ArmSport-ը սկսում է նոր շարք, որի ընթացքում ներկայացնելու է տաղանդավոր և հեռանկարային ֆուտբոլիստների, որոնք մոտ ապագայում կարող են դառնալ համաշխարհային ֆուտբոլի գլխավոր աստղերը։
Աշխարհի առաջնության որակավորման փուլի շրջանակում Ռումինիայի ազգային հավաքականը հյուրընկալվելիս 2-0 հաշվով հաղթեց Լիխտենշտեյնին։ Հանդիպման 82-րդ րոպեին ռումինացիների գլխավոր մարզիչ Միրել Ռեդոյը կատարեց իր թիմի 5-րդ փոխարինումը՝ Անդրեյ Իվանի փոխարեն խաղադաշտ մտցնելով Էնես Սալիին։ Առաջին հայացքից չկա ոչ մի արտասովոր բան, սակայն, դուրս գալով խաղադաշտ, Սալին մտավ ֆուտբոլի պատմության մեջ։ Փոխարինման մտնելու պահին ռումինական «Ֆարուլի» կիսապաշտպանը 15 տարեկան 264 օրական էր։ Այսպիսով, ռումինացի հրաշամանուկը գերազանցեց նորվեգացի Մարտին Էդեգորի ռեկորդը և այսուհետ համարվում է պատմության ամենաերիտասարդ ֆուտբոլիստը, որը պաշտոնական հանդիպման է մասնակցել իր երկրի ազգային հավաքականի կազմում։ Էդեգորը Նորվեգիայի ազգային ընտրանում նորամուտը նշել էր ԵՎՐՈ 2016-ի որակավորման փուլում 15 տարեկան 301 օրական հասակում։ Ասել է թե, Սալին նորվեգացուն գերազանցեց 37 օրով։
Կանադայից «Բարսելոնա», «Ֆարուլից» ազգային հավաքական
Մինչև պատմական նորամուտը կիսապաշտպանն արդեն իսկ հասցրել էր մտնել ռումինական ֆուտբոլի պատմության մեջ։ Ռումինիայի Բարձրագույն խմբի առաջնության ընթացիկ մրցաշրջանում Սալին «Ֆարուլի» կազմում անցկացրել է ութ հանդիպում և դարձել մեկ գոլի հեղինակ։ Գրավելով «Ակադեմիկա Կլինչենիի» դարպասը՝ Սալին դարձել է Ռումինիայի առաջնություններումում գոլ խփած ամենաերիտասարդ ֆուտբոլիստը։
Remember the name.
15-year-old Enes Sali became the youngest player to ever score in the Romanian top flight.
Amazing story: born in Canada, spent time at Barca’s La Masia, he’s now coached by Hagi.
Look at his sprint after the beautiful goal to hug Papa Hagi… pic.twitter.com/P06JCnbCHj— Emanuel Roşu (@Emishor) September 14, 2021
15-ամյա կիսապաշտպանը ծնվել է 2006 թվականի փետրվարի 23-ին Տորոնտոյում։ Ֆուտբոլային առաջին քայլերն արել է տեղի «Վուդբրիջ Սթրայքերս» ակումբում։ 2015 թվականին կատալոնական «Բարսելոնայի» սկաուտները խաղերից մեկի ժամանակ նկատում են 9-ամյա տաղանդավոր պատանու ցուցադրած խաղը և նրան ևս երկու պատանիների հետ հրավիրում «Բարսելոնա»՝ փորձաշրջան անցնելու։ Սալին «Բարսելոնայի» ակադեմիայի մարզիչներին շատ արագ տպավորում է իր արագությամբ, դրիբլինգով և խաղը «կարդալու» բացառիկ ունակությամբ։
«Մեսսին, Նեյմարը և Ինիեստան ինձ շատ բան են սովորեցրել։ Նրանք ինձ անընդհատ հորդորում էին, որ վստահեմ սեփական ուժերիս»,- նշում է պատանի ֆուտբոլիստը։
Իսպանական գրանդը մտադրված է եղել պայմանագիր կնքել շնորհալի ֆուտբոլիստի հետ, սակայն ՖԻՖԱ-ի կանոնակարգով առաջացած խնդիրները, կապված վերջինիս փոքր տարիքի հետ, թույլ չեն տվել իրականացնել գործարքը։ Բանակցությունները տևել են գրեթե երեք տարի։ Ի վերջո, Սալիի ծնողները չեն ցանկացել սպասել անորոշության մեջ, և հենց այդ պահին գործի է անցել ռումինական ֆուտբոլի լեգենդ Գեորգե Հաջին։ Պատանու ընտանիքն ի սկզբանե ցանկություն չի ունեցել Կանադայից վերադառնալ Ռումինիա, սակայն առաջ եկած հեռանկարները փոխել են վերջիններիս որոշումը, և հանուն տղայի ֆուտբոլային ապագայի որոշել են վերադառնալ հայրենիք։ 2019 թվականին Էնեսը հայրիկի՝ Էնգիի հետ վերադառնում է Ռումինիա։ Նույն ժամանակահատվածում միանում են «Վիտորուլ» և «Ֆարուլ» ակումբները, որտեղ հավաքվում են մի շարք հեռանկարային երիտասարդ ֆուտբոլիստներ։ Նորաստեղծ ակումբի ղեկավարի և գլխավոր մարզչի պարտականությունները համատեղող Գեորգե Հաջին այդ տաղանդավոր ֆուտբոլիստների մեջ է ներառում նաև Էնեսին։
«Էնեսը շատ խոստումնալից ֆուտբոլիստ է։ Հաջիի ժամանակներից ի վեր ոչ մի պատանի ռումինական ֆուտբոլում նման խաղամակարդակ չի ունեցել»,- այս մասին օրերս հայտարարել է Ռումինիայի հավաքականի գլխավոր մարզչի օգնական Նիկոլաե Դիկան։
Transfermarkt-համաշխարհային պորտալում 2006 թվականին ծնված ֆուտբոլիստների մեջ միայն 250 հոգու տվյալ կա, որոնցից ընդամենը 20-ի անվան դիմաց է նշված իրենց տրանսֆերային արժեքը։ Այդ 20 ֆուտբոլիստներից 19-ի տրանսֆերային արժեքները տատանվում են 10-25 հազար եվրոյի շրջանակում, և միայն Սալիի տրանսֆերային արժեքն է գնահատվում 200 հազար եվրո։ Սա ևս մեկ ակնառու ցուցանիշ է, թե ինչպիսի հեռանկարային տղայի մասին ենք խոսում։
«Սալիին ազգային հրավիրելն ամենևին շուտ չէր։ Նա արդեն գերազանցել է ինձ։ Ես ազգային թիմում 18 տարեկանում եմ միայն նշել նորամուտս։ Սալին լուրջ տղա է և արժանի է վստահության»,- նշում է Գեորգե Հաջին։
Ահա և համաշխարհային ֆուտբոլի ևս մեկ ծագող «աստղ»։ Բայց եկեք չշտապենք և հիշենք, թե ում տարիքային ռեկորդը գերազանցեց ռումինացի պատանին՝ Մարտին Էդեգորի։ 5-6 տարի առաջ վերջինս համարվում էր ժամանակակից ֆուտբոլի գլխավոր «ադամանդը», սակայն, ինչպես ցույց տվեց հետագա ընթացքը, Էդեգորը մինչ օրս ցույց չի տվել այն պոտենցիալի անգամ 20%-ը, որը նրա մեջ տեսնում էին ֆուտբոլային փորձագետները։ Այնպես որ, զինվենք համբերությամբ և հետևենք հերթական տաղանդավոր ֆուտբոլիստի կարիերայի աստիճանական զարգացմանը։
Սուրեն Մելիքսեթյան
