությանը։
Արծրուն Օհանյանն էլ պատմում է կարատեի իրենց ոճի` ֆուդոկանի մասին․
«Կարատեի շատ ոճեր կան, բայց կարող եմ ասել, որ մեր ոճի` ֆուդոկանի ետևում կա պատմություն, ծանրակշիռ կյանք ու անցած ճանապարհ։ Այսօր մեզ ամբողջ աշխարհով ճանաչում են, հասկանում են, որ Հայաստանում կարատեի մակարդակը շատ բարձր է, շատ ուժեղ է, մենք ճիշտ կարատե ենք ցուցադրում և մատուցում, և դա փոխանցում ենք մեր աշակերտներին։ Հայաստանում ունենք վարպետ` Հայաստանի ֆուդոկան կարատեի ազգային ֆեդերացիայի նախագահ, պրոֆեսոր Կարեն Ավետիսյանը, որը 8-րդ դան է, ու ամենայն պատասխանատվությամբ կարող եմ ասել, որ նա Հայաստանի միակ վարպետն է, որին դրսից հրավիրում են սեմինարներ անցկացնելու»։
Ֆուդոկան կարատեի ֆեդերացիան Հայաստանում գործում է 1991 թվականից։
