Այսօր՝ հոկտեմբերի 25-ին, Արցախի Հանրապետության ԿԳՄՍ նախարար Լուսինե Ղարախանյանն ընդունել է Օլիմպիական խաղերի փոխչեմպիոն, աշխարհի չեմպիոն Արսեն Ջուլֆալակյանին և Աշխարհի և Եվրոպայի չեմպիոն, Օլիմպիական խաղերի մասնակից Դավիթ Սաֆարյանին, ովքեր այցելել են Արցախ՝ մարզասարքերով հագեցած մարզական հրապարակներ կառուցելու ծրագրով:
Այս մասին հայտնում է ԱՐՑԱԽՊՐԵՍ-ը:
Հանդիպման ընթացքում Լուսինե Ղարախանյանը կարևորել է սպորտի զարգացումն Արցախում, և հավանություն տվել մարզիկների նախաձեռնած ծրագրին՝ Արցախում սպորտի զարգացման գործում ունեցած ավանդի համար նրանց ԱՀ ԿԳՄՍ նախարարության կողմից հանձնելով շնորհակալագրեր:
«Արցախպրես»-ի թղթակցի հետ զրույցում Արսեն Ջուլֆալակյանն անկեղծացել է, որ երբ պատերազմից հետո՝ օգոստոս ամսին, առաջին անգամ այցելել է Արցախ, տեսնելով տեղի բնակիչների կանգուն լինելը, համառությունը, սեփական հողին կառչելը՝ որոշել է, որ բացի իր այցերից, պետք է կատարել կարևոր գործնական քայլ, որը ինչ-որ չափով կթեթևացնի մարդկանց հոգսերը:
«Ցանկություն ունեի մարզասարքերով հագեցած մարզական հրապարակներ կառուցել Արցախում, որին միացավ ընկերս՝ Դավիթ Սաֆարյանը: Մեր ընկերները ցանկություն են հայտնել միանալ մեր նախաձեռնությանը, և սկզբի համար առնվազն երեք մարզական հրապարակ կառուցել: Ըստ նախատեսվածի՝ կարճ ժամանակահատվածում ավարտին կհասցվեն առաջին մարզական հրապարակի կառուցման շինաշխատանքները:
Մարզական հրապարակներում կարող են մարզվել տարիքային բոլոր խմբերի, ֆիզիկական տարբեր պատրաստվածություն ունեցող մարդիկ»,- ասել է Արսեն Ջուլֆալակյանը՝ կոչ անելով հայությանը՝ շարունակել մեծ սրտացավություն և նվիրվածություն ցուցաբերել Արցախի ժողովրդի նկատմամբ, մեծ ներդրումներ կատարել, որպեսզի այդ ժողովուրդը շարունակի ապրել իր հողի վրա, շենացնի ու ծաղկեցնի իր հայրենիքը:
Օլիմպիական խաղերի մասնակից Դավիթ Սաֆարյանը, ով առաջին անգամ է Արցախում, կիսվել է իր տպավորություններով.
«Բավականին լավ ու դրական տպավորություններ եմ ստացել՝ այցելելով Արցախ: Պատերազմը ավարտվել է, և հայրենիքը զգում է բոլորիս աջակցության ու հոգատարության կարիքը, և մենք պետք է մեզնից կախված ամեն ինչ անենք, որպեսզի նպաստենք նրա զարգացմանը»,- ընդգծել է Դավիթ Սաֆարյանը:
Հանդիպումից հետո մարզիկները այցելել են Ստեփանակերտի «Արցախ» թաղամասում կառուցվող մարզական հրապարակ և տեղում ծանոթացել շինարարական աշխատանքների ընթացքին։
